Urwego rw’Umuvunyi rugiye kongererwa inshingano zo gukemura amakimbirane ashingiye kuri serivisi z’imari

Yanditswe na Nkurunziza Ferdinand
Kuya 11 Gashyantare 2020 saa 08:20
Yasuwe :
0 0

Abadepite bagize Komisiyo y’Ubukungu n’Ubucuruzi mu Nteko Ishinga Amategeko y’u Rwanda bari gusuzuma umushinga w’itegeko riteganya kongerera Urwego rw’Umuvunyi inshingano zo gukemura amakimbirane yakomotse ku bibazo bishingiye kuri serivisi z’imari.

Uyu mushinga w’itegeko wateguwe na Guverinoma, uteganya ko Urwego rw’Umuvunyi ruhabwa ububasha rutari rusanganywe bwo gukemura amakimbirane yagaragaye hagati y’urwego rutanga serivisi z’imari n’umuntu warugannye mu gihe batabashije kumvikana ku bibazo ibyo aribyo byose bishingiye kuri serivisi yahawe.

Nyuma y’impaka zishingiye ku kuvugurura ingingo ziri muri uwo mushinga w’itegeko, Urwego rw’Umuvunyi rwagaragaje impungenge z’umubare w’abakozi barwo ukiri muto nyamara hari inshingano rugiye kongererwa.

Umuvunyi Mukuru, Murekezi Anastase, wari watumijwe na Komisiyo y’Ubukungu n’Ubucuruzi mu Nteko ntiyashimye kugira icyo atangariza itangazamakuru kuri uwo mushinga w’itegeko kubera ko rikiri kunononsorwa.

Perezida wa Komisiyo y’Ubukungu n’Ubucuruzi mu Nteko Ishinga Amategeko, Munyangeyo Théogène, yavuze ko impamvu nyamukuru yatumye batumiza Urwego rw’Umuvunyi, ari ukugira ngo banoze umushinga w’itegeko rireke kurengera abaguzi ba serivisi z’imari kuko ari itegeko ryaguye rireba abaturage cyane kandi rikazahindura uko abantu bari basanzwe baruzi.

Ati “Ubundi umuvunyi yinjiraga mu bibazo byananiranye mu zindi nzego, ariko noneho mu buryo Guverinoma yabitekerejemo, ni uko umuvunyi yajya yinjira mu gukemura amakimbirane yagaragaye hagati y’umuntu waguze serivisi z’imari n’urwego rwayimuhaye.”

Depite Munyangeyo yakomeje avuga ko uyu mushinga w’itegeko ukwiye kwigwaho neza kugira ngo utazaba imbarutso yo gutuma abantu benshi bagana Urwego rw’Umuvunyi kubera ibibazo byari bikwiye kuba byakemukira mu zindi nzego.

Uyu mushinga w’itegeko uteganya ko abatanga serivisi z’imari nk’amabanki n’ibigo bitanga ubwishingizi basabwa kuzajya basobanurira ku buryo buhagije ababagana aho bashobora kugeza ibibazo byabo mu gihe byananiranye hagati yabo, bakagaragazamo n’Urwego rw’Umuvunyi nka rumwe mu zikwiye kugezwaho ikibazo cyabyaye amakimbirane, mbere yo kugana inkiko.

Urwego rw’Umuvunyi rwasabye ko mu gihe iri tegeko ryakwemezwa, rwahabwa undi mukozi (Umuvunyi Wungirije) wihariye ushinzwe kwita ku makimbirane yatewe no kutumvikana hagati y’ikigo n’umukiliya wacyo kuri serivisi z’imari.

Abadepite bagaragaje ko uyu mushinga w’itegeko numara kunononsorwa, ukanemezwa, bizafasha guteza imbere serivisi z’imari zihabwa umuturage.

Mu Rwanda hasanzwe hari Ikigo gishinzwe iyubahirizwa ry’amategeko arengera umuguzi [Rwanda Inspectorate, Competition, and Consumer Protection Authority (RICA)], cyashyizweho mu 2017, nyuma yo gusanga hari amategeko menshi abogamye kandi umuguzi ntamenye ko harimo ikibazo kuko atanayazi.

Ibikoresho by’ikoranabuhanga biza imbere mu bituma serivisi z’imari zizamo ibibazo hagati y’ibigo bizitanga n’umuguzi wazo. Muri ibyo bikoresho by’ikoranabuhanga ry’ubwenge harimo ibyifashishwa muri serivisi zitandukanye nko mu itumanaho, internet, guhererekanya amafaranga, kubitsa no kubikuza amafaranga hakoreshejwe ikarita (ATM), kwishyura ingendo (Tap&Go) n’ibindi.

Mu gusesengura no kunoza umushinga w’itegeko rirengera umuguzi wa serivisi z’imari, hari hatumiwe Minisiteri y’Imari n’Igenamigambi (MINECOFIN) na Banki Nkuru y’u Rwanda, igenzura ibigo by’imari bikorera mu gihugu.

U Rwanda ni kimwe mu bihugu byo ku Mugabane wa Afurika bifatwa nk’ibiteza imbere uburenganzira bw’umuguzi ku rugero rushimishije kuko rwashyizeho amategeko amurengera ndetse rukaba runateza imbere ubucuruzi bwifashisha ikoranabuhanga.

Abadepite bagize Komisiyo y’Ubukungu n’Ubucuruzi mu Nteko Ishinga Amategeko y’u Rwanda batangiye gusuzuma umushinga umushinga uzaha Urwego rw’Umuvunyi inshingano zo gukemura amakimbirane ashingiye kuri serivisi z’imari
Visi Perezida wa Komisiyo y'Ubukungu n'Ubucuruzi, Depite Uwamariya Odette
Perezida wa Komisiyo y’Ubukungu n’Ubucuruzi mu Nteko Ishinga Amategeko, Munyangeyo Théogène, atanga igitekerezo
Umuvunyi Mukuru Murekezi Anastase yasabye ko urwego ayoboye rwakongererwa abakozi nyuma yo guhabwa inshingano nshya
Urwego rw’Umuvunyi rugiye kongererwa inshingano zo gukemura amakimbirane ashingiye kuri serivise z’imari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .