Ni umukino wa kabiri wabereye kuri Kigali Pelé Stadium, kuri uyu wa Gatandatu, tariki ya 17 Ukwakira 2026, nyuma w’uwa Uganda U17 yatsinze Ethiopia U17 ibitego 4-0 ikagera ku mukino wa nyuma.

Ikipe y’u Rwanda yagerageje kwihagararaho mu minota ya mbere y’umukino, ibyayifashije gutinyuka no gusatira cyane izamu rya Somalia.

Ku munota wa 63 mu gice cya kabiri, Ujeneza Patrick usanzwe ari umukinnyi wa Intare FA, yatsinze igitego cya mbere muri uyu mukino nyuma yo gucenga abakinnyi batatu ba Somalia.

Nyuma y’iminota ine gusa, Mohamed Osman wa Somalia yazamukanye umupira neza abanza kureba uko umunyezamu w’u Rwanda ahagaze, amutera ishoti rikomeye yishyura igitego.

Umukino wahise urangira ari igitego 1-1, hitabazwa penaliti zasize u Rwanda rutsinzwe 5-4. 

Gutsindwa byatumye kandi u Rwanda ruzasabwa gutsinda Ethiopia bizahanganira umwanya wa gatatu, kugira ngo rubone itike y'Igikombe cya Afurika cy'Ingimbi ruherukamo mu 2011.

Ni mu gihe Somalia na Uganda byamaze kubona itike, bizahatanira igikombe cya CECAFA U-17. Imikino yombi iteganyijwe ku wa Mbere, tariki ya 19 Ukwakira 2026.