U Bubiligi: Abanyamuryango ba FPR Inkotanyi n’inshuti zabo bibutse Capitaine Bwitare (Amafoto)

Yanditswe na IGIHE
Kuya 4 Ukwakira 2020 saa 09:28
Yasuwe :
0 0

Abanyamuryango ba FPR Inkotanyi batuye mu Bubiligi n’inshuti zabo bibutse Capitaine Eulade Bwitare witabye Imana tariki ya 10 Mata 2020.

Bwitare Nyirinkindi Eulade yasezeweho bwa nyuma mu cyubahiro ku wa 26 Gicurasi 2020, ashimirwa ubutwari bwamuranze mu myaka 62 yari amaze ku Isi by’umwihariko uruhare rwe mu rugamba rwo kubohora igihugu.

Abanyarwanda batuye mu Bubiligi batashoboye kumuherekeza kubera ibihe bya COVID-19 bamuhaye icyubahiro mu muhango wabereye mu Mujyi wa Bruxelles ku wa 3 Ukwakira 2020.

Wabaye umwanya wo kuvuga ibigwi bye nk’intwari yarwaniye amahoro no kubohora igihugu ubwo yari ku rugamba na bagenzi be no mu mirimo y’indi yagiye ashingwa.

Abawitabiriye kandi beretswe filime mbarankuru ikubiyemo ubuhamya n’ibyaranze Capitaine Bwitare, ijambo Gen James Kabarebe, Umujyanama mu by’Umutekano wa Perezida wa Repubulika, yavuze ririmo ubutumwa bwa Perezida Kagame bwatambukijwe ubwo yasezerwagaho bwa nyuma.

Mu batanze ubuhamya harimo n’ababanye na Bwitare mu Bubiligi aho yabaye mu gihe cy’imyaka 25.

Ni umugabo wakoze byinshi yibukirwaho n’ab’ingeri zitandukanye ndetse yabereye urugero abato n’urungano rwe.

Ambasaderi w’u Rwanda mu Bubiligi, Dr Dieudonné Sebashongore, yavuze ko Bwitare ari umugabo witangiye igihugu kandi yaharaniye ko gitera imbere.

Yagize ati ‘‘Ibikorwa bya Capitaine Bwitare mwakomeje kugarukaho mwese, ni uburyo bwiza bwo gukomereza aho yari ageze kuko ni cyo yifuzaga ko byaba uruhererekane. Yabiharaniraga haba ku rugamba cyangwa mu kazi yashinzwe mu mirimo itandukanye yamuranze. Twese aha twagiye duhuriramo na we.’’

Umugore wa Bwitare yashimiye abateguye n’abitabiriye uyu muhango cyane abaha n’ubuhamya ku mibereho ya Bwitare muri make.

Yashimiye Umukuru w’Igihugu Paul Kagame ku bufasha Leta yababaye hafi mu bufasha bwose bwari bukenewe mu gushyingura Bwitare mu Rwanda.

Ngabo Eric uyobora abanyamuryango ba FPR Inkotanyi batuye mu Bubiligi wateguye uyu muhango yavuze uko yabanye na Bwitare na mbere yuko bahurira mu Bubiligi.

Yakomeje ati ‘‘Afande Bwitare yari umuntu udasanzwe, yatubereye mukuru wacu, atubera umuyobozi, aduha urugero rw’Inkotanyi koko. Nkuko mpora mbivuga adusigiye umurage w’ubwitange, ubunyangamugayo, ubuntu, kwihangana, guca bugufi cyane no gukunda igihugu.’’

Abitabiriye uyu muhango basangijwe ubuhamya bw’abantu baturutse hirya no hino ku Isi barimo Uhagarariye abanyamuryango ba FPR Inkotanyi mu Bwongereza, Ruhashya Egide; Bushayija Eugène wo muri Scandinavia na Rutagwera Antoine wo mu Rwanda.

Perezida wa Diaspora Nyarwanda mu Bubiligi, Bazambanza Gilles, yavuze ko Abanyarwanda bo mu Bubiligi bagize amahirwe yo gukorana n’umuntu nka Bwitare ndetse ko ibikorwa bye bizakomeza kubabera inzira yo gukunda igihugu no gukorana umuhate igihe cyose.

Uyu mugoroba wo kwibuka Afande Bwitare wabaye hakurikijwe ingamba zo kwirinda icyorezo cya COVID-19 zirimo kwambara agapfukamunwa no guhana intera ndetse witabiriwe n’abantu batarenze 150.

Umuhango wo kwibuka Capitaine Bwitare witabye Imana muri Mata uyu mwaka wabereye mu Mujyi wa Bruxelles
Ambasaderi w’u Rwanda mu Bubiligi, Dr Dieudonné Sebashongore, yavuze ko Bwitare ari umugabo witangiye igihugu
Bakurikiye ubuhamya buvuga ubutwari bwaranze Capitaine Bwitare
Umuhango wabaye hubahirijwe amabwiriza yo kwirinda COVID-19
Christophe Rusine wakoranye na Bwitare atanga ubuhamya
Ngabo Eric uyobora abanyamuryango ba FPR Inkotanyi mu Bubiligi avuga ijambo
Francine wo mu muryango wa Bwitare atanga ubuhamya
Ifoto ya Bwitare yari yashyizwe aho buri wese yacaga mu kumuha icyubahiro
Igihe bakomeraga amashyi bashima ubutwari bwa Capitaine Bwitare
Karirima wamenye Bwitare mu bikorwa bitandukanye atanga ubuhamya
Lisette umwe mu bo mu muryango wa Bwitare atanga ubuhamya bw'ibyaranze ubuzima bwa nyakwigendera
Mabuye atanga ubuhamya uko yakoranye na Bwitare
Nshuti atanga ubuhamya kuri nyakwigendera
Umugore wa Bwitare, Viviane ashimira abitabiriye uyu muhango n'abawuteguye
Lyamukuru Félicité atanga ubuhamya bw’uburyo yamenyanye na Bwitare
Perezida wa Diaspora Nyarwanda mu Bubiligi, Bazambanza Gilles

Amafoto: Rutagwera Goretti na Jessica Rutayisire


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .