Urupfu rwa Mutuyimana w’imyaka 29 rwabaye inkuru mbi ku bakinnyi n’abakunzi ba Rayon Sports dore ko bitegura umukino w’igikombe cy’Agaciro Development Fund bazakina na AS Kigali kuri uyu wa Gatatu, tariki 13 Nzeri 2017.
Mu kiganiro IGIHE yagiranye na Ndayishimiye Eric uzwi nka Bakame usanzwe ari na Kapiteni w’iyi kipe,yavuze ko mugenzi we bafatanyaga kurinda izamu yari afite ikibazo amaranye igihe.
Yagize ati “Hari igihe yajyaga afatwa n’indwara tutazi ubwoko bwayo ariko ijya kumera nk’igicuri akagwa hasi. Rimwe na rimwe twabaga turi mu mwiherero akagira ikibazo tugahita tumufata, ubundi abaganga bakaza bakamwitaho akongera akagarura imbaraga. Mu gitondo (kuri uyu wa Kabiri) rero byashoboka ko yahuye n’iki kibazo akabura umufasha kuko mukuru we babana atari mu rugo.”
Rayon Sports yari ifite imyitozo mu gihe hamenyekanaga inkuru y’urupfu rwa Mutuyimana, abakinnyi bageze ku kibuga cyo ku Mumena bakora imyitozo yoroheje.
Aba bakinnyi bahise bajya mu ngo zabo biteganyijwe ko saa kumi n’imwe, bose bajya aho yari atuye i Nyamirambo hafi ya Cosmos.
Ndayishimiye Eric Bakame ni we wagiye ku Bitaro byitiriwe Umwami Faisal aho umurambo wajyanywe gusuzumwa ngo hamenyekanye icyamwishe.










Amafoto: Niyonzima Moses




Ibitekerezo 0