Kuri iki Cyumweryu u Rwanda rurakira Mozambique mu mukino wa gatanu wo gushaka itike y’igikombe cya Afurika kizaba mu 2024, uri bubere kuri Stade Huye.

Mu batanze ibitekerezo harimo abanyamakuru b’imikino ndetse babirambyemo. Basobanukiwe umupira w’amaguru ndetse n’amayeri yawo, yafasha u Rwanda kwegukana intsinzi.

Rugaju Reagan ukorera Ikigo cy’igihugu cy’Intangazamakuru, RBA, yavuze ko we wakwifashisha imikinire ya 4-3-3.

Ati "Ntwali Fiacre yajya mu izamu kuko imikino y'Amavubi iheruka yabikoze neza. Myugariro nahitamo Serumogo iburyo, kuko tuzaba dusatira ibumoso nashyiraho Ishimwe Christian.’"

"Hagati yabo nashyiramo Mutsinzi na Usengimana Faustin nibaza ko bakorana neza. Hagati nashyiramo Steve Rubanguka udakina ibintu byinshi, nkamwongeraho Ruboneka utwara neza umupira na Hakim Sahabo ufite ubushobozi bwo kurema igitego.’"

Imbere ngo yakoresha Nshuti Dominique Savio na Mugisha Gilbert kuko ari abakinnyi bafite ubushobozi bwo kugaruka inyuma mu gihe ikipe ishaka kugarira.

Yakomeje ati "Mugisha Didier niwe nabanzamo nka rutahizamo utsinda ibitego."

Ngabo Roben ukorera Radio&TV1, we yavuze ko mu bakinnyi 11 yakwifashisha, na we mu izamu yashyiramo Ntwali Fiacre, kuko ku mikino ibiri ya Bénin yerekanye ko adashidikanywaho.

Yakomeje ati "Iburyo nahitamo Serumogo kuko igihe ikipe isatira abikora neza kurusha Ombolenga. Manzi Thierry na Mutsinzi bakina hagati mu bwugarizi, ibumoso hagakina Imanishimwe Emmanuel nsaba gufasha ikipe kubona igitego. Hagati ni Mukunzi Yannick, Bizimana Djihad na Hakim Sahabo.’"

Yakomeje ati "Mu b'imbere, uruhande rumwe nakoresha Mugisha Gilbert, urundi ndushyireho Muhadjili Hakizimana ushaka kwerekana ko ataratanga byose mu Ikipe y'Igihugu. Rutahizamu utatuma umunyezamu wa Mozambique adatuza, ni Mugisha Didier."

Uwimana Clarisse ukorera B&B FM-Umwezi, we yavuze ko yakoresha ba myugariro bane, abo hagati batatu ndetse n'abasatira batatu.

Ati "Impamvu ni uko igikenewe ku Rwanda ari intsinzi hatitawe kuri Mozambique. Mu izamu nahisemo Ntwali Fiacre kubera ko mu mukino uheruka yatweretse ko ahagaze neza nubwo AS Kigali itamubaniye. Ku ruhande rw'iburyo nahisemo Serumogo Ali nubwo Kiyovu Sports itaragize icyo ibona, imibare igaragaza ko ahagaze neza kurusha Ombolenga Fitina.’"

Yakomeje agira ati "Mu bwugarizi hagati nahisemo Ange Mutsinzi nk'umukinnyi uhozaho mu kuba yakorana na buri wese, yafatanya na Manzi Thierry, ufite igihagararo ndetse utagira ubwoba. Ibumoso hajyaho Imanishimwe Emmanuel 'Mangwende' ntagushidikanya kuko niwe uri ku gasongero.’"

Hagati mu kibuga yahisemo Ruboneka Jean Bosco na Djihad Bizimana na Hakim Sahabo warema imipira myiza kuri ba rutahizamu.

Ati "Nahisemo ko Mugisha Gilbert na Muhadjili Hakizimana, hagati yabo hakajya Nshuti Innocent.’"

Ni mu gihe Imanishimwe Sammy ukorera Kigali Today, na we yavuze ko mu izamu yashyiramo Ntwali Fiacre "nta gushidikanya".

Muri ba myugariro yashyirmo Mutsinzi Ange na Manzi Thierry hagati, Imanishimwe Emmanuel kuko haba mu Ikipe y'Igihugu no mu ikipe ye muri Maroc ahagaze neza, yabanza ibumoso.

Yakomeje ati "Mu kibuga hagati nakoresha Mukunzi Yannick umenyereye guhatana ku mikino ikomeye agafatanya na Bizimana Djihad. Hakim Sahabo nawe agakina muri iki gice atanga imipira imbere kandi myinshi. Mugisha Gilbert namunyuza iburyo mu busatirizi, Hakizimana Muhadjili yabasha gushotera kure."

Hitimana Claude ukorera Radio&TV10 we yavuze ko agendeye ku mukino w'umutoza Carlos Alós Ferrer, hagati mu bwugarizi Manzi Thierry yabasha kumva ibyo umutoza amubwira ndenze yanayobora, wamushyiraho Manzi bakuzuzanya.

Yakomejeati "Ku mpande hajyaho Imanishimwe na Serumogo Ali. Umunyezamu ni urucabana ni Ntwali Fiacre. Yannick Mukunzi yabasha gufasha ba myugariro, bigatanga umwanya kuri Bizimana Djihad wakorana neza na Sahabo."

Yasoje agira ati "Imbere Mugisha Gilbert ku ruhande rumwe na Ndikumana Danny uri gutanga akazi ku bakinnyi bo ku mpande mu myitozo. Mugisha Didier niwe mwiza muri ba rutahizamu bahari kugeza ubu, yabanzamo."’

Kugeza ubu, mu mikino imaze gukinwa mu Itsinda L, u Rwanda ni urwa nyuma n’amanota abiri, Benin yaraye iganyije na Sénégal igitego 1-1 igakurikira n'amanota atanu mu gihe Mozambique ifite ane naho Sénégal ni ya mbere n’amanota 13 ndetse yamaze kubona itike.