Kuva kuwa Kabiri, abakinnyi bose b’Amavubi bari gukorana imyitozo ibiri ku munsi bayobowe n’umutoza Jonathan Mckinstry kuri stade Amahoro.

Mbere y’uko hinjiramo abakinni bakina hanze, Amavubi yari amaze icyumweru mu mwiherero, iki gice cya mbere cyasojwe n’umukino wa gicuti wa Ethiopia batsinze ibitego 3-1.

Nyuma ya Ethiopia, imyitozo yaranzwe no kwinjiza mu ikipe abakinnyi bane bakina hanze nka ba myugariro Sibomana Abuba (Gor Mahia/Kenya), Nirisarike Salomon (Sint Truden/u Bubiligi), Bayisenge Emery (Lask Linz/Autriche) na rutahizamu Rushenguziminega Quintin (Lausanne Sport/u Busuwisi).

Nk’uko bigaragarira ukurikiranye imyitozo y’Amavubi, umunyezamu Kwizera Olivier ari kugirirwa icyizere cyo gukorana n’ikipe ya mbere kuri Ndayishimiye Eric “Bakame” naho Ndoli Jean Claude we akora gake.

Kuri uyu wa Gatatu, umutoza Mckinstry yaretse abasore be barakina, ayikurikirana yicaye muri stade akajya amanuka gutanga ambwiriza mu gihe yashakaga kwemeza ikipe ya mbere.

Sibomana Abuba yasimbuye Ndayishimiye Celestin wakinnye kuri Ethiopia naho mu bugarira hagati hashobora gukina Nshutiyamagara Ismael wafatanya na Nirisarike wasimbuye Usengimana Faustin, Rusheshangoga Michel aguma ku ruhande rw’iburyo.

Nta cyahindutse hagati h’Amavubi, Mugiraneza Jean Baptiste ari kumwe na Mukunzi Yannick, kapiteni Niyonzima Haruna arakina inyuma ya rutahizamu umwe Sugira Ernest watsinze igitego cya mbere kuri Ethiopia.

Iranzi Jean Claude ashobora gusimbura Sibomana Patrick wabanje bakina na Ethiopia, urundi ruhande rusatira rw’Amavubi rugacaho Tuyisenge Jacques watsinze igitego cya kabiri.

Mu rwego rwo kugendana n’umuvuduko wa ba rutahizamu ba Ghana nka Andre Ayew Dede ukinira Swansea yo mu Bwongereza watsinze Chelsea na Manchester United hashobora kuba impinduka kuri ba myugariro bo hagati kuwasimbura Nshutiyamagara mu kongera umuvuduko ndetse Rushenguziminega utaribona mu ikipe agasimbura Sugira mu mukino.

Birasa nk’aho abakinnyi nka Ndahinduka Michel,Songa Isaie, Nshimiyimana Imran bataboneka muri 18 kuko batari gukorana na bagenzi babo imyitozo ya nyuma yo gutegura Ghana.

Nyuma yo gutsindira Congo i Brazzaville ibitego 3-1, itsinda ry’abantu 44 ba Ghana baragera i Kigali saa cyenda bakore imyitozo ya mbere nimugoroba ku kibuga cya FERWAFA mbere yo kujya muri stade Amahoro kuri uyu wa Gatanu.

John Boye na Jonathan Mensah batajyanye n’abandi muri Congo baraye muri Serena Hotel bategereje bagenzi babo.

Amavubi azakira Black Stars kuri uyu wa Gatandatu kuri stade Amahoro, umukino wa kabiri w’itsinda H ry’amajonjora y’igikombe cy’Afurika kizabera muri Gabon mu 2017.

11 b'Amavubi bashobora kubanza ku mukino wa Ghana

4-2-3-1

Kwizera Olivier; Sibomana Abuba, Nshutiyamagara Ismael, Nirisarike Salomon, Rusheshangoga Michel; Mugiraneza Jean Baptiste, Mukunzi Yannick; Iranzi Jean Claude, Niyonzima Haruna, Tuyisenge Jacques; Sugira Ernest.