Urwego rwasigariyeho ICTR rwatanze icyizere ku makuru ya ba ruharwa bakurikiranyweho Jenoside barimo Kabuga

Yanditswe na Evariste Nsengimana
Kuya 19 Nyakanga 2019 saa 03:14
Yasuwe :
0 0

Umushinjacyaha w’Urwego rwasigariyeho Inkiko Mpuzamahanga Mpanabyaha, IRMCT, Serge Brammertz, yatangaje ko rufite amakuru yizewe yerekeye aho ba ruharwa umunani barimo Kabuga Félicien, bakurikiranyweho uruhare muri Jenoside yakorewe Abatutsi bihishahisha.

IRMCT yashyizweho n’Umuryango w’Abibumbye, ihabwa inshingano zo gukurikirana no gucira imanza abakekwaho uruhare muri Jenoside yakorewe Abatutsi mu 1994, byakorwaga n’ Urukiko Mpuzamahanga Mpanabyaha rwari rwarashyiriweho u Rwanda (ICTR).

Brammertz yabwiye Akanama ka Loni gashinzwe Umutekano ku wa Gatatu ko basabye ibihugu byinshi binyamuryango mu gushaka imikoranire izatuma ba ruharwa bakurikiranyweho uruhare muri Jenoside bafatwe ariko nta kiragerwaho.

Uyu mushinjacyaha wirinze gutangaza amazina y’ibihugu bihishemo n’ibibangamira ifatwa ryabo yagize ati “Hari imbogamizi nyinshi mu mikoranire y’ibihugu zigira ingaruka ku rwego rwacu kugira ngo bafatwe.”

Mu bantu umunani bakurikiranyweho uruhare mu gutegura no gushyira mu bikorwa Jenoside yakorewe Abatutsi, batatu bafatwa nka ruharwa kurusha abandi nibo IRMCT yahawe kuburanisha igihe baba bafashwe naho batanu basigaye bakaburanishwa n’u Rwanda.

Muri abo batatu barimo Kabuga wari umucuruzi ukomeye mu gihe cya Jenoside yakorewe Abatutsi, akurikiranyweho gutera inkunga umugambi wo kuyishyira mu bikorwa ndetse yari mu banyamigabane ba Radio RTLM yagize uruhare rukomeye mu kubira urwango mu Banyarwanda no gushishikariza abantu kwica.

Abandi ni Bizimungu Augustin wari Minisitiri w’Ingabo muri Leta yateguye ikanashyira mu bikorwa Jenoside na Mpiranya Protais wari Umuyobozi w’Umutwe wari ushinzwe kurinda Perezida n’abandi bayobozi bakuru b’igihugu.

Abandi batanu baramutse bafashwe bakoherezwa mu Rwanda barimo Kayishema Fulgence, Munyarugarama Pheneas, Ndimbati Aloys, Ryandikayo Charles na Sikubwabo Charles.

Brammertz yavuze ko bigaragara ko hari ibihugu bimwe bidashyira imbere ubufatanye bugamije guta muri yombi abo bakekwaho uruhare muri Jenoside ngo bashyikirizwe ubutabera uretse Afurika y’Epfo ku wa 16 Nyakanga yabugaragaje mu gihe ukurikiranywe azakandagira ku butaka bwayo.

Itangazo ry’uhagarariye u Budage mu Kanama ka Loni gashinzwe Amahoro risaba ko ibihugu bishyiraho amategeko agamije guta muri yombi no gushyikiriza ubutabera abo bantu umunani bakekwaho kugira uruhare muri Jenoside.

Leta Zunze Ubumwe za Amerika iheruka gushishikariza abantu gutanga amakuru azatuma abakurikiranyweho ibyaha bifitanye isano na Jenoside yakorewe Abatutsi n’ibyibasiye inyokomuntu, bafatwa, ishyiraho igihembo cya miliyoni 5$.

Ambasaderi w’u Rwanda mu Muryango w’Abibumbye, Rugwabiza Valentine, yasabye ko ibihugu bigira uruhare mu gufasha IRMCT kugira ngo abo bantu bashyikirizwe ubutabera.

U Rwanda rumaze kohereza impapuro zisaga 1000 zisaba guta muri yombi abantu bakekwaho kugira uruhare muri Jenoside yakorewe Abatutsi bihishe mu bihugu bisaga 34.

Ambasaderi Rugwabiza yongeye gusaba ko Dr Vincent Bajinya, Emmanuel Nteziryayo, Munyaneza Charles, Celestine Ugirashebuja na Mutabaruka Célestin bakidegembya mu Bwongereza batabwa muri yombi bagashyikirizwa ubutabera.

Muri Mata 2019, Umushinjacyaha mukuru w’u Rwanda, Mutangana Jean Bosco, yavuze ko Leta yiteguye gutanga ubufasha bwose bushoboka ku Bwongereza kugira ngo abo bantu bidegembyayo bashyikirizwe ubutabera.

Rugwabiza ati “Turasaba nanone ko Kayishema Fulgence uba muri Afurika y’Epfo afatwa akaburanishwa. Uyu ubushinjacyaha bwasabye inshuro nyinshi ubufatanye ngo afatwe ariko kugeza uyu munsi ntacyo buratanga.”

Yakomeje avuga ku birego bimaze igihe by’abakekwaho kugira uruhare muri Jenoside yakorewe Abatutsi bari mu Bufaransa barimo Dr Munyemana Sosthène, Dr. Rwamucyo Eugène, Dr. Bivugababo Marcel na Dr Twagira Charles, bakeneye kwitabwaho bigizwemo uruhare n’ubuyobozi bw’icyo gihugu.

Brammertz yavuze ko urwego ahagarariye rufite amakuru akomeye kuri ba ruharwa ba Jenoside barimo Kabuga ariko ibihugu bimwe bibangamira ifatwa ryabo
Kabuga Félicien uri mu bagize uruhare muri Jenoside yakorewe Abatutsi mu 1994 amaze igihe ahigwa ariko kumufata byarananiranye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza