Ubushakashatsi bwagaragaje ko kwandura Covid-19 bigabanya ubudahangarwa bw’umubiri

Yanditswe na IGIHE
Kuya 27 Ukwakira 2020 saa 09:48
Yasuwe :
0 0

Ubushakashatsi bwakozwe n’ishuri rikuru ryo mu Bwongereza rya Imperial College London, bwagaragaje ko kwandura Covid-19 bituma bimwe mu bigize ubwirinzi bw’umubiri w’umuntu bizwi nka Antibodies bigabanuka ku kigero cyo hejuru kabone nubwo yaba yarayikize.

Antibodies ni insoro zikora uturindamubiri cyangwa se abasirikare b’umubiri. Ubudahangarwa bw’umubiri buvubura abasirikare igihe hari icyo bwikanze gishobora kuwuhungabanya nka virusi n’ibindi.

Kuba ibizamini by’abaganga byagaragaza ko ’antibody’ iri mu mubiri, bivuze ko yavubuwe kubera ko hari virusi runaka wahanganye nayo.

Ubu bushakashatsi bwakorewe ku bantu 350 000 bo mu Bwongereza bapimwe Coronavirus hakoreshejwe uburyo bwo gupima ‘Antibodies’ ziri mu mubiri.

Muri aba bapimwe, abagera kuri 60 mu 1000 muri Nyakanga basanganywe Coronavirus. Gusa muri Nzeri ubwo bongeraga gupimwa abantu 44 mu 1000 nibo basanganywe izi Antibodies.

Aba bashakashatsi bavuga ko hagati ya Kanama na Nzeri umubare w’abantu bafite Antibodies mu mibiri yabo wagabanutse ku kigero cya 26%. Ibi ngo byongera ibyago byo kuba umuntu yakwandura Covid-19 inshuro nyinshi.

Umwe mu bagize itsinda ryakoze ubu bushakashatsi Prof Wendy Barclay, yavuze ko kugabanuka kwa Antibodies bishobora kuba bivuze kugabanuka k’ubudahangarwa bw’umubiri.

Ati “Dushobora kubona antibodies ndetse turabibona ko zigabanuka kandi turabizi neza ko antibodies ubwazo zishobora kurinda, mu rwego rwo kugereranya ibimenyetso, nshobora kuvuga ko ubudahangarwa bw’umubiri bugabanuka ku kigero kimwe n’icyo antibodies zigabanukaho, kandi iki ni ikimeneyetso cy’uko ubudahangarwa bugabanuka.”

Ubu bushakashatsi buje buvuguruza ibyari byagiye bivugwa na bamwe mu bahanga ko umubiri w’umuntu ushobora kuzagera aho ukamenyera Covid-19 ku buryo uyirwanyiriza ubwayo.

Uku kugabanuka k’ubudahangarwa bw’umubiri aba bashakashatsi bavuga ko ariyo ntandaro y’abantu bagenda bandura Covid-19 bwa kabiri nubwo umubare wabo ukiri muto. Gusa bagaragaza ko haba hari agahenge k’uko abandura iki cyorezo bwa kabiri kitabazahaza cyane kuko umubiri uba waramenye uburyo bwo kukirwanya.

Ubu bushakashatsi bwakorewe mu Bwongereza bwagaragaje ko Coronavirus igabanya ubudahangarwa bw'umubiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .