Umudepite w’u Bwongereza yamaganye abanenze ifatwa rya Rusesabagina

Yanditswe na Ndahayo Emmanuel
Kuya 12 Nzeri 2020 saa 09:42
Yasuwe :
0 0

Umudepite w’u Bwongereza, Andrew Mitchell, wigeze no kuba Umunyamabanga wihariye ushinzwe iterambere mpuzamahanga, yanenze abamaganye ifungwa rya Paul Rusesabagina, uherutse gutabwa muri yombi n’Urwego rw’Igihugu rw’Ubugenzacyaha, RIB, ashinjwa ibyaha birimo iterabwoba.

Mu nyandiko yanyujije mu kinyamakuru The Guardian, Mitchell yanenze abarimo Jared Genser na Brian Tronic bavuga ko ari abunganizi ba Rusesabagina, baherutse guhuruza Umunyamabanga Wihariye w’Umuryango w’Abibumbye ushinzwe gukurikina ibyaha bibangamira uburenganzira bwa muntu, bavuga ko ‘leta y’u Rwanda yashatse gucecekesha Rusesabagina igihe kinini kuko arwanya Kagame’.

Mitchell avuga ko yatunguwe n’uko ikinyamakuru The Guardian cyanyujijeho iyo nyandiko idafite ishingiro, ati “natunguwe n’uburyo The Guardian yitwaye muri iki kibazo cya Paul Rusesabagina, Umunyarwanda wafunzwe ubu akaba ari muri kasho i Kigali. Rusesabagina, wahimbye uruhare yagize mu gufasha abahungiye muri Hoteli Rwanda mu gihe cya Jenocide yakorewe Abatutsi mu Rwanda, yakomeje kutavugwaho rumwe kuva icyo gihe”.

Mitchell yongeyeho ko “Rusesabagina yafunzwe kuko akekwaho kuba yaratangije, akayobora ndetse akanatera inkunga umutwe w’abagizi ba nabi ukorera mu Rwanda no hakurya yarwo, uzwi nka MRCD [ufite n’ishami rya gisirikari rya FLN]. Impapuro mpuzamahanga zimuta muri yombi zirimo ibirego by’uko muri Kamena na Nyakanga 2018 mu ishyamba rya Nyungwe, ndetse no mu Ukuboza 2018 mu karere ka Nyamagabe, habereye ibitero byagabwe na MRCD/FLN ku baturage b’inzirakarengane, bigahitana abagera mu icyenda, naho abandi benshi bagakomereka cyane”.

Mitchell yanagarutse ku buryo uyu mugabo ku giti cye yiyemereye kugira uruhare muri ibyo bikorwa, ati “hari video iri kuri internet aho Rusesabagina agaragaza gushyigikira uyu mutwe w’iterabwoba. Iyo aba ari mu Bwongereza, yakabaye yarahise ahanwa n’amategeko yacu arebana no kurwanya iterabwoba”.

Yongeyeho ko u Bwongereza ahubwo bwagakwiye gufata abantu batanu bashinjwa uruhare muri Jenoside yakorewe Abatutsi batuye muri icyo gihugu.

Ati “Mu gihe tukiri kuri iyi ngingo, ikinyamakuru cyanyu cyagashyigikiye ifatwa ry’abanyarwanda batanu bashinjwa kugira uruhare muri Jenoside yakorewe Abatutsi mu Rwanda bakidegembya mu Bwongereza, batunzwe n’imisoro y’abenegihugu mu gihe kirenga imyaka 10 yose”.

Yavuze ko Leta y’u Rwanda ntako itagize kugira ngo abo bantu bazanwe imbere y’ubutabera ariko ntibigire icyo bigeraho.

Ati “Nubwo Leta y’u Rwanda yagerageje inshuro nyinshi kuzana abo bantu imbere y’ubucamanza, nta kintu cyagezweho. Biragoye kwemera ko ibintu nk’ibi byari kubaho iyo [abashinjwa] bari kuba baragize uruhare muri Holocaust [Jenoside yakorewe Abayahudi]. Mu by’ukuri rero, ubutabera bw’u Bwongereza, aho kuba ubw’u Rwanda, nibwo bwitwaye nabi muri iki kibazo”.

Rusesabagina akekwaho kurema no kuyobora umutwe n’ihuriro ry’imitwe y’iterabwoba yitwara gisirikare igizwe n’abahezanguni, irimo MRCD na PDR-Ihumure, ikorera mu bice bitandukanye mu Karere no mu mahanga.

Harimo kandi ibyaha by’iterabwoba, gutwika, ubushimusi n’ubwicanyi byakorewe abaturage b’inzirakarengane b’Abanyarwanda. Byakorewe mu duce turimo Nyabimata mu Karere ka Nyaruguru ahabaye ibitero muri Kamena 2018 no muri Nyungwe mu Karere ka Nyamagabe mu Ukuboza 2018.

Rusesabagina ari gukurikiranwaho ibyaha birimo iterabwoba
Uyu mugabo yiyemerera ko ashyigikiye ibikorwa by'imitwe y'iterabwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .