Uriya musoro urengeje urugero - Ingabire Immaculée avuga ku gusorera umutungo utimukanwa

Yanditswe na Tuyishimire Raymond
Kuya 22 Ukuboza 2020 saa 07:49
Yasuwe :
0 0

Umuyobozi w’Umuryango urwanya ruswa n’Akarengane, Transparency International Rwanda, Ingabire Marie Immaculée, yagaragaje impungenge ku izamuka ry’umusororo w’umutungo utimukanwa, avuga ko kuba waravuye ku mafaranga 80 kuri meterokare imwe ukagera kuri 300 ari uguhutaza umuturage.

Mu 2018, Leta yavuguruye itegeko rigenga umutungo utimukanwa mu Rwanda, riteganya ko umutungo utimukanwa (ubutaka n’inzu) uzajya wishyurirwa umusoro, aho kuba amahoro nk’uko byahozeho kuva mu 2012.

Mu Itegeko rishya, ibiciro byishyurwa ku misoro y’ubutaka kuri meterokare imwe byarazamuwe, bivanwa hagati y’amafaranga 0 Frw kugera kuri 80Frw, bishyirwa hagati ya 0 Frw na 300 Frw.

Mu kugena agaciro k’umusoro uzajya wishyurwa n’umudugudu runaka, hashingiwe ku ngingo eshatu, zirimo icyo ubutaka bugenewe gukoreshwa, urwego rw’iterambere ruri muri uwo mudugudu ndetse n’ibikorwaremezo biri mu mudugudu.

Umuyobozi wa Transparency International Rwanda, Ingabire Marie Immaculée, aganira na RBA yavuze ko hari abantu bafite ubushobozi buke bityo ko bizabagora kwishyura uyu musoro.

Ati "Nibemere ko uyu musoro urengeje urugero, ni ukwica umuturage. Umuntu udakora uyu munsi cyangwa afata agashahara kadafatika kandi aba mu rugo ndetse no kuri ubwo butaka uramwishyuza ibihumbi 200 si ukurengera cyane?”

Akomeza ati "Leta ikwiye gutekereza ku mibereho kuko iriya misoro irahenze cyane".

Mu kiganiro Perezida Kagame yagiranye n’abaturage hamwe n’abanyamakuru, Umuturage wo mu Mujyi wa Kigali yabajije Umukuru w’Igihugu ikibazo kuri uyu musoro maze Minisitiri w’Imari n’Igenamigambi, Dr Uzziel Ndagijimana, ahabwa umwanya ngo asobanure , yizeza ko impungenge z’abaturage zumviswe kandi zatangiye gusuzumwa.

Nubwo ari igisubizo gitanga icyizere ko umusoro ushobora kugabanywa, Perezida Kagame yibukije ko bitavuze kuvanaho umusoro burundu, gusa ashimangira ko hazubahirizwa ibibereye benshi mu baturage.

Ingabire Immaculée yasabye Guverinoma gutekereza ku baturage ikagabanya umusoro ku mutungo utimukanwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .