{Ikipe ya Rayon Sports ikuye intsinzi i Rusizi itsinze Espoir ibitego 2-1 mu gihe kuri sitade ya Kigali, Police FC yanyagiye Etincelles ibitego 6-0. Rayon Sports iri ku mwanya wa kane ikurikiwe na Police FC.}

{Police FC 6-0 Etincelles, Police yatangiye kwigirira icyizere-Ssimbwa}

Ikipe ya Police FC yatangiye umukino irusha bigaragara Etincelles yari itaratsindwa kugeza ku munsi wa gatanu wa shampiyiona.

Police FC yaheruka gutsinda Rayon Sports, yabonye igitego cya mbere ku munota wa 22 gitsinzwe na Imran Nshimiyimana.

Nyuma y’iminota ibiri, Police FC yongeyemo ibitego bibiri, igitego cya Uwimana Jean d’amour yateye umupira ahana ikosa igitego kijyamo, Peter Kagabo yatsinze icya gatatu amakipe ajya kuruhuka.

Mu gice cya kabiri, Sam Ssimbwa utoza Police FC yakomeje kotsa igitutu Etincelles. Ku munota wa 60, nyuma yo guhererekanya neza umupira Kipson Atuheire yatsinze igitego 4.
Imran yongeye gutsinda igitego cye cya 2, cya gatanu kuri Police FC. Agashinguracumu gatsindwa na Tuyisenge Jacques.

Ssimbwa yavuze ko yizeye ko ikipe ye igiye kwibagiza abakunzi bayo ibihe bibi bavuyemo.
Ssimbwa yagize ati “ Abakinnyi banjye batangiye kwigirira icyizere, sinavuga ko umukino watworoheye ahubwo twakinnye neza kuko Etincelles yar ikipe itaratsindwa.”

Bizimana Abdul “Beken” utoza Etincelles yavuze ko yahuye n’ikibazo cy’abakinnyi 6 babanzamo bari mu kizamini cya Leta gisoza amashuri yisumbuye. Etincelles yandikiye Ishyirahamwe ry’umupira w’amaguru mu Rwanda (FERWAFA) isaba ko umukino wasubikwa ariko ntibyakunda.

Beken yagize ati “Uko imikino ya shampiyona ipanzwe n’izindi kipe zizatsindwa gutya. Ibi biduhe isomo ryo kwibaza icyakorwa igihe haba habonetse impamvu ikipe ikabura abakinnyi benshi babanzamo.”

Beken yavuze ko ntawe yashinja iyi ntsinzwi gusa asezeranya abafana be kugaruka. Yagize ati “ Ku Cyumweru abakinnyi bazaba bagarutse kuko bazarangiza ikizamini kuwa Gatanu, munyitege kuko nanjye uwo nzakubita nzamukubita iz’ishyamba.”

Rusizi: Rayon Sports yahiriwe n’urugendo, ibitego 2-1

Nyuma yo gutsindwa na Police FC ibitego 2-1, Rayon Sports yagereye aka kebo ku ikipe ya Espoir FC iyitsinda ibitego 2-1 kuri sitade ya Rusizi.

Igitego cya mbere cya Rayon Sports kinjiuwe na Hamissi Cedric kuri penaliti gikurikirwa n’icya kapiteni wa Rayon Sports, Ndayisenga Fuadi ku mupira wari uvuye muri koroneri.

Umukino ujya kurangira, Keita yaboneye Espoir igitego cy’impozamarira, uyu niwo mukino wa mbere Espoir itsinzwe kuva shampiyona itangiye.

Rayon Sports iri ku mwanya wa kane n’amanota 13 izigamye ibitego 6, ikurikiwe na Police FC ifite amanota 11, Espoir yamanutse ku mwanya wa 6 n’amanota 11 mu gihe Etincelles nyuma yo kunyagirwa yisanze ku mwanya wa 9 n’amanota9.

Abakinnyi babanjemo ku ruhande rwa Rayon Sports:

1. Ndayishimiye Jean Luc “Bakame”
2. Nshimiyimana Iddy
3. Serugendo Arafat
4. Nizigiyimana Kharim
5. Sibomana Abouba
6. Ndatimana Robert
7. Hategekimana Aphrodis
8. Mwiseneza Djamali
9. Hamissi Cedric
10. Kagere Meddie
11. Ndayisenga Fuadi

Dore uko amakipe yatsindanye no mu yindi mikino:

Espoir 1-2 Rayon Sports
Muhanga 1-1 Amagaju
Marine 0-1 Kiyovu Sports
Mukura 0-1 APR FC
Gicumbi 0-1 AS Kigali
Esperance 2-3 Musanze
Police 6-0 Etincelles