Ku wa Gatatu, tariki ya 28 Ukwakira 2026, ni bwo ikinyamakuru France Football gitanga ibihembo bya Ballon d’Or, cyashyize hanze urutonde rw’uko amatora yagenze kuri Ballon d’Or zatanzwe mu bihe bitandukanye.

Ni amatora yagaragaje ko Ballon d’Or eshanu zatwawe na Cristiano Ronaldo ari zo zatowe cyane nk’izahize izindi, kuko zigaragara mu myanya 10 ya mbere. Izo ni 2008, 2013, 2014, 2016 na 2017.

Umwanya wa mbere wegukanywe na Ballon d’Or uyu Munya-Portugal yegukanye mu 2008, ubwo yari rutahizamu wa Manchester United, ari na yo ya mbere yegukanye.

Lionel Messi watwaye Ballon d’Or umunani ari na we ufite nyinshi mu mateka (2009, 2010, 2011, 2012, 2015, 2019, 2021 na 2023), ari ku mwanya wa kabiri kubera iyo yatwaye mu 2012.

Mu mwaka wa 2007/08, Cristiano Ronaldo yakiniye Manchester United imikino 49, atsinda ibitego 42 harimo 31 byatumye aba umukinnyi watsinze ibitego byinshi muri Shampiyona y’u Bwongereza, aninjiza ibindi umunani byatumye aba uwatsinze byinshi muri UEFA Champions League.

Icyo gihe yatwaye Shampiyona y’u Bwongereza, UEFA Champions League, FA Community Shield na FIFA Club World Cup. 

Usibye kwegukana Ballon d’Or, yabaye umukinnyi mwiza wa FIFA, ahabwa igihembo cy’uwatsinze ibitego byinshi i Burayi n’icy’umukinnyi mwiza wa Premier League.

Uyu mukinnyi w’imyaka 41, yakiniye andi makipe arimo Real Madrid yatwariyemo izindi Ballon d'Or enye, Juventus yo mu Butaliyani na Al Nassr yo muri Arabie Saoudite akinira ubu.

Abandi bakinnyi bari ku rutonde rw’abatwaye Ballon d’Or z’amateka kurenza izindi 32, ni Ronaldo Nazário, Kevin Keegan, Johan Cruyff, Michel Platini, Franz Beckenbauer, Marco van Basten, Alfredo Di Stéfano na Karl-Heinz Rummenigge.