Umubare w’abanduye urasatira miliyoni 29, ishusho ya Covid-19 ku Isi

00:00:00 IGIHE NETWORK

KINYARWANDA

ENGLISH

FRANCAIS

Umubare w’abanduye urasatira miliyoni 29, ishusho ya Covid-19 ku Isi

Yanditswe na Ishimwe Alain

Kuya 13 September 2020 saa 12:59

Yasuwe :

Yavuzweho:

Mu gihe hatarashira umwaka umurwayi wa mbere w’icyorezo cya Covid-19 agaragaye mu Bushinwa, kuri ubu umubare w’abamaze kucyandura hirya no hino urenga Miliyoni 28, mu gihe abo kimaze guhitana nabo barenga ibihumbi 920.

Muri aba bantu barenga Miliyoni 28 barimo abagera ku bihumbi 430 banduye iki cyorezo mu gihe cy’iminsi ibiri gusa ( Ku wa 12 no ku wa 13 Nzeri).

Uretse aba banduye Covid-19, muri iki gihe cy’iminsi ibiri gusa imaze guhitana abarenga ibihumbi umunani.

Ku Isi yose abamaze gukira iki cyorezo kuri iki cyumweru banganaga na 20 813 210.

Leta Zunze Ubumwe Za Amerika ziracyaza imbere mu bihugu byugarijwe cyane n’iki cyorezo aho abarenga miliyoni esheshatu bamaze kucyandura naho abagera ku bihumbi 194 bakaba bamaze guhitanwa nacyo.

Mu gihe cy’umunsi umwe muri iki gihugu handuye abarenga ibihumbi 39 mu gihe abapfuye ari 707.

Amerika ikurikirwa n’u Buhinde aho bufite abasaga miliyoni enye banduye Covid-19, abamaze gupfa barenga ibihumbi 78, mu gihe abamaze gukira bose hamwe barenga miliyoni eshatu.

Ku wa 12 Nzeri abanduye Covid-19 muri iki gihugu babarirwa mu bihumbi 94 mu gihe abapfuye kuri uyu munsi bo ari 1108.

Ibindi bihugu byugarijwe na Covid-19 harimo Brésil,u Burusiya, Peru Colombia na Mexique.

Muri Afurika igihugu kiza ku mwanya wa mbere mu kugira umubare munini w’abanduye Covid-19, ni Afurika y’Epfo ifite abarwayi barenga ibihumbi 600 n’abamaze gupfa barenga ibihumbi 15.

Abakize Covid-19 muri iki gihugu babarirwa mu bihumbi 500. Ku wa 12 Abanduye iki cyorezo muri Afurika y’Epfo barengaga 1500, mu gihe abapfuye kuri uyu munsi ari 49.

Afurika y’Epfo ikurikirwa na Misiri ifite abarenga ibihumbi 100 banduye Covid-19 n’abagera ku bihumbi bitanu bitabye Imana.

Umubare w’ubwandu bushya bwabonetse muri iki gihugu ku wa 12 bwarengaga 140 mu gihe abapfuye bari 24.

Mu Rwanda abanduye Covid-19 bose hamwe ni 4,565 harimo 31 bashya abamaze gukira ni 2544 harimo 94 bashya, abakirwaye ni 1999, hakaba hamaze gupfa abantu 22.

Coronavirus yagaragaye bwa mbere ku Isi mu Kuboza 2019 mu Mujyi wa Wuhan mu Bushinwa nyuma kiza kugenda gikwirakwira Isi yose aho cyazahaje cyane ibihugu byo mu Burayi. Umurwayi wa mbere w’iki cyorezo yagaragaye mu Rwanda muri Werurwe 2020.