{Umwaka wa 2014 ntuzibagirana mu ikipe ya FC Barcelona ikomeje kugira ibyago dore ko nyuma yo gutsindwa no kubura ibikombe bitaandukanye, ubu iri mu gahinda ko k’urupfu rw’uwahoze ari umutoza wayo Tito Vilanova wazize kanseri ku myaka 45 kuri uyu wa Gatanu.}

Tito Vilanova yabaye umutoza wa FC Barcelona mu mwaka wa 2012-2013 asimbuye Pep Guardiola. Yari amaze igihe arwariye mu bitaro by’i New-York kubera indwara ya kanseri yo mu muhogo yari amaranye amezi.

Ikinyamakuru cy’imikino Marca cyatangaje kuwa Kane ko Vilanova watwaye igikombe cya shampiyona n’ikipe ya Barça umwaka ushize yabazwe shishi itabona kubera indwara yari yakaze.

Vilanova yakinnye mu bo hagati muri FC Barcelone ari naho yarerewe, nyuma aza gukina mu makipe atandukanye muri Espagne, aza kureka gukina aba umutoza w’abatoya muri Barca.

Mu 2007 yagizwe umutoza wungiriza Pep Guardiola watozaga ikipe ya kabiri mu cyiciro cya gatatu, yaje no kumukurikira mu ikipe nkuru muri 2008.

Yabazwe bwa mbere mu kwezi k’Ugushyingo 2011, asimbura Guardiola wayivuyemo muri 2012 mbere gato y’uko yongera kubagwa mu kwezi k’Ukuboza 2012 ariko aza kugaruka ku kazi ke anatuma ikipe ye itwara shampiyona muri 2013 aho yanahawe igihembo cy’umutoza mwiza w’umunya-Espagne muri uwo mwaka.

Muri Nyakanga 2013, yasezeye ku kazi kubera ko indwara yari ikomeje kumwibasira asigira uyu mwanya Gerardo Martino utorohewe muri iyi minsi kuko ikipe ye nta mahirwe yo gutwara ibikombe bikomeye ifite muri uyu mwaka.