Ingendo z’indege zose zahagaritswe mu Mujyi wa Dubai kubera Coronavirus

Yanditswe na IGIHE
Kuya 24 Werurwe 2020 saa 11:03
Yasuwe :
0 0

Leta Zunze Ubumwe z’Abarabu zahagaritse ingendo zose z’indege zinjira n’izisohoka mu Mujyi wa Dubai, nyuma y’aho abantu babiri bitabye Imana bazize icyorezo cya Novel Coronavirus muri iki gihugu.

Iki cyemezo cyafashwe kuri uyu wa Mbere kivuga ko ingendo z’indege z’abagenzi bajya cyangwa bava i Dubai ndetse n’abahanyura berekeza mu bindi bice bitandukanye ku isi zihagaritswe mu gihe cy’ibyumweru bibiri.

Abantu babiri bitabye Imana ku wa Gatanu, ni bo ba mbere bazize icyorezo cya Novel Coronavirus ku butaka bw’iki gihugu, kimaze kubarura abasaga 198 banduye.

Guhagarika ingendo z’indege zose zanyuraga ku Kibuga cy’Indege Mpuzamahanga cya Dubai biri bugire ingaruka zikomeye ku zindi ngendo zo hirya ni hino ku isi kuko iki kibuga gifatwa nk’igihuza ibice byo mu Burasirazuba bw’Isi n’umugabane w’i Burayi.

Itangazo ryo kuri uyu wa Mbere ryasohotse nyuma y’aho kompanyi itwara abagenzi mu ndege yo muri iki gihugu, Emirates, itangaje ko izahagarika ingendo zayo kuwa 25 Werurwe 2020.

Kugeza ubu ibikorwa byose byo muri Leta Zunze Ubumwe z’Abarabu byahagaze, usibye abakora imirimo y’ingenzi kurusha iyindi.

Iri tangazo rivuga ko ibindi bikorwa byo gusuzuma no gushyira mu kato biri bukorwe ndetse ko hari ingendo nke ziri bukomeze mu rwego rwo kurinda umutekano w’abagenzi, abakozi bo mu ndege n’abakora ku kibuga cy’indege, babarinda ibyago byo kwandura.

Emirates niyo iza ku mwanya wa Mbere mu gutwara abagenzi berekeza kure buri mwaka, ikoresheje indege zayo zigera kuri 277.

Mu barwayi 36 bamaze kugaragara mu Rwanda, bamwe muri bo bari banyuze i Dubai. Urugero ruheruka ni umugabo umwe wavuye i Dubai tariki ya 20 Werurwe 2020, byemejwe ko yanduye ku Cyumweru, tariki ya 22 Werurwe 2020.

Mbere y’aho hari abandi barwayi bari baravuye cyangwa baranyuze i Dubai baza mu Rwanda.

Abacuruzi benshi b’Abanyarwanda bakundaga kujya i Dubai kurangurayo ibicuruzwa bitandukanye.

Mbere y’uko Rwandair ihagarika ingendo zayo mu cyumweru gishize kubera Novel Coronavirus, yakoraga urugendo rwa buri munsi hagati ya Kigali na Dubai.

Ingendo z’indege zose zahagaritswe mu Mujyi wa Dubai kubera Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .