Mu ijoro ryo kuri uyu wa Kane tariki 3 Mutarama 2019 nibwo uyu mukino wahuje amakipe ayoboye umupira w’amaguru mu Bwongereza wabereye kuri ‘Etihad Stadium’ iri mu Mujyi wa Manchester.

Umukino watangiye Liverpool FC yari yasuye ariyo igaragaza inyota yo gushaka igitego kuko ku munota wa 20 Sadio Mane yashoboraga gufungura amazamu ubwo yateraga ishoti rigakubita ku giti cy’izamu, ugaruka mu kibuga uhura na myugariro John Stones awusubiza mu izamu ku bw’amahirwe ya Manchester City ntiwarenga umurongo.

Manchester City yafunguye amazamu ku munota wa 40 ku gitego cyatsinzwe na rutahizamu w’umunya-Argentina Sergio Leonel "Kun" Agüero ku mupira yahawe na Bernardo Silva.

Mu gice cya kabiri Liverpool yatangiranye imbaraga zo gushaka igitego cyo kwishyura binayihira ku munota wa 64 ubwo rutahizamu Roberto Firmino, akoresheje umutwe yishyuriraga ikipe itozwa na Jürgen Klopp.

Manchester City yategereje iminota 72 ngo ibone igitego cy’intsinzi ubwo umukinnyi ukina ku ruhande rw’ibumoso asatira Leroy Sané ukomoka mu Budage yasigaranaga na Alisson Ramses Becker urindira Liverpool FC ntiyazuyaza amutera mu nguni adahagazemo, amuhindukiza ku nshuro ya kabiri.

Manchester City yabonye intsinzi igabanya amanota irushwa na Liverpool yari imaze imikino 20 idatsindwa muri shampiyona kuko yujuje amanota 50 naho Liverpool iguma ku manota 54.

Umusaruro wavuye muri uyu mukino wongereye ingufu urugamba rwo gushaka igikombe cya shampiyona kuko iyo Liverpool FC itsinda yari kuba irusha ikipe ziyikurikiye amanota menshi, ariko ubu irarusha Manchester City FC amanota ane.

Naho Tottenham FC iri ku mwanya wa gatatu ifite amanota 48, Chelsea FC iri ku mwanya wa kane yo irirushwa amanota 10 kuko ifite amanota 44.