Ni intsinzi yabonetse nyuma y’aho umukino warangiye Sénégal itsinze igitego 1-0 cyaturutse kuri myugariro wa Misiri, Hamdi Fathi witsinze ku munota wa kane w’igice cya mbere.

Ibi byatumye amakipe yombi anganye igitego kimwe mu mikino yombi kuko mu ubanza, Misiri yari yatsindiye Sénégal mu Mujyi wa Cairo igitego 1-0.

Nyuma y’iminota 90 hongeweho iyindi 30 birangira nta kipe iyibyaje umusaruro hitabazwa penaliti.

Penaliti ebyiri za mbere zatewe kuri buri ruhande ntizinjiye harimo iyo Mohamed Salah yateye hejuru y’izamu. Sadio Mané yateye penaliti ya nyuma ku ruhande rwa Sénégal yahise ihesha igihugu cye itike y’Igikombe cy’Isi kizabera muri Qatar mu mpera z’uyu mwaka.

Intsinzi ya Sénégal ni amateka yisubiyemo nyuma y’uko iki gihugu cyatsinze Misiri ku mukino wa nyuma wa CAN yabereye muri Cameroun muri Gashyantare 2022.

Mu yindi mikino yabaye, Nigeria yakiriye Ghana birangira iki gihugu cya kabiri gikomereje ku gitego cyo hanze nyuma y’uko umukino warangiye ari 1-1.

Black Stars yatsindiwe na Thomas Partey mu gihe igitego cya Super Eagles za Nigeria cyinjijwe na William Troost-Ekong kuri penaliti.

Repubulika Iharanira Demokarasi ya Congo ntiyashoboye gukora amateka yo kwitabira Igikombe cy’Isi iherukamo mu myaka 48 ishize bitewe nuko yatsindiwe i Casablanca na Maroc ibitego 4-1, igiteranyo cy’imikino ibiri kiba ibitego 5-2.

Undi mukino wagaragayemo gutungurana ni uwa Cameroun na Algérie.

Ku nshuro ya munani, Cameroun yakoze amateka yo kuba ikipe yo ku Mugabane wa Afurika yitabiriye Igikombe cy’Isi inshuro nyinshi nyuma yo gutsinda Algérie ibitego 2-1, igiteranyo cy’Imikino ibiri kikarangira ari ibitego 2-2 gusa Cameroun ikomereza ku bitego byo hanze.

Cameroun yatsinzwe umukino ubanza igitego 1-0, ni yo yarangije umukino iyoboye, ibifashijwemo na Karl Toko-Ekambi.

Algérie yakiniraga imbere y’abafana bayo mu Mujyi wa Blida byayisabye gutegereza umunota wa 118 w’inyongera ibona igitego cya Ahmed Touba cyashoboraga gutuma ikomeza ariko Toko-Ekambi atsindira Cameroun igitego cyo ku munota wa nyuma w’umukino ayifasha kwerekeza mu Gikombe cy’Isi.

Igihugu kindi cya Afurika cyabonye itike ni Tunisie, ni nyuma y’aho umukino wayihuje na Mali warangiye ari 0-0 igakomereza ku gitego kimwe yatsinze mu mukino ubanza.

Ku Mugabane w’u Burayi, Pologne yabonye itike itsinze Suède ibitego 2-0 harimo penaliti yinjijwe na Kapiteni Robert Lewandowski.

Bidatunguranye, Portugal yatsinze Macedoniya y’Amajyaruguru ibitego 2-0 bya Bruno Fernandes ibona itike yo gukina Igikombe cy’Isi ku nshuro ya munani.

Biteganyijwe ko tombola y’uburyo amakipe azahura mu Gikombe cy’Isi izakorwa ku wa Gatanu, tariki ya 1 Mata 2022.