Ibi byatangiriye ku wa Gatanu, tariki 2 Kamena 2023, umunsi ubanziriza umukino, mu nama iwutegura yahuje amakipe yombi, Ikigo cy'Igihugu cy'Itangazamakuru cyagombaga kwerekana umukino ndetse n’abatekinisiye b'Ishyirahamwe ry'Umupira w'amaguru mu Rwanda, FERWAFA. Iyi nama ntiyarimo abasifuzi na komiseri w'umukino.

Muri iyi nama bumvikanye ko Ikipe ya Rayon Sports ari yo izakira umukino ndetse byemeranywaho n'impande zombi. Biba Rayon Sports vs APR FC.

Mu gihe amakipe yageraga ku kibuga, Rayon Sports ni yo yahageze mbere. Team Manager wayo, Mujyanama Fidèle, yabwiwe n'Umukozi wa FERWAFA witwa Muhire Livingstone usanzwe ari Umuyobozi w'Akanama gatanga impushya zo gukina amarushanwa (CAF Licensing) muri FERWAFA, wari mu itsinda ryateguye uyu mukino ko Gikundiro itari bujye mu rwambariro rw'abakiriye (ibumoso) ahubwo igomba kujya mu rw'abashyitsi (iburyo). Kuva ubwo bihita bihinduka APR FC vs Rayon Sports.

Mujyanama yagiye ku rwambariro Rayon Sports yari gukoresha (rw'ibumoso) asanga rwafashwe na APR FC ndetse runarinzwe, abajije impamvu byahindutse ntibihure n'ibyumvikanyweho mu nama yateguye uyu mukino, yabwiwe n'uyu Livingstone ko byahindutse, batemererwa kujyayo.

Ubwo APR FC yageraga ku kibuga yinjiye mu rwambariro rw'ibumoso rusanzwe rukoreshwa n'ikipe yakiriye.

Mu busanzwe, mu mabwiriza agenga amarushanwa, uruhande urwambariro ruriho ni narwo ruhande rw'ntebe (z’abasimbura n’abatoza) bicaraho ndetse ni na rwo ruhande rw’ikibuga amakipe yishyuhirizamo mbere y’umukino.

Nyuma yo guhinduka kw'ibintu ku munota wa nyuma, APR FC yari yahawe urwambariro rw’ikipe yakiriye ndetse inishyuhiriza ibumoso.

Ubwo abashinzwe gucunga ibikoresho b'amakipe yombi bageraga mu kibuga gutegurira amakipe agiye kwishyushya, babanje kwitiranya ibibuga bari bwishyuhirizemo birangira APR FC igiye ibumoso Rayon Sports yishyuhiriza iburyo.

Nyuma yo kwishyushya ibyari byahinduwe Ikipe y'Ingabo z'Igihugu yashatse kubikosorera ku kibuga ngo noneho yicare iburyo, ibintu byahise bitangira guteza imvururu n’ubwimvikane bucye rubura gica.

Ikipe yari ishinzwe gutegura uyu mukino n'ubuyobozi bwa FERWAFA begereye abatoza b’amakipe yombi, biba iby’ubusa.

Umunyamabanga mukuru wa FERWAFA, Karangwa Jules yagerageje kumvikanisha abatoza n'impande zombi ko bakwiye koroherana ariko biba iby'ubusa.

Umunyabanga mukuru wa APR FC, Masabo Michel yavuye mu myanya y'icyubahiro ajya mu rwambariro kumvikanisha abatoza b'ikipe ye ko bakwiye koroshya ibintu umukino igatangira.

Abakinnyi ba APR FC bari bemeye kwicara ku ruhande rw'ibumoso bategereza abatoza baraheba.

Nyuma y'iminota 18 ni bwo APR FC yaje kuva ku izima yemera kujya kwicara mu ruhande rw’ibumoso yari yateguriwe, umukino utangira ukereweho iminota 26.

Muri rusange, no mu kibuga wari umukino urimo guhangana gukomeye n’amahane menshi kuko hari aho myugariro wa Rayon Sports Mitima Isaac yashatse kurwana na rutahizamu wa APR FC, Nshuti Innocent.

Umukino waje kurangira Rayon Sports yegukanye igikombe ku ntsinzi y’igitego 1-0 cyatsinzwe na Ngendahimana Eric ku munota wa 40.

Aya makipe yombi n iyo azaserukira igihugu mu mikino Nyafurika, aho APR FC yatwaye Igikombe cya Shampiyona izakina CAF Champions League mu gihe Rayon Sports izakina CAF Confederations Cup.

Abo ku ruhande rwa APR FC baganira n'Umunyamabanga wa FERWAFA, Karangwa Jules, bagaragaza ko batumva impamvu yo guhindura ibyicaro
Abo ku ruhande rwa APR FC baganira n'Umunyamabanga wa FERWAFA, Karangwa Jules, bagaragaza ko batumva impamvu yo guhindura ibyicaro
Umutoza Haringingo Francis wa Rayon Sports asobanurira abasifuzi ko aho bicaye ari ho bateguriwe
Umutoza Haringingo Francis wa Rayon Sports asobanurira abasifuzi ko aho bicaye ari ho bateguriwe
Abasifuzi bafashe umwanya wo kuganira hagati yabo
Abasifuzi bafashe umwanya wo kuganira hagati yabo
Umunyamabanga wa APR FC aganira na Manishimwe Djabel
Umunyamabanga wa APR FC aganira na Manishimwe Djabel
Umutoza Ben Moussa asanga bagenzi be ku ntebe y'abasimbura bari banze kwicaraho mbere
Umutoza Ben Moussa asanga bagenzi be ku ntebe y'abasimbura bari banze kwicaraho mbere
Saa 15:21 ni bwo abakinnyi b'amakipe yombi basohotse mu rwambariro
Saa 15:21 ni bwo abakinnyi b'amakipe yombi basohotse mu rwambariro

Amafoto: Ntare Julius