Umutoza w’Ikipe y’Igihugu y’Umupira w’Amaguru (Amavubi), Carlos Alos Ferrer, aherutse guhamagara abakinnyi 24, mu rwego rwo kwitegura imikino yo gushaka itike y’Igikombe cy’Afurika cy’abakina imbere mu gihugu (CHAN).

Tuyisenge asimbuye Niyonzima Olivier uzwi nka Sefu ukina hagati mu kibuga mu ikipe ya AS Kigali ufite imvune.

Uyu musore yageze muri Rayon Sports mu mpeshyi y’uyu mwaka avuye muri Espoir y’i Rusizi, ni umwe mu bakinnyi bari kwitwara neza ndetse batanga icyizere ko yazaba umukinnyi mwiza.

Tuyisenge amaze iminsi yitwara neza mu mikino Rayon Sports imaze iminsi ikina, haba muri shampiyona ubwo batsindaga Rutsiro mu mpera z’icyumweru gishize ndetse n’imikino ya gicuti iyi kipe yakinnye ubwo yiteguraga umwaka mushya w’imikino.

Amavubi akomeje imyitozo iri kubera kuri Stade ya Kigali, yitegura imikino ibiri izahuramo na Ethiopia mu rwego rwo gushaka itike y’imikino ya CHAN izabera muri Algerie.

Umukino ubanza uteganyijwe kuwa Gatanu tariki 26 Kanama 2022 i Dar Es Salaam muri Tanzania. Mu gihe umukino kwishyura uzaba tariki 3 Nzeri 2022 i Huye.