00:00:00 IGIHE NETWORK KN KINYARWANDA EN ENGLISH FR FRANCAIS

Wubatse mu buryo butangiza ibidukikije: Imbamutima z’abitegura gutuzwa mu Mudugudu w’Icyitegererezo i Gicumbi

Yanditswe na Israel Ishimwe
Kuya 30 June 2022 saa 07:18
Yasuwe :

U Rwanda rwashyize imbaraga muri gahunda zigamije kubaka ubukungu butangiza ibidukikije. Ni urugendo rukora mu mfuruka zose z’ubuzima bw’igihugu n’abagituye.

Mu cyerekezo cy’igihugu cyo gutuza abaturage neza, imidugudu y’icyitegererezo ni imwe mu nzira yatekerejweho na Leta y’u Rwanda.

Aha ni ho imiryango itishoboye, ituye mu manegeka ihurizwa, ikegerezwaho ibikorwaremezo ikenera umunsi ku wundi.

Mu gihe cya none, izi nyubako ntizizamurwa gutyo gusa, ahubwo hari ibyibandwaho mu kubaka ubudahangarwa bwazo ndetse n’ubw’abazituye bijyanye n’aho Isi igeze ndetse n’ibibazo ifite birimo n’imihindagurikire y’ibihe.

Nko mu Karere ka Gicumbi hari kubakwa Umudugudu w’Icyitegererezo wa Kabeza, biteganyijwe ko uzatuzwamo imiryango 40.

Uyu mudugudu uherereye mu Kagari ka Nyamiyaga mu Murenge wa Rubaya. Wubatswe n’Umushinga Green Gicumbi wita ku “Kubakira ubudahangarwa abaturage bo mu Ntara y’Amajyaruguru no guhangana n’ingaruka zikomoka ku mihindagurikire y’ibihe.” Uyu mushinga ushyirwa mu bikorwa n’Ikigega cy’Igihugu cy’Ibidukikije (FONERWA) ku nkunga y’Ikigega cy’Isi cyita ku mihindagurikire y’Ibihe (GCF).

  Abatoranyirijwe gutuzwamo baranyuzwe!

Ku ikubitiro, imiryango yo mu Tugari twa Nyamiyaga, Gishambashayo na Gihanga two mu Murenge wa Rubaya iri mu cyiciro cya mbere n’icya kabiri cy’ubudehe yari ituye ahashobora gushyira ubuzima bw’abayigize mu kaga ni yo yatekerejweho.

Mu buhamya bwabo, abaganiriye na IGIHE bavuga ko ubuzima bwari bugoye kuko bari batuye ahantu hahanamye ndetse kugera kuri serivisi z’ibanze bikagorana cyane.

Uwanyirigira Sophia ni umwe muri abo baturage. Avuga ko aho bari batuye ari mu misozi ku buryo mu gihe cy’imvura, amazi yabasenyeraga.

Ati “Mu mwaka washize hari igihe imvura yaguye iradusenyera, turimuka tujya gucumbika mu baturanyi.’’

Uyu mubyeyi w’umwana umwe yavuze ko bishimiye inzu bubakiwe mu Mudugugu w’Icyitegererezo wa Kabeza, kuko bagiye gutura neza ndetse ubuzima bwabo bukazahinduka.

Ati “Tuzatura ahantu tuzajya twisanzura tuganire. Ni ahantu hegereye amashuri, abana bacu bazajya bagerayo bitabagoye. Ubundi bakoreshaga amasaha nk’abiri bagenda n’amaguru.’’

Yavuze ko no kujya kwa muganga byabagoraga kuko bakoreshaga amasaha nk’atatu ngo bagere ku bitaro.

Yakomeje ati “Ubu ho tuzatuzwa hegereye ahari ivuriro rito [Girubuzima Health Post Nyamiyaga]. Biroroshye no kwivuza.’’

Muhayimana Samuel na we yavuze ko, usibye kuba aho batuye ari mu manegeka, hatari n’umuriro ndetse amazi meza kuyageraho bisaba urugendo rurerure.

Yagize ati “Hari ahantu hagoye ku buryo umubyeyi kuguha agasambu ko guturamo na bwo yaguhaga ahantu habi. Yabonaga byazana umwiryane.’’

Umudugudu w’Icyitegererezo wa Kabeza mu Karere ka Gicumbi wahawe ubushobozi bwo gutuzwamo imiryango 40

  Kuri Muhayimana, ibuye rimwe ryishe inyoni ebyiri

Muhayimana ufite abana batatu ni umwe mu bazatuzwa mu mudugudu ndetse yanahawe akazi mu kuwubaka.

