{Umunya Portugal Cristiano Ronaldo ukinira Real Madrid, Umunya Argentina Lionel Messi ukina muri FC Barcelona n’umunyezamu w’Umudage ukinira Bayern Munich Manuel Neuer barahatanira igihembo cy’umukinnyi mwiza wa 2014 kizatangirwa i Zurich tariki ya 12 Mutarama 2015.}

Ronaldo, Messi na Neuer batoranyijwe mu bandi bakinnyi 23 batowe na ba kapiteni n’abatoza b’amakipe y’ibihugu n’umunyamakuru w’imikino muri buri gihugu.

Neuer abaye umunyezamu wa mbere ugaragaye muri batatu ba nyuma haherukaga Umudage Oliver Khan mu 2002.

Mu 2013, Ronaldo yari yatwaye iki gihembo gitangwa n’Ishyirahamwe ry’umupira w’amaguru ku Isi (FIFA) n’ikinyamakuru FranceFootball atsinze Franck Ribery ukinira Bayern Munich na Lionel Messi wari wagitwaye inshuro enye zikurikirana kuva mu 2009.

Ronaldo yatsinze ibitego 50 mu mikino 46 yakiniye Portugal na Real Madrid mu mwaka w’imikino 2013-2014. Na Real Madrid yatwaye igikombe cya champions league, igikombe cy’umwami "Copa del Rey" n’igikombe kiruta ibindi i Burayi, UEFA Super Cup.

Mu Ugushyingo, Messi yakuyeho agahigo ka rutahizamu w’ibihe byose muri shampiyona ya Espagne “La Liga” na rutahizamu wa champions league. Ari mu ikipe y'igihugu bageze ku mukino wa nyuma w’igikombe cy’Isi aba n’umukinnyi mwiza w’irushanwa.

Messi yagaragaye mu bakinnyi batatu ba nyuma bahatanira Ballon d’or mu myaka irindwi ishize.

Neuer yafashije u Budage gutwara igikombe cy’Isi, aba n’umunyezamu mwiza w’irushanwa, atwara kandi n’igikombe cya shampiyona n’icy’igihugu, DFB-Pokal.

Muri shampiyona mu 2014, Ronaldo yatsinze ibitego 33 atanga imipira 13 yavuyemo ibitego, Messi atsinda 30 atanga imipira 14 naho Neuer amara imikino 16 atinjijwe igitego.

Mu bari n’abategarugori, igihembo kirahatanirwa na Nadine Kessler (u Budage), Marta (Brazil) na Abby Wambach (USA).

Umutoza wa 2014 azatoranywa hagati ya Carlo Ancelotti wa Real Madrid, Joachim Low watwaye igikombe cy’Isi atoza u Budage na Diego Simeone utoza Atletico Madrid.

Hazatoranywa n’igitego cyiza cy’umwaka “FIFA Puskás Award” hagati ya y’igitego cya Stephanie Roche cyo kuwa 20 Ukwakira 2013, Peamount United ikina Wexford Youths, BEWNL muri Ireland; ivya James Rodriguez (28 Kamerna 2014), Colombia ikina na Uruguay mu gikombe cy’Isi n’icya Robin van Persie (3 Kamena 2014) Espagne ikina n’u Buholandi mu gikombe cy’Isi.

Abakinnyi begukanye Ballon d’or kuva 2005

2013 – Cristiano Ronaldo (Portugal)

2012 – Lionel Messi (Argentina)

2011 – Lionel Messi (Argentina)

2010 – Lionel Messi (Argentina)

2009 – Lionel Messi (Argentina)

2008 – Cristiano Ronaldo (Portugal)

2007 – Kaka (Brazil)

2006 – Fabio Cannavaro (u Butaliyani)

2005 – Ronaldinho (Brazil)

Ibitego bitatu byatoranyijwe