{Manchester United yo mu cyiciro cya mbere mu Bwongereza, yirukanye umutoza wayo David Moyes wari umaze amezi 10 gusa asimbuye Sir Alex Ferguson ku kibuga Old Trafford.}

BBC ivuga ko iyi kipe yari yaranze kugira icyo itangaza kuwa Mbere nyuma y’amakuru yavugaga ko Moyes ashobora kwirukanwa mbere gato y’uko shaampiyona igera ku musozo.

David Moyes w’imyaka 50 yatoranyijwe na Ferguson nk’umusimbura ubwo yafataaga ikiruhuko cy’izabukuru nyuma y’imyaka 26 atoza Man Utd.

Moyes yavuye mu ikipe ya Everton asinya amasezerano y’imyaka itandatu muri Man U ifite igikombe cy shampiyona y’umwaka ushize.

Mu itangazo Manchester United yashyize ahagaragara, haranditse hati “turashaka kumushimira ku bwitange mu kazi, ubunyakuri n’ubunyangamugayo yashyize mu kazi yari ashinzwe.”

Uyu mugabo ukomoka muri Ecosse asezerewe nyuma y’uko ku Cyumweru yatsinzwe n’ikipe yahoze abereye umutoza ya Everton bigatuma Man U ikomeza kuba ku mwanya wa karindwi wa shampiyona.

Ikinyamakuru Mirror cyo mu Bwongereza kivuga ko Moyes ashobora gusimburwa n'Umuholandi Louis van Gaal ushobora kuba amaze iminsi mu biganiro n'iyi kipe. Ryan Giggs ubu niwe usigara ari umutoza mu gihe Man U ikiganira na Van Gaal.