Abdul Satta Ben Moussa wasinye amasezerano y'umwaka umwe nk'umutoza w'agateganyo agiye gufatanya na Guy Bukasa nk'umutoza wungirije, uyu azwi cyane mu Rwanda mu makipe nka Gasogi United na Rayon Sports ndetse n'Ikipe y'Igihugu ya Repubulika Iharanira Demokarasi ya Congo y'Abato.

Ben Moussa yagizwe Umutoza Mukuru w'Agateganyo wa APR FC tariki 16 Ukwakira 2022 nyuma y'uko uwari Umutoza Mukuru Mohammed Adil Erradi yari yahawe ibihano n'ikipe nyuma yo gushinjwa imyitwarire mibi.

Ben Moussa yahesheje Ikipe y'Ingabo z'Igihugu Igikombe cya Shampiyona ya 2022-23 ntiyongererwa amasezerano ndetse agera no ku mukino wa nyuma w'Igikombe cy'Amahoro aho yatsinzwe na Rayon Sports igitego 1-0.

Avenir Sportif de la Marsa, yazamutse mu Cyiciro cya Mbere muri Tunisia uyu mwaka, yashinzwe mu 1940, ifite igikombe kimwe cya shampiyona yatwaye mu 2007, yatwaye kandi ibikombe by’igihugu bitanu.

Iyi kipe kuri ubu iri ku mwanya wa karindwi ari na wo wa nyuma n’inota rimwe muri Shampiyona ya Tunisia (Ligue Pro1) ikinwa mu matsinda abiri.

Khaled Ben Yahia wari umutoza wayo ajya kwirukanwa yashinjwaga umusaruro mubi dore ko mu mikino ine imaze gukinwa nta n’umwe yatsinze, yatakaje itatu anganya umwe. Itsinda B iyi Kipe ibarizwamo riyobowe na US Monastir n’amanota 10, ikurikiwe na Esperance de Tunis ifite amanota 10 mu gihe CS Sfaxien ya gatatu ifite amanota icyenda.

Mu mafoto: Ben Moussa na Guy Bukasa batangiye imyitozo mu ikipe nshya