Avuga ko nyuma yo gutoranywa mu bahawe akazi yaruhutse ingendo yakoraga ajya gushaka ibiraka hirya no hino kugira ngo abashe gutunga umuryango we.

Ati “Narabyishimiye cyane. Ubu buri minsi 15 mbona 22.500 Frw.’’

Yavuze ko ubu abana be bishimiye kwegera ishuri ndetse batazongera kugorwa n’ingendo. Ati “Imibereho iba ari myiza, urara ahantu heza.’’

Bitandukanye n’indi midugudu, uwa Kabeza abaturage bazawutuzwamo ntibigeze bagurirwa ubutaka bwabo, barimuwe ndetse bazakomeza kububyaza umusaruro binyuze mu buhinzi.

Umukozi ushinzwe Ubwubatsi mu Mushinga Green Gicumbi, Dusabimana Fulgence, yavuze ko batekereje ku buzima bw’umuturage mu guhangana n’imihindagurikire y’ibihe n’ingaruka zabyo.

Yagize ati “Mu gutuza abaturage twarebye kuri bamwe baturiye utugari twa hafi ku buryo bazakomeza kuba hafi y’aho bari batuye kugira ngo binaborohereze gukomeza kubyaza umusaruro amasambu yabo.’’

Yasobanuye ko iki kizakuraho imbogamizi zaterwaga no kuba abaturage batuzwa kure y’aho bimuwe bikagira ingaruka mu buzima bwabo no kumenyera aho bimuriwe.

Umuyobozi w’Umushinga Green Gicumbi, Jean Marie Vianney Kagenza, asobanura ko kubakira abagizweho ingaruka n’imihindagurikire y’ibihe bikubiye muri gahunda yagutse y’uyu mushinga yo gufasha abatuye Akarere ka Gicumbi kubaka ubudahangarwa mu guhangana n’ingaruka z’imihindagurikire y’ibihe, cyane ko aka karere kari mu twa mbere twibasirwa cyane.

Yagize ati ‘‘Kuri ubu tumaze kuzuza Umudugugu wa Kabeza, uzatuzwamo imiryango 40. Muri gahunda y’umushinga, turateganya kubakira imiryango hose hamwe 200. Iki ni kimwe mu bikorwa bitandukanye Green Gicumbi ikomeje gukora mu gufasha abatuye aka karere kudahungabanywa n’ingaruka zikomoka ku mihindagurikire y’ibihe.’’

  Imiterere y’umudugudu wubatse mu buryo butangiza ibidukikije

Umudugudu wa Kabeza wubatse mu buryo butangiza ibidukikije. Uhereye ku nyubako ubwazo n’ibikoresho byifashishwijwe mu kuzizamura birimo amatafari n’isakaro, ibikorwa bijyanye no gufata amazi y’imvura akomoka ku bisenge kimwe n’atemba, byose byatekerejweho muri uwo murongo.

Dusabimana Fulgence ati “Byose bigamije kudakoresha amatafari batwitse barimo kwangiza amashyamba kandi nk’umushinga turimo kuyasazura. Dukorana n’abantu bakora bizwi n’amategeko, bafite gahunda yo gusubiranya ’ibishanga bakuramo ibumba, badatwikisha ibiti.’’

“Amabati twakoresheje muri uyu mudugudu na yo afasha mu gusubiza urumuri rwinshi mu kirere ku buryo mu nzu hahora hahehereye.’’

Umushinga Green Gicumbi kandi wateganyije ko amashanyarazi azakoreshwa harimo n’akomoka ku mirasire y’izuba.

Yakomeje ati “Amatara yo ku mihanda yo akoresha imirasire y’izuba. Twashatse uko tubihuza amashanyarazi angana na 70% mu gihe akomoka ku mirasire y’izuba angana na 30%. Abaturage bo bazakoresha amashanyarazi akomoka ku muyoboro mugari.’’

Ku myubakire kandi uyu mudugudu uri ku buso bwa hegitari 4,8. Ubwiherero bwashyizwemo bufite uburyo umwanda utunganywa ukabyazwamo ifumbire.

Umudugudu w’Icyitegererezo wa Kabeza kandi ufite uburyo bwo gufata amazi akoreshwa ndetse n’ayanduye akayoborwa neza ku buryo atateza isuri.

