Umunya-Uganda yafashwe agerageza kwinjiza kanyanga mu Rwanda

Yanditswe na Musangwa Arthur
Kuya 13 Nyakanga 2020 saa 08:01
Yasuwe :
0 0

Nyuma y’uko muri Gicurasi umwaka ushize Perezida wa Uganda, Yoweri Kaguta Museveni, yeruye agahamagarira abacuruzi n’abaturage gukora magendu, abanya-Uganda bakomeje kwishora muri ibi bikorwa bagashaka kwinjiza magendu mu Rwanda nubwo batoroherwa n’inzego z’umutekano zidahwema kubacakira.

Icyo gihe Museveni yagize ati “Nubwo umupaka wafunzwe, ubucuruzi buzakomeza, buzananyura mu nzira ya magendu. Ntushobora guhagarika ubucuruzi unyuze ku buyobozi bw’umupaka, abantu bahitamo magendu”.

Ni ijambo risa n’iryatinyuye abaturage be bumva ko ubwo u Rwanda rwabujije abaturage barwo kujya muri Uganda kubera impamvu z’umutekano wabo, bakwiye gukora magendu bayijyana mu Rwanda kandi babizi neza ko ibyo bikorwa bitemewe.

Uheruka gufatirwa muri magendu ni uwitwa Levi Byomuhangi, watawe muri yombi agerageza kwinjiza mu Rwanda litiro 27 za Kanyanga. Uyu ibitangazamakuru byo muri Uganda birimo Commandpost byavugaga ko yashimuswe n’u Rwanda.

Umwe mu bayobozi b’umupaka ku ruhande rw’u Rwanda yagize ati “Nta n’umwe washimuse Levi Byomuhangi. Uyu mugabo yishe amategeko, icya mbere yinjiye mu Rwanda anyuze mu nzira zitemewe, icya kabiri yari atwaye magendu, icya gatatu yari magendu y’ibintu bibi cyane”.

Byomuhangi yafashwe kuwa 11 Nyakanga ahitwa i Rubaya mu Murenge wa Gicumbi mu Ntara y’Amajyaruguru, ku mupaka uhuza u Rwanda na Uganda. Yari atwaye ijerekani ya litiro 20 za kanyanga izindi litiro zirindwi ziri mu isashi ya pulasitiki. Yari atwaye kandi umusemburo bifashisha mu gukora ikigage utemewe, ibilo 10 by’ifu y’ibigori, amavuta yo guteka n’umunyu.

Byomuhangi akaba yarajyanywe mu kato ahantu hateganyijwe i Byumba, mu kwirinda icyorezo cya Coronavirus, nyuma y’aho akazakurikiranwa nk’uko amategeko abiteganya.

Ibitangazamakuru bya Uganda bimenyerewe mu mugambi wo kurwanya u Rwanda nka Commandpost, byihutiye kwandika ko Byomuhangi yashimuswe, byirengagiza buri kimwe kijyanye n’ibikorwa bye bya magendu.

Ni kimwe mu bitangazamakuru bikorera Urwego rw’Ubutasi bwa Gisirikare (CMI), aho cyatangaje ko Byomuhangi wo mu karere ka Kabale yashimuswe akuwe mu murima we.

Abayobozi b’u Rwanda ntibahwema kugira inama buri wese ushaka gukora ubucuruzi kubukora mu buryo bwemewe, banyuze mu mipaka izwi kandi ku manywa.

Mu kwezi gushize undi munya-Uganda witwa Warren Musekura wageragezaga kwinjiza magendu mu Rwanda, yarashwe n’inzego z’umutekano zari ku burinzi nyuma y’uko zimuhagaritse akabyanga ahubwo agashaka kuzirwanya yifashishije icumu n’umuhoro yari afite.

Ibi byabereye ku butaka bw’u Rwanda mu bilometero 12 uvuye ku mupaka wa Uganda mu mudugudu wa Kamatengu, Akagari ka Ruconsho, Umurenge wa Rwerere mu Karere ka Burera.

Mu Ugushyingo umwaka ushize, nabwo hari abaturage babiri ba Uganda barasiwe ku butaka bw’u Rwanda ubwo bageragezaga kwinjiza magendu bahagarikwa na Polisi bagashaka kuyirwanya.

Tariki ya 9 mu rukerera rushyira iya 10 Ugushyingo 2019 nibwo abapolisi b’u Rwanda bari ku burinzi ku mupaka ugabanya u Rwanda na Uganda mu Murenge wa Tabagwe muri Nyagatare, barashe bica abagabo babiri bashatse kurwanya inzego z’umutekano ubwo bageragezaga kwinjira mu Rwanda banyuze mu nzira zitemewe, bigakekwa ko bafite magendu.

Ubuyobozi bwavuze ko Polisi y’u Rwanda yabanje guhagarika abo baturage bari bazanye magendu mu Rwanda banayicishije mu nzira zitemewe bashaka kuyirwanya mu rwego rwo kwitabara irarasa hapfamo babiri abandi basubira inyuma ku butaka bwa Uganda.

Muri Gicurasi 2019, hari abandi babiri barimo Umunyarwanda n’Umugande barasiwe Tabagwe bashaka kurwanya abashinzwe umutekano ubwo babahagarikaga batwaye magendu.

Byomuhangi wafashwe yinjiza magendu irimo Kanyanga mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .