Umujyi wa Kigali wakiriye abayobozi bashya baherutse gushyirwa mu myanya

Yanditswe na Twarabanye Venuste
Kuya 10 Gashyantare 2020 saa 09:34
Yasuwe :
0 0

Umuyobozi w’Umujyi wa Kigali, Rubingisa Pudence, yakiriye abayobozi bashya baherutse gushyirwa mu myanya hakurikijwe itegeko rishya rigenga Umujyi wa Kigali barimo umuyobozi mukuru w’ibikorwa by’umujyi n’abayobozi nshingwabikorwa b’uturere.

Ku gicamunsi cyo kuri uyu wa Mbere tariki 10 Gashyantare 2020, Umujyi wa Kigali wakiriye abayobozi bashya mu muhango w’ihererekanyabubasha wabereye ku cyicaro cyawo, hagati y’abafashe inshingano n’abasimbuwe.

Muri uwo muhango, Rwamurangwa Stephen wari Umuyobozi w’Akarere ka Gasabo yahererekanyije ububasha na Umwali Pauline wagizwe Umuyobozi Nshingwabikorwa w’ako Karere; Kayisime Nzaramba wari Umuyobozi w’Akarere ka Nyarugenge yahererekanyije ububasha na Ngabonziza Emmy wagizwe Umuyobozi Nshingwabikorwa w’ako Karere naho Umutesi Solange aherekanya ububasha na Emmanuel Baingana wari Umuyobozi w’umusigire w’Akarere ka Kicukiro.

Umuyobozi Mukuru w’Ibikorwa by’Umujyi, Rugaza Julian yahererekanyije ububasha n’uwari Umunyamabanga Nshingwabikorwa w’Umujyi wa Kigali, Eng Mutuyimana Alphonse Marie Claude.

Umuyobozi w’Umujyi wa Kigali, Pudence Rubingisa, yahaye ikaze abayobozi bashya anabizeza ubufatanye.

Ati “Duhaye ikaze abayobozi Nshingwabikorwa b’uturere n’abandi bakozi b’Umujyi wa Kigali mu mirimo igihugu cyabashinze, isaba byinshi, cyane cyane n’ubushishozi, ni imirimo dukora kandi igira impinduka mu buzima bw’abaturage ariko tunabizeza ubufatanye. Tukanashimira abari abayobozi b’uturere dutatu tw’umujyi tukiza mu mujyi baradufashije mu kumenyera no gukomeza kwihutisha serivisi. ”

Itegeko rishya rigenga Umujyi wa Kigali ryateganyaga ko abagize Inama Njyanama y’Umujyi wa Kigali; abagize Komite Nyobozi y’Umujyi wa Kigali n’abagize Urwego Nshingwabikorwa rw’Akarere bateganywa n’iri tegeko bajyaho mu gihe kitarenze amezi atandatu, uhereye ku wa 31 Nyakanga 2019 ubwo ryatangazwga mu Igazeti ya Leta ya Repubulika y’u Rwanda.

Izi mpinduka zahereye ku rwego rw’Umujyi zishyirwa mu bikorwa, habanza kugabanywa umubare w’abagize Inama Njyanama y’Umujyi wa Kigali, bava kuri 33 baba 11 barimo batanu bashyirwaho na Perezida wa Repubulika na batandatu batorwa mu turere dutatu tugize Umujyi wa Kigali.

Umuyobozi w’Inama Njyanama y’Umujyi wa Kigali, Dr Bayisenge Jeannette, yabibukije ko bategerejweho byinshi kandi ko bagiyeho hari impinduka nyinshi n’inshingano zibategereje.

Aba bayobozi bahawe inshingano mu gihe u Rwanda rwinjira mu cyerekezo gishya cya 2050 ndetse n’igishushanyo mbonera gishya kiri gukorwa, basabwe guhuza icyerekezo, intego n’imyumvire bakanoza ibyo bakora.

Ati “Twitezweho byinshi ariko turi muri iyi myanya kubera icyizere batugiriye tugikoreshe kugira ngo kitaraza amasinze.”

Abagize komite y’Umujyi wa Kigali barahindutse, ubu igizwe n’Umuyobozi w’Umujyi wa Kigali, Umuyobozi Wungirije ushinzwe Imiturire n’Ibikorwaremezo n’Umuyobozi Wungirije ushinzwe Ubukungu n’Imibereho Myiza y’Abaturage.

Baheruka gutorerwa igihe cy’imyaka itanu, bashobora kongera kwiyamamaza ariko ntibarenze manda ebyiri zikurikirana. Mbere yari Umuyobozi w’Umujyi wa Kigali, Umuyobozi wungirije ushinzwe imibereho myiza n’ushinzwe ubukungu.

Kayisime Nzaramba wari Umuyobozi w’Akarere ka Nyarugenge yahererekanyije ububasha na Ngabonziza Emmy wagizwe Umuyobozi Nshingwabikorwa wako
Rwamurangwa Stephen wari Umuyobozi w’Akarere ka Gasabo yahererekanyije ububasha na Umwali Pauline wagizwe Umuyobozi Nshingwabikorwa w’ako karere
Umutesi Solange ahererekanya ububasha na Emmanuel Baingana wari Umuyobozi w’Umusigire w’Akarere ka Kicukiro
Umuyobozi Mukuru w'Ibikorwa by'Umujyi, Rugaza Julian yashyikirijwe ububasha n'uwari Umunyamabanga Nshingwabikorwa w'Umujyi wa Kigali, Eng Mutuyimana Alphonse Marie Claude
Ubuyobozi bw'Umujyi wa Kigali bwakiriye abayobozi bashya baherutse gushyirwa mu myanya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .