{Chelsea iracakirana na Arsenal ku munsi wa 31 wa shampiyona y’Ubwongereza kuri uyu wa Gatandatu idafite Ashley Cole, Ramires na Willian; Arsene Wenger aratoza umukino w’1000 mu gihe Manchester United irakina West Ham idafite Robin Van Persie uzamara ibyumweru bitandatu mu mvune.}
Chelsea 14: 45 Arsenal
Uyu mukino ugiye guhuza aya makipe yo mu murwa, Londres, Chelsea iri ku mwanya wa mbere irusha Arsenal ya gatatu amanota ane.
Wenger ntaratsinda Mourinho mu mikino 10 yabahuje kuko yamutsinzwe inshuro eshanu, kabiri muri shampiyona.
Intsinzi ya Arsenal yakuraho umuhigo Mourinho afite w’imikino 75 adatsindirwa mu rugo, Stamford Bridge.
Ramires atangiye ibihano by’imikino itatu nyuma y’ikarita y’umutuku yabonye ku mukino wa Aston Villa mu gihe Willian azasiba u8wa Arsenal gusa.
Ashley Cole ntazakina n’ikipe yahoze akinira kubera imvune, Nemanja Matic na Mohamed Salah batakinnye umukino wa champions league na Galatasaray kuko bakinnye iyi mikino mu yandi makipe, bashobora kugaragara kuri uyu mukino.
Tomas Rosicky watsinze igitego bakina na Tottenham, ategereje ibizamini by’imvune yagize, Mesut Özil, Aaron Ramsey, Jack Wilshere na Theo Walcott baracyarwaye.
Imikino ine iheruka guhuza aya makipe, Chelsea yatsinze ibiri banganya ibiri. Arsenal imaze gutsinda Chelsea ibitego 100 mu gihe iyi yo yinjije 95.
Ubwo Aston Villa yatsindaga Chelsea, yabaye intsinzwi ya mbere mu mikino 15 ya shampiyona yakinnye, yabonye amanota 41 kuri 45 by’amanota bakiniye mu rugo
Arsenal igiye gukina na Chelsea iri mbere mu kwitwara neza mu rugo aho yatsinzwe ibitego 7 ikurikiwe na Chelsea yinjijwe 9.
Ibitego byose, birindwi batsinzwe na Samuel Eto’o muri shampiyona yabitsindiye Stamford Bridge.
Ku ruhande rwa Arsenal, Wenger aratoza umukino w’1000 kuva ageze muri iyi kipe mu 1996. Mourinho yagize ati “ Niba Chelsea impaye amahirwe yo gutoza imikino 1000, ni njye mutoza uzaba unezerewe ku Isi.”
Ubwo Wenger yakinaga umukino wa 500 atoza Arsenal, yahuye na Chelsea ya Jose Mourinho iramutsinda.
Arsenal yari yanganyije na Chelsea 0-0 mu mukino uheruka, yaherukaga gutsinda Tottenham igitego 1-0 nayo y’i Londres.
Indi mikino iteganyijwe kuri uyu wa Gatandatu
Manchester United iragenderera West Ham idafite kapiteni wayo, Nemanja Vidic utangiye ibihano by’imikino ibiri kubera ikarita itukura yahawe bakina na Liverpool.
Nyuma yo kubatsindira ibitego 3 bakina na Olympiakos bakabona itike ya ¼ cya champions league, Robin Van Persie yagize imvune izatuma amara hanze ibyumweru bitandatu. Man u iri ku mwanya wa karindwi n’amanota 48.
Ubwo Manchester City ya kane ku rutonde rwa shampiyona yakira Fulham, kapiteni wayo Vicent Kompany ntagaragara kuri uyu mukino kuko yahagaritswe kubera ikarita y’umuhondo.
Rutahizamu Stevan Jovetic wari wavunitse, yagarutse muri bagenzi be.
Liverpool irasura Cardiff nta mvune nshya ifite, uretse Lucas Leiva na Mamadou Sakho bashobora kongera kubanza ku ntebe y’abasimbura kuko bakiva mu mvune.
Imikino iteganyijwe kuri uyu wa Gatandatu
Chelsea 14: 45 Arsenal
Cardiff City 17: 00 Liverpool
Everton 17: 00 Swansea City
Hull City 17: 00 West Bromwich
Manchester City 17: 00 Fulham
Newcastle United 17: 00 Crystal Palace
Norwich City 17: 00 Sunderland
West Ham United 19: 30 Manchester United
Ibitekerezo 0