{U Budage bwatsinze u Bufaransa igitego 1-0 cya Matts Hummels ku munota wa 13 busezerewa mu gikombe cy’Isi 2014, mu gihe muri ½ u Budage buzahura n’itsinda hagati ya Brazil na Colombia kuwa Kabiri.}

Myugariro wa Borussia Dortumund, Matts Hummels utarakinnye umukino wa Algeria kubera imvune yatsinze igitego cy’umutwe, umupira yateranye myugariro wa Real Madrid Raphaël Varane. Niwo wari umupira wa mbere, Abadage bateye mu izamu rya Hugo Lloris, igitego cya mbere atsinzwe mu gice cya mbere muri iyi mikino.

U Budage bwagiye muri uyu mukino mu gihe hari hashzie imyaka 60, Hongiriya ibatsindiye ibitego 2-0 ku mukino wa nyuma mu 1954.

Hummels wari warwaye ibicurane yasubiye mu mutima wa ba myugariro naho Per Mertesacker aricara, mu gihe kapiteni Philipp Lahm yakuwe hagati ashyirwa inyuma iburyo maze Miroslav Klose abanza mu kibuga, akina umukino wa 22 w’igikombe cy’Isi nyuma ya Lothar Matthaus (25) na Paolo Maldini (23).

Mbere y’uko umukino urangira, Karim Benzema yabonye uburyo bwo gutsinda igitego, umupira yateye ukurwamo n’umunyezamu Manuel Neuer.

Ni ku nshuro ya mbere, u Bufaransa butsindiwe muri ¼ mu gihe u Budage bugiye gukina ½ ku nshuro ya 13 mu bikombe 18 bamaze gukina.

U Budage bwabaye ikipe ya mbere ikinnye ku nshuro enye zikurikirana ½ cy’irangiza gusa hose ntirabasha gutwara igikombe.

Kuva mu 2002, Abadage bamaze gutsina ibitego 15 by’umutwe barusha iyibakurikiye ibitego 7.

Muri ½, u Budage buzahura kuwa Kabiri tariki ya 8 Nyakanga 2014 hagati ya Brazil na Colombia kuri Estadio Mineirão.