Umushinga w’ikoranabuhanga muri SACCO watwaye arenga miliyari 2.3 Frw ntiwatanga umusaruro

Yanditswe na Evariste Nsengimana
Kuya 19 Nzeri 2019 saa 04:45
Yasuwe :
0 0

Abadepite bagize Komisiyo ishinzwe gukurikirana Imikoreshereze y’Umutungo wa Leta mu Nteko Ishinga Amategeko (PAC) batunguwe no kumva umushinga wo kwinjiza ikoranabuhanga muri za Sacco waratanzweho miliyari zisaga 2.3 Frw harimo imishahara ya miliyoni 970 Frw nyamara ntiwagira icyo ugeraho.

Babigarutseho kuri uyu wa 18 Nzeri 2019 ubwo ubuyobozi bw’Ikigo cy’Igihugu gishinzwe guteza imbere Amakoperative, RCA, bwitabaga PAC kugira ngo busobanure amakosa agaragara muri Raporo y’Umugenzuzi Mukuru w’Imari ya Leta y’umwaka wa 2017/18.

Iyo raporo yagaragaje ko uwo mushinga wo gukwirakwiza ikoranabuhanga muri za Sacco watanzweho amafaranga menshi, amwe nta byangombwa biyasobanura, andi ntagaragazwe n’ibindi kandi udakora no muri SACCO nibura imwe uretse ibikoresho bimwe birimo mudasobwa n’ibindi byaguzwe bimaze imyaka hafi ine bidakora.

Depite Niyorurema Jean René yagize “Hari amafaranga miliyari 2.3 Frw (2.306.233.551Frw) RCA yishyuye Ikigo cya FinTech International Ltd yo gukora umushinga wo kwinjiza ikoranabuhanga mu mirenge Sacco ariko ataragaragajwe uko yagendaga atangwa kandi umushinga wari urimo kunanirana.”

Umuyobozi Mukuru wa RCA, Prof Harerimana Jean Bosco, yavuze ko ayo mafaranga yishyuwe mu buryo bukurikije amasezerano yateganyaga uko uwo mushinga uzashyirwa mu bikorwa.

Ati “Ayo ni amafaranga agendanye n’ibikorwa FinTech yagiye ikora uko amasezerano yagiye atangira hari ibikorwa bagiye bakora tukabibishyurira. Twari twaragiye twumvikana ayo tubishyura bitewe n’icyiciro bagezeho.”

Perezida wa PAC, Depite Ngabitsinze Jean Chrysostome, yavuze ko ibyo bisobanuro bidahagije, asaba Ushinzwe Imari muri RCA gutanga ibindi bisonanuro.

Ati “Natubwire uko byagiye bigenda kuko ni amafaranga atari make kandi iyo tugeze hasi tubona ko yabaye impfabusa.”

Umuyobozi ushinzwe Imari muri RCA, Batamuriza Esther, yavuze ko FinTech ariyo yatsindiye isoko isaba ko ihabwa amafaranga angana na 10% by’umushinga wose n’amafaranga yishyuwe n’abaterankunga b’umushinga yabaye miliyari 2.3 Frw.

Depite Uwineza Beline yavuze ko ibyo RCA yakoze ntaho biganisha Abanyarwanda kuko harimo kudaha agaciro amafaranga.

Ati “Tubiziranyeho ko rya koranabuhanga muri Sacco ntaryakozwe, nta rihari. Ibintu byaguzwe muri ayo mafaranga ni ibihe? Aya mafaranga twakuyemo iki?”

Depite Uwimanimpaye Jean d’Arc we yagize ati “Urebye ibyo bavuze kuri raporo n’izi miliyari zishyuwe bakavuga ko umushinga utagezweho burundu, wadufasha ukatubwira icyo wishyuraga ushingiyeho.”

Batamuriza ushinzwe imari muri RCA yavuze ko hari amafaranga asaga miliyoni 144 Frw yishyuwe FinTech, miliyoni zisaga 970Frw zishyuwe abakozi, miliyoni 48 Frw zishyuzwe porogaramu na miliyoni 24 Frw zishyuwe internet.

Hari kandi andi mafaranga y’abafatanyabikorwa muri uwo mushinga RCA ari mu byiciro bitandukanye arimo miliyoni 342Frw yatanzwe na Access to Finance na miliyoni zisaga 489 Frw yatanzwe n’umufatanyabikorwa witwa Savings Banks Foundation for International Cooperation (SBFIC).

Ati “Hari ayishyuwe FinTech n’abakozi ubwo twarimo twitegura kwakira iryo koranabuhanga agera kuri miliyoni 970 Frw, miliyoni 24 Frw y’ububiko bwo kwitegura iryo koranabuhanga, miliyoni 23 Frw yishyuwe umuntu wadufashaga kwitegura.”

Umuyobozi Mukuru ushinzwe Icungamutungo muri Minisiteri y’Imari n’Igenamigambi, Mukeshimana Marcel, yavuze ko ikigaragara ari uko uwo mushinga nubwo watanzweho amafaranga menshi ntacyo wagezeho.

Ati “RCA ni yo yari nyir’umushinga, amafaranga yose yatanzwe niyo yayatangiraga uburengenzira.”

PAC yavuze ko uyu mushinga urimo ibibazo byinshi ugomba gushakirwa ikindi gihe n’itsinda ryo gusesengura ababigizemo uruhare.

Mu 2014 nibwo Perezida Kagame yasabye ko umushinga wo gutangiza ‘Cooperative Bank’ yagombaga guhuriza hamwe imirenge SACCO 416 utangizwa byihuse.

RCA iheruka gutangaza ko nta gihindutse umwaka wa 2020 uzatangira Koperative Umurenge Sacco zikoresha ikoranabuhanga.

Koperative Umurenge Sacco zashinzwe mu 2009 nyuma y’uko leta ibonye ko serivisi z’imari zitagera ku baturage neza nk’uko bikwiye. Kuri ubu zikorera mu mirenge 416 yo hirya no hino mu gihugu, zifite abanyamuryango basaga miliyoni 2.7, umutungo usaga miliyari 121Frw n’ubwizigame busaga miliyari 64 Frw.

Depite Ngabitsinze yasabye RCA gushaka ibindi bisobanuro kuri ayo makosa
Depite Uwimanimpaye yavuze ko ibisobanuro byatanzwe na RCA bitumvikana
Umuyobozi Mukuru ushinzwe Icungamutungo muri Minisiteri y’Imari n’Igenamigambi, Mukeshimana Marcel, yavuze ko ikigaragara ari uko uwo mushinga nubwo watanzweho amafaranga menshi ntacyo wagezeho
Umuyobozi Mukuru wa RCA, Prof Harerimana Jean Bosco, ubwo yari imbere ya PAC
Umuyobozi ushinzwe Imari muri RCA, Batamuriza Esther, yasobanuye uko amafaranga yakoreshweje muri uwo mushinga

Amafoto: Dushimimana Ami Pacifique


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza