Barcelona yabonye igitego cya mbere ku munota wa kane ubwo Andreas Iniesta yaherezaga umupira Ivan Rakitić atsinda igitego nyuma yo guhanahana umupira inshuro 15 mu masegonda 55 nta mukinnyi wa Juventus uwukozeho.

Igitego cya Ivan Rakitic cyo ku munota wa kane cyabaye igitego cyihuse iyi kipe itsindiye ku mukino wa nyuma w’igikombe cy’i Burayi.

Alvaro Morata wahoze akinira Real Madrid yagomboye iki gitego asonzemo ishoti rya Carlos Tevez yateye rikagarurwa n’umunyezamu wa FC Barcelona Marc ter Stegen.

Ni igikombe cya gatatu cya champions league, FC Barcelona itwaye mu myaka itandatu ishize.

Ku munota wa 68 nyuma y’aho Lionel Messi yacenze ba myugariro ba Juventus awuteye mu izamu Buffon awukuramo ariko Suarez ahita atsinda icya kabiri.

Nubwo Neymar yatsinze igitego kikangwa kuko yagitsindishije akaboko, yaje guhozwa amarira ku munota wa karindwi w’inyongera ubwo yaherezwaga na Pedro wari wasimbuye Suarez.

Juventus yabaye ikipe ya mbere itsindiwe inshuro esheshatu ku mukino wa nyuma, yahatsindiye kabiri.

FC Barcelona yabaye ikipe ya gatanu itwaye nibura inshuro eshanu iki gikombe, inganya na Bayern Munich na Liverpool inyuma ya Milan AC na Real Madrid ifite 10.

Mu Rwanda uyu mukino wakurikiranywe n’abakunzi benshi b’umupira w’amaguru bahurijwe i Gikondo na Bralirwa muri Expo Ground binyuze mu kinyobwa Heineken, umuterankunga wa UEFA champions league.

Uko byari byifashe i Gikondo mu mafoto

Amafoto: Mazimpaka Jean Pierre