Hubatswe ibigega bitandatu bifite metero kibe 600. Ibi bigega byo munsi y’ubutaka byubakishijwe isima isanzwe biyoborera amazi ahantu hamwe akaba ari ho atunganyirizwa mbere yo koherezwa mu matiyo ayajyana mu baturage.

Dusabimana yakomeje ati “Ya mazi make yanyuze mu miferege mu gihe cy’imvura hari ikigega cya metero kibe 500 kiyafata, ihuzwa n’ahari icyobo cyacukuwe ku buryo igihe yuzuye hazajya harekurwa amazi make cyane gahoro gahoro aho kugira ngo agendere rimwe abe yateza isuri ku misozi cg umwuzure mu gishanga cya Mulindi.’’

Muri uyu mudugudu kandi hanateganyijwe ikiraro cy’inka zizorozwa abaturage bazaba batuye muri uyu mudugudu. Hafi yacyo hari ikigega gishobora kujyamo litiro z’amazi ibihumbi 45, nibura gishobora kumara imyaka 30.

Usibye inka, hazatangwa andi matungo magufi. Ifumbire azajya atanga ni yo izajya yifashishwa mu turima tw’igikoni twatewemo imbuto n’imboga.

Hanateganyijwe kubakwa ‘green houses’ zizahingwamo ibihingwa ndetse abawutujwemo bazahabwa imbabura zirondereza ibicanwa.

Imyubakire yawo yahaye umwihariko kubungabunga ibidukikije no gukura ubuzima bw’abaturage mu kaga. Inzu zigize uyu mudugugu zirimo n’amagorofa zubatse mu buryo imiryango ibiri ishobora kuba mu nyubako imwe (2-1) cyangwa imiryango ine igatuzwa mu nzu imwe (4-1).

Inyubako zo mu Mudugudu wa Kabeza zasakajwe amabati adatuma urumuri ruhita ahubwo mu nzu hahora hahehereye. Ubu nabwo ni uburyo bwo kubaka ubukungu butangiza ibidukikije
Umudugudu w'Icyitegererezo wa Kabeza watanze akazi ku baturiye aho wubatswe. Guhanga no gutanga akazi ni imwe mu nyungu abaturage bakura mu Mushinga wa Green Gicumbi
Hagati y'inzu n'indi hashyizwemo uturima tw'igikoni tuzahingwamo imboga n'imbuto
Izi nyubako zubakishijwe amatafari yatunganyijwe hifashishijwe ibikoresho bitangiza ibidukikije
Imirimo ya nyuma yo kubaka uyu mudugudu irarimbanyije mbere y'uko abaturage bayituzwamo
Iki cyobo kizajya cyifashishwa nk'ahajya umwanda wo mu bwiherero, nihuzura hazajya hafungwa wa mwanda uterwemo imiti yatuma ubyazwamo ifumbire igakoreshwa mu buhinzi
Ubwiherero bwose buzajya bucanirwa n'imirasire y'izuba
Buri nzu ifite ubwiherero bwo mu nzu n'ubwo hanze, umuturage ni we uhitamo aho akoresha bitewe n'ubushobozi bwe
Hacukuwe ibyobo bizifashishwa mu gutega amazi no kugabanya ubukana ashobora kumanuka afite umuvumba akaba yateza isuri
Umudugudu wa Kabeza wubatse ku butaka buri ku buso bwa hegitari 4,8
Muhayimana Samuel ari mu bungukiye mu iyubakwa ry'Umudugudu wa Kabeza mu Karere ka Gicumbi. Yahawe akazi ko kubaka ndetse ni umwe mu bazatuzwa neza
Uwanyirigira Sophia yavuze ko aho bari batuye ari mu misozi ku buryo mu gihe cy’imvura, amazi yabasenyeraga ariko ubu bakaba bagiye gutuzwa neza
Umudugudu w'Icyitegererezo wa Kabeza wubatse hafi y'Ivuriro rito [Girubuzima Health Post Nyamiyaga] aho abaturage bavurirwa
Umuriro ukomoka ku mirasire y'izuba ni wo uzifashishwa mu gucanira amatara yo ku muhanda
Umudugudu wa Kabeza mu Karere ka Gicumbi uzatuzwamo imiryango 40
Umuriro wose uzakoreshwa muri uyu mudugudu, ungana na 30% uzaba ukomoka ku mirasire y’izuba
Amazi ava ku nzu azajya yayoborewe mu bigega, aho azajya avanwa akayungururwa mbere yo guhabwa abaturage agatangira gukoreshwa imirimo ya buri munsi

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .