Bayisenge wahagurutse i Kigali kuri uyu mugoroba agiye muri Autriche mu gihe hasigaye iminsi 10 shampiyona y’icyiciro cya kabiri igatangira aho bazasura FAC Team für Wien kuwa Gatanu, tariki ya 24 Nyakanga 2015.

Iyi kipe yazamutse mu cyiciro cya kabiri cya Autriche mu 2014 ifite abakinnyi batanu b’abanyamahanga barimo abanya Qatar batatu, umunya Brazil na Espagne.

Kuri uyu wa Gatanu, Lask Linz barasura Parndorf mu majonjora y’ibanze y’igikombe cya Autriche.

LASK Linz yatwaye igikombe cya shampiyona ya Autriche mu 1965 n’igikombe cy’igihugu inshuro enye mu 1965, 1967, 1970 na 1999.

Bayisenge wari kapiteni w’Amavubi y’abatarengeje imyaka 17 yakinnye igikombe cy’Isi mu 2011 cyabereye muri Mexique avuye muri APR FC yari amazemo imyaka ibiri atwayemo ibikombe bibiri bya shampiyona na bibiri by’Igikombe cy’Amahoro.

Ni ku nshuro ya gatatu, Bayisenge ajya kugerageza amahirwe i Burayi kuko mu 2012 yari yagiye muri Toulosse yo mu Bufaransa naho mu 2013 ajya muri Zulte Walgem yo mu Bubiligi.

Bayisenge Emery abaye umukinnyi wa kabiri uvuye muri APR FC nyuma ya Mugiraneza Jean Baptiste “Migi” wasinye imyaka ibiri muri AZAM FC yo muri Tanzania.