Urukiko rugiye gusuzuma ubusabe bwo kohereza Kabuga i La Haye

Yanditswe na Uwimana Abraham
Kuya 15 Ukwakira 2020 saa 10:57
Yasuwe :
0 0

Umucamanza Iain Bonomy w’Urwego rwasigariyeho Inkiko Mpuzamahanga Mpanabyaha, IRMCT, yasabye ko bitarenze ku wa 16 Ukwakira 2020, ubwanditsi bw’uru rwego ruba rwamaze gusohora inyandiko izashingirwaho harebwa ko ubusabe bwo kutohereza Kabuga Félicien kuburanira i Arusha bwakubahirizwa.

Mu nyandiko yasohoye ku wa Kabiri, Iain Bonomy, uhagarariye itsinda ry’abacamanza batatu bashyiriweho gukurikirana iki kirego, yasabye ko ubwanditsi bw’uru rwego bubanza gutanga inyandiko igaragaza uko Kabuga yaba abayeho ajyanywe i Arusha ugereranyije n’uko yaba abayeho ajyanywe i La Haye.

Yavuze ko iyi nyandiko igomba kugereranya Arusha na La Haye, aho yazaba afungiwe, uburyo ubuzima bwe buzaba bwitaweho anahabwa ubuvuzi bukwiye hashingiwe kuri raporo y’uko ubuzima bwe buhagaze yatanzwe n’umwavoka we, n’uburyo ikwirakwira rya COVID-19 rihagaze muri Tanzania ugereranyije no mu Buholandi.

Ikindi ngo ni ukugereranya uburyo muri ibyo bihugu byombi, Tanzania n’u Buholandi, bifite ibikoresho bihagije byo kwita ku barwayi ba COVID-19 bakuze kandi basanzwe banafite ibindi bibazo by’ubuzima.

Iyi nyandiko kandi ngo igomba kuba igaragaza uburyo buhamye bwo kujyana Kabuga i Arusha n’uburyo azafungirwayo mu gihe n’irindi perereza rizaba rikomeje. Hakiyongeraho n’andi makuru yaba ari ingenzi y’ibishobora kuba imbogamizi ku buzima bwa Kabuga.

Ku itariki ya 5 Ukwakira 2020 nibwo umwavoka wa Kabuga yasabye ko yakoherezwa kuburanira i La Haye aho kuba i Arusha nk’uko umwanzuro w’Urukiko Rusesa Imanza rw’u Bufaransa wo ku wa 30 Nzeri 2020 wabivugaga.

Yanasabaga ko kohereza Kabuga i Arusha byaba biretse gukorwa kugeza igihe umwanzuro kuri ubu busabe uzasohokera.

Impamvu yatanze zirimo ngo kuba ubuzima bwa Kabuga budahagaze neza ndetse ko muri Tanzania nta ngamba zihamye zashyizweho zo kwirinda Coronavirus, bityo bikaba byashyira mu kangaratete ubuzima bw’uyu musaza usanzwe unafite ibibazo by’uburwayi.

Ku wa 6 Ukwakira, Ubushinjacyaha bwasohoye inyandiko ishyigikira ubusabe bwo kohereza Kabuga i La Haye kugira ngo akorerwe isuzuma ryigenga ry’uko ubuzima bwe buhagaze, harebwa niba uko buhagaze byamwemerera kuba yakoherezwa i Arusha muri Tanzania nta kibazo.

Tariki ya 8 Ukwakira 2020, nibwo Ubwanditsi bw’uru rwego bwahaye umugisha ubusabe bwo kohereza Kabuga i La Haye kugira ngo akorerwe isuzuma ry’uko ubuzima bwe buhagaze niba koko byatuma yoherezwa i Arusha.

Ku wa 29 Mata 2013, nibwo Urukiko Mpuzamahanga Mpanabyaha rwashyiriweho u Rwanda rwasohoye inyandiko zisaba itabwa muri yombi rya Kabuga Félicien ndetse ku wa 16 Gicurasi 2020 nibwo yatawe muri yombi afatiwe mu Bufaransa.

Kabuga Félicien w’imyaka 84 afatwa nk’uwabaye umuterankunga ukomeye wa Jenoside yakorewe Abatutsi mu 1994, aho mu Ugushyingo 1993, icyo gihe sosiyete ye yinjije mu gihugu toni 25 z’imihoro ivuye mu Bushinwa, nyuma muri Werurwe 1994 agura indi mihoro ibihumbi 50. Ni intwaro zakoreshejwe mu kwica Abatutsi muri Jenoside.

Uretse ibyo ashinjwa no kuba yari umwe mu banyamigabane bashinze radio RTLM, yagize uruhare rukomeye mu kubiba urwango mbere no mu gihe cya Jenoside.

Kabuga Félicien atanga impamvu z'ubuzima bwe budahagaze neza n'impungenge za Coronavirus muri Tanzania, asaba ko yaburanishirizwa i La Haye aho kuba i Arusha
Iain Bonomy uhagarariye itsinda rizaburanisha Kabuga yasabye ubwanditsi bw'urukiko gutanga inyandiko igaragaza ibyashingirwaho hafatwa umwanzuro niba Kabuga azoherezwa i Arusha cyangwa i La Haye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .