{Ku mukino ugira inshuro 1000, Umufaransa utoza ikipe ya Arsenal FC yo mu Bwongereza, Arsène Wenger amaze muri iyi kipe, ntiyorohewe na busa n’ikipe ya Chelsea FC ya José Mourinho yari ku kibuga cyayo aho yamupfukiye ibitego 6-0.}

Uyu mukino ubusanzwe uba wabanje kuvugisha abafana, abatoza ndetse n’abakinnyi, watangiye ushyushye aho ku munota wa gatanu gusa, Samuel Eto’o yahise abona igitego cya mbere cya Chelsea nubwo yavunitse ku munota wa 10 agahita asimburwa na Fernando Torres.

Ku munota wa karindwi, Umudage Andre Schurrle yahise abona igitego cya kabiri cya Chelsea, ibintu bitangira guhinduka kuko ikipe ya Mourinho yakomeje kwiharira umupira ibona n’amahirwe atandukanye yo gutera mu izamu rya Arsenal.

Umusifuzi wo hagati yaje kwitiranya Alex Oxlade-Chamberlain na Kieran Gibbs, amuha ikarita itukura nyuma y’uko nyamara ari Oxlade-Chamberlain wari ukoze umupira n’ukuboko mu rubuga rw’amahina. Umubiligi Eden Hazard ntiyazuyaje ahita abonera Chelsea igitego cya gatatu kuri penaliti.

Arsenal yari imaze gutsindwa bitatu mu minota 17 gusa.

Ku mupira wari uyobejwe na Schürrle, ku munota 42 Oscar yaboneje mu izamu ririnzwe na Szczesny, biba bibaye bine ku busa bwa Arsenal.

Mu gice cya kabiri nabwo Chelsea yakomeje kotsa igitutu Arsenal maze ku munota wa 66 Oscar ahindukira neza mu rubuga rw’amahina maze ashyiramo igitego cya gatanu.

Umunya-Misiri, Mohamed Salah wasimbuye wagiyemo asimbuye Oscar, yahise abona igitego cye cya mbere kuva yagera muri Chelsea muri Mutarama, ari nacyo gashinguracumu muri uyu mukino uba uhanzwe amaso na benshi ku Isi.