Ubuyobozi bwa Gor Mahia yo muri Kenya butangaza ko bwatanze urutonde rw’agateganyo rw’abakinnyi 21 batarimo Meddie Kagere bazayihagararira mu mikino nyafurika y’amakipe yabaye aya mbere iwabo, CAF Champions League.

Aba bayobozi batangaza ko bari mu biganiro ku buryo uyu mukinnyi igihe icyo ari cyo cyose yahita yongerwa ku rutonde rwazakina iyi mikino y’amakipe yabaye aya mbere muri Afurika.

Meddie Kagere yabwiye IGIHE ko ubu bari mu biganiro na Gor Mahia nibikunda ibyo yifuza azahita asinya amasezerano aha akaba yaririnze gutangaza amafanga yaciye Gor Mahia mu gihe amakuru avuga ko ari miliyoni 36 z’amafaranga y’u Rwanda.

Ubu buyobozi butangaza ko ibiganiro byo kongera amasezerano kuri Kagere Meddie bitaratanga umusaruro.

Umunyamabanga wungirijwe wa Gor Mahia, Ronald Ngala atangaza ko tariki ya 31 Ukuboza 2015, itariki yo gutangaho amazina bazifashisha muri iyi mikino nyafurika yageze bafite abakinnyi bane bashya barimo Francis Kahata, Gradus Ochieng, Erick Ouma na Amos Nondi.

Ngala avuga ko ibiganiro na rutahizamu watsinze ibitego 13 muri shampiyona bikomeje, bafite amahirwe yo kumwongera ku rutonde igihe baba bumvikanye bitarenze tariki ya 15 Mutarama 2016, umunsi wa nyuma wo gutanga urutonde rw’abakinnyi muri CAF.

Yagize ati “Ibiganiro na Kagere biracyakomeje nitwumvikana tuzamwongeramo tariki ya 15 Mutarama kuko hari n’abandi bakinnyi nka babiri tuzongeramo.”

Kuri uru rutonde ruriho myugariro w’Amavubi Sibomana Abuba n’Umurundi Nizigiyimana Kharim bari gukina umwaka wabo wa kabiri muri Kenya.

Ibi babinyujije ku rubuga rwa internet rwa Gor Mahia yanatwaye igikombe cya shampiyona yo muri Kenya idatsinzwe umukino n’umwe.

Gor Mahia izahura na CNAPS Sport yo muri Madagascar mu ijonjora ribanza hagati y’amatariki ya 12–14 Gashyantare i Nairobi na ho umukino wo kwishyura uzaba hagati y’amatariki ya 26–28 Gashyantare 2016.

Andi makuru avuga ko Police FC yo mu Rwanda yamaze kubona ibaruwa ya Gor Mahia ibasaba kapiteni wabo, Tuyisenge Jacques ushobora kubisikana na Kagere Meddie wasabaga amafaranga asaga miliyoni 36 z’amafaranga y’u Rwanda ngo yongere amasezerano y’imyaka ine.

Amategeko yo kwandikisha abakinnyi muri iyi mikino ya CAF; Champions League na Confederation Cup avuga ko kongeramo umukinnyi mu rutonde ruba rwatanzwe tariki ya 31 Ukuboza 2015 biherekezwa n’amafaranga.

Urutonde rw’abakinnyi Gor Mahia yatanze muri CAF

Abanyezamu

Boniface Oluoch, Jerim Onyango, Gradus Ochieng. Ba myugariro: Sibomana Abuba, Musa Mohamed, Nizigiyimana Karim, Harun Shakava, Bernard Odhiambo, Erick Ouma

Abakina hagati

Collins Okoth, Godfrey Walusimbi, Ronald Omino, Eric Ochieng, Francis Kahata, Khalid Aucho, Amos Nondi, Ernest Wendo, Ali Abondo

Ba rutahizamu

Michael Olunga, Enock Agwanda, George Odhiambo.