U Bwongereza: Ubushakashatsi bwagaragaje ko Guma mu rugo yatumye hari abagira amasura ashaje

Yanditswe na Ishimwe Alain
Kuya 25 Kanama 2020 saa 07:59
Yasuwe :
0 0

Ubushakashatsi bushya bwakozwe n’Ikigo cyo mu Bwongereza kizobereye mu buvuzi budasaba kubaga, Glowday bwerekana ko gahunda ya Guma mu rugo yashyizweho mu rwego rwo kwirinda COVID-19 yatumye impu z’abantu zisaza kurenza uko byari bimeze.

Ubu bushakashatsi bwakorewe ku bagore 2000 bwo mu Bwongereza, bwerekanye ko 27% by’abagore bose bo muri iki gihugu biyumva nk’aho uruhu rwabo rwo mu maso rwashaje mu bihe bya guma mu rugo.

Muri ubu bushakashatsi abagore benshi bemezaga ko mu maso habo hashobora kuba harashaje ni abari hagati y’imyaka 25 na 34, kandi koko inzobere zakoze ubu bushakashatsi byaje kurangira zemeje ko abagera kuri 40% by’aba bagore bose bashaje mu maso mu bihe bya Guma mu rugo.

Umuyobozi wa Glowday, Hannah Russell, avuga ko uku gusaza k’uruhu biturutse kuri Covid-19 gushobora kuba kwaratewe n’ibikorwa bitandukanye bisanzwe byangiza uruhu abantu bakoze mu bihe bya Guma mu rugo.

Yagize ati “Guma mu rugo yatumye duhindura imyitwarire yacu. Twaretse kwita ku ruhu rwacu kandi ku bantu benshi birashoboka ko twagiye tunywa byinshi, turya ibiryo byoroheje. Ku bantu bafite abana bo bakora ibintu byinshi kugira ngo babiteho bikabatera umunaniro, kandi birashoboka ko batabona umwanya uhagije wo kuruhuka neza, ibi byose bituma dushobora kugaragara nk’abashaje."

Hannah yakomeje avuga ko kuba abantu baragize igihe kinini cyo kureba televiziyo bishobora kuba biri mu byatumye bagaragara nk’abashaje ku ruhu.

Ati “Byongeye kandi twakoresheje igihe kinini turi kureba televiziyo zacu kandi ishusho igaragara ya televiziyo ica mu rumuri rw’ubururu, iyo umuntu amaze igihe kirekire imbere y’urwo rumuri uruhu rwe rurangirika, bituma rusaza.”

Indi mpamvu itangwa n’umuyobozi w’iki kigo cyakoze ubu bushakashatsi yatumye impu z’abantu basaza mu bihe bya COVID-19, ni uko batagize umwanya wo kwita ku ruhu rwabo nk’uko babikoraga igihe babaga bagiye mu kazi cyangwa se gutembera.

Ubushakashatsi bwakozwe na Glowday bwerekana ko hari abantu bashaje uruhu rwo mu maso mu bihe bya Guma mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .