Umusaruro mbumbe w’igihugu wamanutseho 12.4% kubera ingamba zo guhangana na Coronavirus

Yanditswe na Ndahayo Emmanuel
Kuya 18 Nzeri 2020 saa 08:34
Yasuwe :
0 0

Ikigo cy’Igihugu cy’Ibarurishamibare (NISR) muri raporo ngarukagihembwe igaragaraza imiterere y’umusaruro mbumbe w’igihugu (GDP), cyagaragaje ko muri rusange wagabanutse ku kigero cya 12.4% mu gihembwe cya kabiri cy’uyu mwaka, ugereranyije n’igihe nk’icyo mu 2019.

Igihembwe cya kabiri cy’umwaka kigizwe n’amezi ya Mata, Gicurasi na Kamena. Raporo ya NISR igaragaza muri icyo gihe, umusaruro mbumbe w’igihugu wari miliyari 2 175 Frw, uvuye kuri miliyari 2 346 Frw yabarwaga mu gihe nk’icyo umwaka ushize.

Iri gabanuka ryatewe n’ingamba igihugu cyafashe mu guhangana n’ingaruka za Coronavirus, zirimo guhagarika ibikorwa by’ubucuruzi n’ibindi byinshi nk’uburezi byanatumye hashyirwaho gahunda ya Guma mu rugo.

Ibi byatumye umusaruro w’ibyo bikorwa nawo ugabanuka, bityo n’umusanzu wabyo ku musaruro mbumbe w’igihugu uragabanuka.

Muri rusange, urwego rwa serivisi rwihariye 45% by’umusaruro mbumbe w’igihugu, ari na rwo rugize igice kinini cyawo nk’uko bisanzwe. Rukurikirwa n’urwego rw’ubuhinzi rufite 28% ndetse n’inganda zifite 19%.

N’ubwo izi nzego ari zo zihariye igice kinini cy’umusaruro mbumbe w’igihugu mu gihembwe cya kabiri cy’uyu mwaka, umusaruro wazo na wo waragabanutse ugereranyije n’umwaka ushize. Nk’urwego rw’ubuhinzi rwagabanutseho 2%, inganda zigabanuka ku kigero cya 16% naho serivisi zigabanuka ku kigero cya 19%.

Urwego rw’uburezi ni rwo rwazahajwe cyane na Coronavirus, kuko umusanzu warwo ku musaruro mbumbe w’igihugu wagabanutseho 67%. Urw’amahoteli na restaurant na rwo rwarazahaye, kuko umusanzu warwo wagabanutseho 62% ugereranyije n’umwaka ushize.

Urwego rw’ubucukuzi bw’amabuye y’agaciro rwaraguye, umusanzu warwo ugabanuka ku kigero cya 53%. Urwo gutwara abantu n’ibintu na rwo rwaradindiye, umusanzu warwo ugabanukaho 41%. Ubucuruzi bwagabanutse ku kigero cya 22% naho ubwubatsi buganuka ku kigero cya 20%.

Ku rundi ruhande, umusanzu w’urwego rw’ubuzima ku musaruro mbumbe w’igihugu wariyongereye, uzamukaho 5%, naho uw’itumanaho n’ihererekanyamakuru uzamuka ku kigero cya 33%, ahanini bitewe n’ibigo bitanga serivise z’itumanaho.

Ibyo u Rwanda rukura mu mahanga mu gihembwe cya kabiri cya 2020 byagabanutseho 18%, mu gihe n’ibyo rwoherezayo byagabanutseho 24%.

Iri gabanuka rishingiye ku igabanuka ry’umusaruro w’ubuhinzi, naryo ryatewe ahanini n’igabanuka ry’umusaruro w’ikawa, wagabanutseho 32% kose.

Umusaruro mbumbe w'igihugu mu gihembwe cya kabiri cya 2020 wagabanutseho 12.4% kubera ingamba zo guhangana na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .