Umwihariko w’uturere dutandatu tubitse amateka y’Urugamba rwo Kubohora Igihugu (Amafoto)

Yanditswe na Nkurunziza Ferdinand
Kuya 23 Nyakanga 2020 saa 07:24
Yasuwe :
0 0

Amateka y’Urugamba rwo kubohora igihugu nyirizina atangirira ku mupaka wa Kagitumba mu Karere ka Nyagatare, aho Ingabo za RPA zinjiriye tariki ya 1 Ukwakira 1990.

Ni amateka abitse amasomo menshi ku kwibohora kw’Abanyarwanda, aho mu rwego rwo kuyamenyekanisha, mu 2018 Urwego rw’Igihugu rushinzwe Iterambere, RDB, ku bufatanye na Minisiteri y’Ingabo hatangijwe umushinga w’ubukerarugendo bukorerwa mu nzira z’urugamba rwo kubohora igihugu, rwabaye ku wa 1 Ukwakira 1990 - 4 Nyakanga 1994.

Ku ikubitiro ingabo za RPA ntizorohewe n’urugamba kuko mu gihe kitageze ku kwezi kumwe, abafatwaga nk’abayobozi barwo bose bishwe n’umwanzi.

Uwari Umugaba Mukuru, Gen Maj Fred Gisa Rwigema, yarashwe ku munsi wa Kabiri w’urugamba; Maj Chris Bunyenyezi na Maj Peter Bayingana baraswa n’ingabo za EX-FAR tariki ya 23 Ukwakira 1990.

Ibi byatumye Paul Kagame wari ufite ipeti rya Major, wari mu masomo ya gisirikare muri Leta Zunze Ubumwe za Amerika, agaruka bwangu ngo afatanye n’abandi kubohora igihugu cyari mu maboko y’ubutegetsi bubi; yasanze ibintu bitameze neza mu ngabo zari zakereye itabaro.

Bitewe no guhangana n’umwanzi wari ufite ibikoresho bikomeye kandi ashyigikiwe n’impande zose, yahise afata inshingano yo kuyobora bagenzi be, ategeka ko ingabo za RPA zisubira inyuma zikava mu bice by’Umutara zari zarigaruriye, birimo n’Ikigo cya Gisirikare cya Gabiro.

Mu kongera kwisuganya no gushaka amaboko mu banyamuryango ba RPF-Inkotanyi, Ingabo za RPA zateye umupaka wa Gatuna uri mu Karere ka Gicumbi, icyo gihe hari muri Perefegitura ya Byumba.

Gufata uyu mupaka byahesheje ingabo za RPA inzira izijyana Rubaya, zigarurira aka gace n’imisozi igakikije, zihashinga ibirindiro ndetse hahinduka icyicaro gikuru cya RPA/RPF-Inkotanyi.

Ibi kandi byatumye igitutu zari zaratewe na EX-FAR mu bice by’Akagera na Kagitumba kigabanuka, zibasha kubona inzira izerekeza mu bice by’Amajyaruguru y’u Rwanda, zinyuze mu yahoze ari Komini Muvumba, Kiyombe, Bungwe, Kivuye, Butaro, na Rwabutama, binjira mu Birunga.

Kwerekeza mu Birunga byakozwe mu rwego rwo guhindura amayeri y’intambara ndetse no kongera kwisuganya.

Hagati ya Gahinga na Muhabura niho hari ishyamba rinini ry’imigano, ari naho hakomotse izina ‘Mu Rugano’. Kuhagera kwa RPA byahise bitangiza igice cya kabiri cy’urugamba zari zaratangije kuri Leta ya Habyarimana n’abari bamushyigikiye, zihashinga ibirindiro kuko kuhihisha byari byoroshye.

Aha mu Rugano niho zaboneye umwanya wo gutegura ibitero shuma birimo icyo zagabye kuri Gereza ya Ruhengeri tariki ya 23 Mutarama 1991, zikabohoza abanyapolitiki bari bahafungiye.

Radio Muhabura yafashije RPA/RPF-Inkotanyi kugaragaza umurongo wayo n’impamvu yahisemo gutangiza urugamba rwo kubohora igihugu yashingiwe aha mu Birunga, ariko ikajya yimukana n’abayobozi b’urugamba aho babaga bimukiye hose.

Aha kandi ni naho Ingabo za RPA zavuye zijya kwigarurira agace kiswe “Agasantimetero” kari kagizwe n’ibice bya Tabagwe, Gishuro, Gikoba na Shonga mu Karere ka Nyagatare.

Ibirindiro bikuru bya mbere by’Inkotanyi ku buyobozi bwa Gen Maj Paul Kagame byashinzwe mu Rugano.

Urugendo ruca mu turere dutandatu dufite umwihariko ku mateka y’urugamba rwo kubohora igihugu, aritwo Nyagatare yatangirijwemo urugamba, kagakurikirwa na Gicumbi, Burera, Gakenke, Musanze na Gasabo, hakiyongera agace gato kabarizwa muri Rulindo […] rwatumye Leta ya Habyarimana ibona ko RPA ifite ingufu kandi hari icyo iharanira.

Akarere ka Gicumbi ko gafite umwihariko wo kuba ari ko kashinzwemo Icyicaro Gikuru cya RPA/RPF-Inkotanyi igihe kirekire mu gihe cy’urugamba, mbere yo kwimukira i Kigali, kuko mu gace ka Rubaya kari hagati y’imisozi, hari Kiliziya yakoreshejwe nk’ububiko bw’ibikoresho, ndetse hakavurirwa abasirikare bakomerekeye ku rugamba.

Muri Gicumbi kandi niho Radio Muhabura yakoreye igihe kirekire kuko yahazanywe ivuye mu Birunga, ishingwa ku musozi umwe wo mu Murenge wa Kaniga.

Muri uyu Murenge kandi niho hari uruganda rw’icyayi rwa Mulindi, inzu zarwo zakoreshejwe nk’icyicaro gikuru cya RPA/RPF-Inkotanyi kuva muri Kamena 1992 kugera ku wa 7 Mata 1994. Aha hari n’inzu y’ibyumba bitatu yari igenewe Gen Maj Paul Kagame gusa ndetse n’indaki ebyiri ze.

Aha ku Mulindi ni naho Ikipe ya APR yavukiye, hagamijwe kurema umubano ushingiye ku busabane n’imyidagaduro hagati ya RPA/RPF-Inkotanyi n’abandi Banyarwanda bakomokaga mu yandi mashyaka batari basobanukirwa neza imigabo n’imigambi bya RPF-Inkotanyi.

Akarere ka Musanze ko gafite umwihariko wo kuba ari ko karimo igice kinini cy’urugano rwafashije Inkotanyi kongera kwisuganya, zibasha gutegura ibitero shuma bitandukanye.

Akarere ka Burera nako gafite igice cy’Urugano rwabaye ubwihisho bukomeye bw’Inkotanyi ndetse mu gihe cy’igitero cyiswe icya ‘Le 08’ inzira zo muri Burera, Gakenke na Rulindo zifashishijwe mu gufunga inzira zose zihuza Ruhengeri ziturutse mu Mujyi wa Kigali na Byumba.

Akarere ka Gasabo ko gafite umwihariko wo kuba ari ko kubatsemo Ingoro y’Inteko Ishinga Amategeko, yitwaga CND mu gihe cyo kubohora igihugu, ikaba yaranacumbitsemo ingabo 600 za RPA mu rwego rwo kurinda abanyapolitiki bari barashyizwe muri guverinoma ihuriweho, nyuma yo kwemezwa kw’amasezerano hagati ya Leta ya Habyarimana na RPF-Inkotanyi.

Urwego rw’Igihugu rw’Iterambere (RDB), runafite ubukerarugendo mu nshingano, ruvuga ko rwatangiye umushinga wo kongera gusubizaho ibimenyetso bigaragaza amateka y’urugamba rwo kubohora igihugu ku buryo ba mukerarugendo bazajya basura aho bizashyirwa, bazajya bamenya neza uko rwagenze.

Bimwe mu bice bizashyirwamo ibirango by’ayo mateka ni ku Mulindi w’Intwari; ahakoreraga Radio Muhabura mu Murenge wa Kaniga; ahari Kiliziya yitiriwe Mutagatifu Sitefano mu Murenge wa Rubaya; ku Ruganda rw’Icyayi rwa Kinihira; mu Rugano hagati y’Ibirunga bya Gahinga na Muhabura n’ibindi bice bibitse amateka y’urugamba rwo kubohora igihugu.

Umuyobozi w’Ingoro y’Amateka y’Urugamba rwo Guhagarika Jenoside, Medard Bashana, avuga ko mu rwego rw’ubukerarugendo […] gusura ibice bitandukanye bibumbatiye amateka y’urugamba rwo kubohora igihugu bizaba inyongera ikomeye mu bukerarugendo bw’u Rwanda kuko abantu benshi bagaragaza inyota yo kumenya ayo mateka.

Ati “Twiteze ko imibare ya ba mukerarugendo izazamuka cyane […] mfashe urugero nko ku Ngoro y’Amateka y’Urugamba rwo guhagarika Jenoside, mu mezi atandatu ya mbere itaratahwa yashoboraga gusurwa n’abantu bari hagati ya 300 na 600 ku kwezi; ariko imaze gutahwa na Nyakubahwa Perezida wa Repubulika, imibare yikubye hafi inshuro 10."

Bashana ashimangira ko umushinga wo gushyira ibimenyetso by’amateka mu bice byihariye mu rugendo rwo kubohora igihugu bizaba n’imfashanyigisho ku rubyiruko […] ruzabasha kumenya amateka y’ukuri yaranze urugamba rwo kubohora igihugu no guhagarika Jenoside yakorewe Abatutsi mu 1994.

Inzira y’urugamba rwo kubohora igihugu izaba ireshya na kirometero 120 igakora ku turere dutandatu aritwo Nyagatare, Gicumbi, Gakenke, Musanze, Rulindo na Gasabo. Muri ibi bice abantu bazajya bahasura, bazajya batemberezwa ibi bice, basangizwe amateka y’urugamba rwo kubohora igihugu.

Ni uduce tuzatunganywa mu mushinga ubarirwa muri miliyari 4 Frw, zizakorwamo igishushanyo cya gihanga, kugura ubutaka, kubaka no kumenyekanisha ibikorwa, ukazakorwa mu byiciro bitatu guhera mu 2020-2024. Mu cyiciro cya mbere hazatunganywa ibice birimo Gikoba, Shonga na Mulindi, kizuzura mu 2021.

Nyagatare-Kagitumba

Igikorwa cya mbere gitangiza urugamba rwo kubohora igihugu cyabereye ku Mupaka wa Kagitumba, uri mu Karere ka Nyagatare, tariki ya 1 Ukwakira 1990
Kuri ubu, Umupaka wa Kagitumba waravuguruwe, hashyirwa ibikorwaremezo bigezweho

Gicumbi-Gatuna

Ku Mupaka wa Gatuna niho habaye inzira yatumye ingabo za RPA zoroherwa n'urugamba kuko byazigabanyirije igitutu zari zatewe na EX-FAR zibona n'uko zikomereza mu bice bitandukanye byo mu Majyaruguru y'Igihugu
Umupaka wa Gatuna na wo waravuguruwe ku buryo bubereye ijisho, mu rwego rwo korohereza abawukoresha bajya mu bihugu byo mu karere

Gicumbi-Rubaya

Muri iyi kiliziya ndetse n'ahandi hayikikije, Ingabo za RPA zahakoreshaga nk'ibirindiro bikuru bya RPA/RPF-Inkotanyi
Igice cya Rubaya cyakoreshejwe igihe kinini nk’ibirindiro bikuru by’Ingabo za RPA/RPF-Inkotanyi

Gicumbi-Kaniga

Ahakoreraga Radio Muhabura, hari hari indaki, na nubu zikigaragara
Indaki yakoreragamo Radio Muhabura ku Mulindi

Gicumbi-Mulindi

Inzu Gen Maj Paul Kagame yabagamo; ni naho habaye Icyicaro Gikuru cya RPA na FPR-Inkotanyi igihe kinini, mbere yo kwimukira i Kigali
Muri iki cyumba niho Gen Maj Paul Kagame yararaga
Muri iyi nzu niho Gen Maj Paul Kagame yahuriraga n'abandi basirikare bakuru
Ubusitani buri ku nzu Gen Maj Paul Kagame yahuriraga n'abandi basirikare bakuru
Kuri iki kibuga niho havukiye ikipe ya APR FC
Inzu yitiriwe Arusha, kubera ko ariho FPR na RPA babanzaga gukorera inama ku ngingo zikenewe mu gihe cy'imishyikirano
Iyi nyubako ni iyari igenewe abagore n'abakobwa bari bari mu bikorwa bitandukanye byo gushyigikira urugamba, barimo n'abasirikare
Nyuma yo kuvugurura iyi nzu, hazashyirwamo amashusho n'ibindi biranga amateka y'abagore barwanye urugamba rwo kubohora igihigu

Musanze-Rugano

Aha ni mu Rugano habaye ubwihisho bukomeye bw'Ingabo za RPA, zibasha no kuhategurira ibitero shuma bitandukanye
Umuyobozi w’Ingoro y’Amateka y’Urugamba rwo Guhagarika Jenoside, Medard Bashana, avuga ko mu rwego rw’ubukerarugendo […] gusura ibice bitandukanye bibumbatiye amateka y’urugamba rwo kubohora igihugu bizaba inyongera ikomeye mu bukerarugendo bw’u Rwanda

Musanze-Muhoza

Gereza ya Musanze (Ruhengeri) yagabweho igitero cyabohoye abanyapolitiki batavugaga rumwe na Leta ya Habyarimana

Gasabo-Kimihurura

Nyuma y'urugamba rwo guhagarika Jenoside yakorewe Abatutsi, inzu ikoreramo Inteko Ishinga Amategeko yari yarangijwe cyane, ariko ikomeza gukoreshwa; ubu yanashyizwemo igice kigaragaza amateka y'urugamba rwo guhagarika Jenoside
Ubu Inteko Ishinga Amategeko yaravuguruwe ku buryo bunogeye ijisho
Ku Nteko Ishinga Amategeko hari ibimenyetso bigaragaza ubutwari bw'Ingabo zari iza RPA zahagaritse Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .