Imikino y’iri tsinda yari imaze icyumweru ibera i Cairo mu Misiri, aho yitabiriwe na Al Ahly yo mu Misiri, Al Ahly Benghazi yo muri Libya, Bangui SC yo muri Centrafrique ndetse na City Oilers y’i Bugande.

Bitandukanye n’imyaka itatu ishize, kuri iyi nshuro iri rushanwa ryakinwe mu buryo bw’umukino ubanza ni uwo kwishyura. Mu mikino ya nyuma yakinwe, Al Ahly Benghazi yatsinze City Oilers amanota 110-78, Al Ahly yo mu Misiri itsinda Bangui SC amanota 94-71.

Muri rusange muri iri tsinda hakinwe imikino itandatu yasojwe Al Ahly yo mu Misiri iyoboye nyuma yo gutsindamo itanu, igatsindwamo umwe. Al Ahly Benghazi yatsinze itatu, itsindwa indi iri ku mwanya kabiri.

Bangui SC iri ku mwanya wa gatatu, yatsinze imikino itatu, itsindwa indi, mu gihe City Oilers iri ku mwanya wa nyuma yatsinzwe imikino itanu, itsinda umwe.

Bivuze ko amakipe abiri ya mbere yabonye itike yo kuzakina imikino ya nyuma izabera i Kigali tariki 24 Gicurasi kugeza 1 Kamena 2024.

Ni mu gihe Bangui SC ya gatatu igomba gutegereza umwanya umwe usigaye mu zabaye iza gatatu nziza ariko ni nyuma ya Sahara Conference.

Iyi Sahara niyo igiye gukurikira kuko iteganyijwe tariki 4 kugeza 12 Gicurasi 2024 i Dakar muri Sénégal.

Ni itsinda Abanyarwanda bahanze amaso cyane kuko niryo APR BBC izaserukamo aho iri kumwe na US Monastir yo muri Tunisia, Rivers Hoopers yo muri Nigeria na AS Douanes yo muri Sénégal.

Kugeza ubu amakipe atanu mu munani niyo amaze kubona itike yo kuzitabira imikino ya nyuma izabera i Kigali. Ayo ni FUS Rabat yo muri Maroc, Petro de Luanda yo muri Angola, Al Ahly yo mu Misiri, Al Ahly Benghazi na Cape Town Tigers yo muri Afurika y’Epfo.