Joy-Lance Mickels ukina nka rutahizamu, ni umwe mu bakinnyi bari kwitwara neza muri Sabah, kuko nyuma yo kuyifasha kubona itike yo gukina muri UEFA Champions League, yanayihesheje intsinzi ya mbere muri iri rushanwa.

Si ibyo gusa kuko ari umwe mu bafashije Amavubi kubona intsinzi ebyiri mu mikino yo gushaka itike y’Igikombe cya Afurika cya 2027, nyuma yo gutsinda Liberia ibitego 3-1 na Cap Vert 2-1.

Amakipe menshi yatangiye kumutera imboni, ndetse bivugwa ko muri Mutarama 2027, ashobora kwerekeza mu ikipe nshya yamugura muri Sabah Baku afitiye amasezerano yo kugeza mu 2028.

Aganira na Sky Sports yavuze ko yakwemera gukinira Borussia Mönchengladbach, kuko ari ikipe nziza yo muri shampiyona ikomeye.

Ati “Nkeka ko iri muri shampiyona zikomeye ku Isi. Bikomeje kwibazwa niba Borussia Mönchengladbach inyifuza, ariko birumvikana nta gitangaza. Borussia ni yo kipe yanyigishije gukina ruhago, ntabwo nayihakanira iramutse inkeneye.”

Kugira ngo Joy-Lance Mickels yerekeze mu yindi kipe, ni uko Sabah akinira yakwishyurwa hagati y’ibihumbi 400 y’Amayero na 800 y’Amayero [1.180.835.200 Frw].

Ishami ry’ikinyamakuru Sky Sport rikorera mu Budage, ryavuze ko Joy-Lance Mickels w’imyaka 32 yifuza gukinira Borussia Mönchengladbach nk’ikipe y’inzozi ze nubwo agifite amasezerano ya Sabah Baku. 

Uyu mukinnyi yakuriye mu Budage, atangira gukinira Ikipe y’Abatarengeje imyaka 19 ya Borussia Mönchengladbach hagati ya 2005 na 2014. Yahavuye ajya mu ikipe ya kabiri ya Schalke.

Andi makipe yakiniye ni Alemannia Aachen, Wacker Nordhausen, FC Carl Zeiss Jena, ahava ajya mu Buholandi muri MVV Maastricht yo mu Cyiciro cya Kabiri, ari na yo yamutanze muri Sabah.