Amajonjora ya Cecafa akomeje kubera muri Tanzania mu guhitamo amakipe azahagararira akarere muri Shampiyona y’Abagore ku nshuro yayo ya kabiri. Iyi mikino igeze mu mikino yayo ya nyuma mu matsinda.

Cecafa yatangaje ko Perezida Tanzania yashyigikiye iri rushanwa nk’uko yabikoze mu riheruka kubera muri Kenya.

Perezida wa Cecafa Wallace Karia, yashimiye Samia Suluhu kuba akomeje gushyigikira bikomeye umupira w'amaguru w’abagore mu karere.

Mu butumwa bwanyujijwe ku mbuga nkoranyambaga za Cecafa, bashimiye Perezida Samia Suluhu kuba yaragize uruhare muri aya marushanwa.

Ati: "Turashimira Nyakubahwa Samia Suluhu Hassan kuba yaraje gutera inkunga umupira w'amaguru w'abagore mu karere."

Kuva yatangira gutanga iyi nkunga kuva mu mwaka ushize, amarushanwa y'Abagore bo mu Karere yitwa Shampiyona y'abagore yitiriwe Samia Suluhu (Samia Suluhu Cecafa Women’s Championship).

Cecafa yasobanuye kandi ko ariya mafaranga yatanzwe na Perezida wa Tanzania azakoreshwa nk'igihembo ku makipe azitwara neza, abitwaye neza ku giti cyabo no kugura ibihembo biherekeza amafaranga (imidari n’ibikombe).

Kuri uyu wa Gatatu, Commercial Bank of Ethiopia FC yegukanye umwanya wa mbere mu itsinda A izahura na She Corporate FC yo muri Uganda mu mukino wa 1/2, naho Simba Queens FC yo muri Tanzania izakina na AS Kigali WFC yo mu Rwanda mu mukino uzakurikira.

Usibye kujya mu majonjora ya mbere ya Caf Women's Champions League, abatsinze bazahembwa amadolari 30,000 ku wabaye uwa mbere, uwa kabiri atwara amadolari 20,000, naho ikipe iri ku mwanya wa gatatu izajya ibona amadolari 10,000. Hazahembwa abasifuzi n’abatoza bitwaye neza.