Rafael York yari yagiriwe icyizere n'Umutoza mushya w'Amavubi, Umudage Torsten Spittler Frank amuhamagara mu Ikipe y'Igihugu yitegura imikino ibiri ya Zimbabwe na Afurika y'Epfo izakinwa tariki 15 na 21 Ugushyingo 2023 mu gushaka itike y'Igikombe cy'Isi cya 2026.

Nyuma y'uko FERWAFA yandikiye Gefle IF isaba ubutumire bwa Rafael York iyi Kipe na yo yasubije FERWAFA ibamenyesha ko uyu musore atazaza i Kigali kubera imvune yagize tariki 6 Nzeri 2023, mu mukino wa Shampiyona banganyijemo na Östersunds FK ibitego 2-2.

Iyi barwa iragira iti "Tariki 16 Nzeri 2023, mu mukino wa Shampiyona twakinagamo na Östersunds FK [banganyije ibitego 2-2] yagize ikibazo cyo kwangirika igufa ry'urwasaya. Icyo gihe yarabazwe ndetse ashyirwamo akuma ko guhuza ahari hatandukanye."

"Ibi byatumye ahabwa ikiruhuko kugeza tariki 12 Ukuboza 2023. Ikipe n'abaganga bacu bakaba bagiriye York inama yo kudakina imikino yanyu iri imbere."

IGIHE yaje kumenya ko uyu mukinnyi asigaje ibyumweru bitatu ku gihe yari yahawe ngo asubire mu kibuga.

Dagens 11!

Avbytare: Johansson, Friman, Jonsson, Eliasson, Hjelte, Persson, Karlsson

Matchstart om en timme! pic.twitter.com/PFN8xq96IJ

— Gefle IF FF (@GefleIF) September 16, 2023

Ikipe ya Gefle IF yasubije Ishyirahamwe Nyarwanda rya Ruhago, FERWAFA, iyisobanurira imiterere y’imvune yabujije Rafael York kwitabira ubutumire bw’Ikipe y’Igihugu ‘Amavubi’. pic.twitter.com/GdfzBccnyL

— IGIHE Sports (@IGIHESports) November 10, 2023

Gefle IF ya Rafael York iri ku mwanya wa cyenda muri Shampiyona y’Icyiciro cya kabiri igizwe n’amakipe 16. Ifite amanota 36 mu mikino 29 irushwa na Västerås ya mbere amanota 27.

Rafael w'imyaka 24 yavukiye muri Suède kuri Se w’Umunya-Angola na Nyina w’Umunyarwanda. Uyu musore yakiniye IKipe y’Igihugu ya Suède y’abari munsi y’imyaka 16 na 19 imikino 15 mbere y’uko ahitamo gukinira u Rwanda mu 2021.