Kuri iki Cyumweru tariki 3 Gashyantare 2019 guhera saa 18:00 abakinnyi bose ba APR FC bahuriye kuri Nyarutarama Sports Centre (Tennis Club) mu birori batumiwemo n’abayobozi babo byitabiriwe na Visi Perezida wa APR FC, Maj. Gen. Mubarak Muganga.

Ibi birori byatangiye Umuyobozi w’abafana ba APR FC ku rwego rw’igihugu, Col.Geoffrey Kabagambe, ashimira uko abakinnyi bitwaye mu mukino usoza indi y’igikombe cy’Intwari kuko kwegukana iki gikombe ari inshingano zabo nk’Ikipe y’Ingabo z’u Rwanda ariko kubikora batsinze mukeba Rayon Sports ari akarusho.

Muri uyu muhango Umutoza Jimmy Mulisa yashimiye abakinnyi be ariko abibutsa ko iki gikombe atari cyo cya nyuma bashaka uyu mwaka, anagenera ubutumwa abafana barimo abatamwishimiye.

Mulisa yagize ati “Turishimye ubu kuko twatsinze ariko mujye mukomeza kubashyira ku gitutu kuko iyo bakoze neza bakwiye gushimwa ariko wanakora nabi nabwo ukanengwa. Nka Muhadjiri kuba amaze iminsi yitwara neza birava ku gitutu yashyizweho. Turishimye ariko turashaka n’ibindi bikombe niyo mpamvu igitutu tugomba gukomeza kucyemera.”

Umukinnyi wo hagati ukina asatira Nshuti Dominique Savio watsinze Rayon Sports igitego rukumbi cyahesheje APR FC igikombe cy’Intwari yashimiwe mu ruhame n’abafana anashimirwa na Maj. Gen. Mubarak Muganga wari umushyitsi mukuru muri ibi birori.

Ati “Mu izina ry’ubuyobozi mpagarariye reka mbibutse ko APR FC turi umuryango. Ndashimira iyi kipe dufite ubu kuko mu kabati ibikombe biri kwiyongera uretse cya kindi badutsinze ku giceri ariko ibindi turi kubibatwara. Ndabashimira cyane”

Mu ijambo ry’uyu muyobozi wungirije wa APR FC yavuze ko uburyo yishimiye igitego cya Savio asimbuka byatunguye benshi ariko byari ngombwa kuko byari byamurenze.

Ati “Mwavugaga ku mashusho nsimbuka yacicikanye, ariko wenda hari abatarambona nkina umupira banshyira mu cyiciro kitari cyo. Nasimbutse gake kuko nari nshimye cyane, iyo bitaba ibyuma byubatse stade ubundi nari gusimbuka nkagera no mu kibuga hagati. Gusa umutoza ndashaka kuzaza nkakorana imyitozo namwe inshuro ebyiri mukambona nanjye ndacyakomeye.”

Ibi birori abakinnyi ba APR FC bahagarariwe na Mugiraneza Jean Baptiste Migi babisoje basaba umutoza n’ubuyobozi bwabo iminsi mike y’ikiruhuko baranayemererwa.

Bazatangira imyitozo ku wa Kane tariki 7 Gashyantare 2019, bitegura umukino ufungura iyo kwishyura ya shampiyona uzabahuza n’Amagaju FC.

Amafoto: Ntare Julius