Covid-19: Mu byo mukora mufate umwanzuro nk’abahitamo hagati y’urupfu n’ubuzima - Dr Tedros

Yanditswe na Iradukunda Serge
Kuya 25 Nyakanga 2020 saa 05:06
Yasuwe :
0 0

Umuyobozi w’Ishami ry’Umuryango w’Abibumbye rishinzwe Ubuzima, OMS, Dr Tedros Adhanom Ghebreyesus, yasabye abatuye Isi kumenya ko ibyo bakora byose muri iki gihe cya COVID-19, bagomba kubifata nko guhitamo hagati y’urupfu n’ubuzima.

Ubu butumwa bwa Tedros buje mu gihe mu bihugu bimwe abaturage batangiye kudohoka ku ngamba zo kwirinda Covid-19 ndetse bamwe biganjemo abatuye mu bihugu itahitanyemo abantu benshi, batangiye kuyikerensa.

Mu butumwa umuyobozi wa OMS yageneye abatuye Isi kuri uyu wa 25 Nyakanga, yabasabye kumenya ko ibyo bakora byose baba bari guhitamo hagati y’ubuzima n’urupfu.

Yagize ati “Turasaba abantu bose ko mu gihe bafata imyanzuro ijyanye n’aho bajya, ibyo bakora, abo bahura nabo, ko babifata nko gufata umwanzuro hagati y’urupfu n’ubuzima kuko ariko biri, bishobora kutaba ubuzima bwawe ariko amahitamo yawe ashobora kuba umurongo utandukanya ubuzima n’urupfu ku muntu ukunda cyangwa se no ku wo utazi”

Dr Tedros wasaga n’udashimishijwe n’uburyo abantu bari kwitwara, yavuze ko bibaje kuba “Mu byumweru bishize haragiye haboneka ubwandu bushya bufite aho buhuriye n’utubyiniro n’ahandi hantu hahurira abantu benshi.”

Yakomeje asaba abantu kwigenzura bakareba niba bagikurikiza ingamba zo kwirinda Covid1-19 nka mbere, anabibutsa ko buri wese akwiye kugira uruhare mu kurinda mugenzi we.

Ati “ Mu gihe cyose ikiri mu bantu, buri wese ari mu byago. Byose bishingira ku kugira amahitamo meza, menya uko uhagaze, Ese uzi abantu banduye mu gace utuyemo ejo hashize? Ese uzi aho wakura ayo makuru? Ese uzi uburyo wagabanya ibyago byo kwandura? Wita ku gusiga metero imwe hagati yawe n’abandi? Uracyakaraba intoki mu buryo buhoraho? Ese uracyakurikiza amabwiriza yatanzwe n’ubuyobozi bw’aho utuye? Ntuzigere utekereza kurindwa n’undi muntu, twese tugomba kugira uruhare mu kwirinda no kurinda abandi.”

Kugeza uyu munsi umubare w’abamaze kwandura Covid-19 ku Isi hose urenga miliyoni 15, biganjemo abo muri Leta Zunze Ubumwe za Amerika, u Buhinde na Brazil, mu gihe abo imaze guhitana bo bagera ku bihumbi 640.

Umuyobozi wa OMS Dr Tedros yasabye abatuye Isi kwigengesera mu byo bakora nk'abahitamo hagati y'urupfu n'ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .