Iki ni igice cya mbere gikomeza uruhererekane rw’inyandiko zanjye zabanje, aho ngerageza gutanga ibitekerezo ku bijyanye n’icyo bisaba kugira ngo ikipe y’umupira w’amaguru ibe club nyayo.

Mperutse gukurikira ikiganiro ku rubuga rwa Doha Debates cyibandaga ku kibazo gikora ku mutima w’icyo umupira w’amaguru usobanuye mu isi ya none. Ikibazo abantu b’ingeri zitandukanye bagarutseho cyari iki: “Abafana b’umupira w’amaguru: ni abafatanyabikorwa cyangwa ni ibicuruzwa?”

Ese koko ikibazo cya ruhago yacu ni uko hari byinshi bitagenda, cyangwa ikibazo ni uko twamaze kugira umuco wo kubona ibitagenda gusa?

Nyuma y’umukino wahuje APR FC na Les Aigles du Congo i Lubumbashi, muri Repubulika Iharanira Demokarasi ya Congo, waranzwe n’ibintu bidasanzwe, nagize igitekerezo cyo kugaruka ku mateka y’indi mikino mpuzamahanga amakipe yo mu Rwanda, ndetse n’Ikipe y’Igihugu Amavubi, yagiye akina, aho kwibanda gusa ku byabereye mu kibuga, ahubwo nkagaruka no ku bibazo byagiye biyiranga, birimo imisifurire, imyitwarire y’abakinnyi n’abayobozi, ingendo zigoranye, umutekano, politiki n’imibanire hagati y’ibihugu.

Ikipe ya Rayon Sports yavukiye i Nyanza mu 1968 ni imwe mu makipe yavutse bwa mbere nyuma y’aho amakipe y'umupira w'amaguru yari asanzwe mu Rwanda, yari yarasenywe n'impinduka za politiki zabaye guhera mu mpera za 1959. Izi mpinduka zagize ingaruka zikomeye ku bantu ku giti cyabo, ku buyobozi bw’u Rwanda no ku gihugu muri rusange.