Hari mu mukino w'Umunsi wa Kane wa Shampiyona, Gasogi United yari yakiriyemo Kiyovu Sports zanganyije igitego 1-1 ku matara ya Kigali Pelé Stadium ku wa Gatanu, tariki ya 15 Nzeri.

Nyuma y'uko igitego cya Kiyovu Sports cyinjijwe na Mugunga Yves ku munota wa 54, Perezida w'Umuryango Kiyovu Sports, Ndorimana Jean François Régis "Général", yasimbukiye mu bicu maze apfukama hasi ashimira Imana ko imukuyeho igisuzuguriro cya KNC wari wamujujubije kuva umukino utangiye.

Ibi byishimo bya Ndorimana ntibyatinze kuko Malipangou Théodore Yawanendji Christian yabishyizeho akadomo nyuma y'iminota 10 gusa kuri penaliti Général atemeye.

Ibi byatumye habaho gucyocyorana, KNC wari wuzuye ibyishimo yasanze Mbonyumuvunyi Abdul Karim aho yari ahagaze maze amusona ku gahanga.

Ubwo yari agarutse, KNC yasanze Général aho yari yicaye akomeza kumwishima hejuru, byatumye uyu Muyobozi wa Kiyovu Sports ahaguruka asiga KNC, ajya guhagarara inyuma wenyine.

Nubwo bombi ari abasivili, KNC yajyaniye Général telefoni ye ngendanwa n'icyo kunywa yari yasize, amugezeho amuterera 'isari' [salut] mbere yo kubimuhereza.

Nyuma yaho, agahinda kamaze kugabanuka, Général yasubiye mu byicaro n'ubwo yari akomeje kugaragaza ko atishimiye imisifurire.

Kunganya uyu mukino byatumye Kiyovu Sports igira amanota ane mu mikino ine mu gihe Gasogi United ifite amanota arindwi ku mwanya gatatu.

Kiyovu Sports izasubira mu kibuga yakira Gorilla FC tariki 30 Nzeri, ikurikizeho gusura Amagaju FC tariki 11 Ukwakira ndetse yakire Marines FC tariki 14 Nzeri 2023.

Gasogi United yo izakirwa na Bugesera FC tariki 30 Nzeri, ikurikizeho gusura Gorilla FC tariki 10 Ukwakira ndetse n'Amagaju FC tariki 14 uko kwezi.

Amafoto: Ntare Julius