Ku gicamunsi cyo kuri uyu wa Kane nibwo AS Kigali yakiriye Sunrise FC kuri Stade ya Kigali i Nyamirambo, mu mukino yahabwagamo amahirwe yo kwitwara neza ikabona amanota atatu ya mbere muri uyu mwaka wa shampiyona.

Ni umukino umutoza wa AS Kigali, Masudi Djuma yari anyotewe n’amanota atatu kuko ikipe ye yari imaze kunganya ine, itsinzwe umwe. By’umwihariko yanganyije itatu kuva yatangira kuyitoza irimo uwa Marines FC, Musanze FC na Mukura VS.

Iyi kipe y’abanyamujyi yari yuzuye nta mukinnyi ibura dore ko yari yanagaruye Ally Niyonzima byavugwaga ko yamaze gusinyira Sofapaka yo muri Kenya.

Ku ruhande rwa Sunrise FC nayo yari yuzuye uretse Sinamenye Cyprien, umaze iminsi arwaye akaba atari afite imyitozo ihagije.

Mu gice cya mbere ikipe ya Sunrise yarushije AS Kigali, maze ku munota 12 w’umukino, Jules Urimwengu atsinda igitego cya mbere ku mupira yari ahawe na Mussa Sova, kapiteni wa Sunrise FC.

Masudi n’ikipe ye bakomeje kurushwa cyane maze ku munota wa 31 akora impinduka akuramo Harerimana Rashid wakinaga ku ruhande rw’iburyo ashyiramo Ishimwe Kevin.

Igice cya kabiri nacyo Sunrise FC yagitangiye irusha AS Kigali, bituma ku munota wa 56 umutoza Masudi yongera imbaraga hagati mu kibuga akuramo Bishira Latif wakinaga mu bwugarizi hagati.

AS Kigali yahise itangira kugaragaza imbaraga ndetse ku munota wa 67 ihusha igitego ku mupira w’umuterekano watewe na Ally Niyonzima ukubita umutambiko w’izamu.

Iyi kipe yakomeje gushakisha igitego ariko ubusatirizi bwayo bwari buyobowe na Ndarusanze na Ishimwe Kevin ntibworoherwa n’ubwugarizi bwa Sunrise ndetse n’umunyezamu Havugarurema Gahungu, umukino urangira ari intsinzi y’igitego kimwe cya Sunrise FC.

Uko imikino y’umunsi wa Gatandatu yagenze

Bugesera FC 2-1 Gicumbi FC

Musanze 2-1 Amagaju FC

AS Kigali 0-1 Sunrise FC

Amafoto: Ntare Julius