Ukwiheba kuri Kitty Kurth uvugira Rusesabagina Foundation

Yanditswe na Musangwa Arthur
Kuya 19 Ukwakira 2020 saa 08:58
Yasuwe :
0 0

Perezida w’Ikigo cy’Itumanaho cya “Kurth Lampe Worldwide Ideas, Delivered” akaba n’Umuvugizi wa Rusesabagina Foundation, Kitty Kurth, ari mu bihe bitamworoheye ahanini bishingiye ku itabwa muri yombi ry’umukiliya we, Paul Rusesabagina.

Rusesabagina yafashwe mu mpera za Kanama 2020, anerekwa itangazamakuru.

Ni inkuru yaciye igikuba mu bambari be n’abasanzwe bamukingira ikibaba, ndetse abiyita ko baharanira uburenganzira bwa muntu batangiye inkubiri bise iyo kumubohoza mu gihe atarahabwa ubutabera.

Kitty Kurth ari mu batorohewe ahanini kubera icyizere yahaye umuryango wa Rusesabagina wamushoyeho amafaranga akangari ngo ‘intwari’ yabo irokorwe.

Mu bifatika, itangazamakuru ryagutse ntiriri gutanga umusanzu waryo mu kugaragaza ukuri ku Rwanda.

Ifatwa rya Rusesabagina ryazamuye imvugo nyinshi, kugeza n’aho hari abiyita impirimbanyi bavuze bati “Itabwa muri yombi rya Rusesabagina n’ibijyanye n’ishimutwa rye ryabaye igitutsi kuri buri wese muri Leta ya Texas. Ni igitutsi kuko Texas icumbikiye Abanyarwanda benshi kuko usibye kuba Umunyarwanda n’Umubiligi, Rusesabagina ni Umunya-Texas.’’

Umunyamerikakazi uvugira Rusesabagina, Kitty Kurth, yigeze avuga ati ‘‘Niba Paul Rusesabagina atarekuwe mu cyumweru kimwe, tuzatera umugongo u Rwanda tunasabe umuryango mpuzamahanga kubigenza utyo.”

Kitty usa n’aho amaze kwiheba yisunze umunyamakuru Rob Curran, ngo azamufashe kwandika inkuru, uburyo bwo gukomeza kwaya amafaranga y’umuryango wa Rusesabagina.

Abasesenguzi bagaragaza ko icyo impirimbanyi zifata nk’igitutsi ni ukubona umuterabwoba widegembyaga mu baturage b’inyangamugayo b’i Texas kubera atazwi kandi impamvu rukumbi batatanze ubufasha bwo kumufata butandukanye n’ibyo Kitty n’inshuti ye bashaka ko Abanyarwanda n’Isi bemera; ukuri ni uko abenshi mu batuye Texas batazi neza uwo Rusesabagina ariwe.

Igihamya ko Kitty ari guhuzagurika bidasanzwe ni amakuru ari gutanga anyuze muri Curran.

Rusesabagina niba ava muri Texas, ese kugira ubwenegihugu bw’u Bubiligi, akaba atuye muri Amerika, yarambitswe umudali na Perezida Bush ndetse akaba yitwa ‘intwari ya Hollywood’, ese byaba bihagije kumukuraho icyasha cy’ibikorwa by’iterabwoba akurikiranyweho n’ubutabera?

Umwe mu basesenguzi yagaragaje ko nubwo Rusesabagina yaba ava kuri Mars, icyakorwa mu gihe yiyemerera ko yashinze umutwe witwaje intwaro, yanemeye uruhare rwawo mu gukora ibyaha.

Ubwo yari mu rukiko, Rusesabagina yavuze ko mu Ihuriro rya MRCD rishamikiyeho Umutwe wa FLN yari ashinzwe ibya dipolomasi ariko adahakana ibikorwa byawo.

Ati “Nk’uko nabivuze, FLN ntabwo twayikoze nk’umutwe w’iterabwoba ahubwo yari uburyo nk’impunzi ziri hanze, twashakaga kwereka Umuryango Mpuzamahanga na Leta y’u Rwanda ko hari impunzi zibagiranye, zateshejwe agaciro, ziba mu nkambi za Zambia, Malawi, ziri kuzerera hirya no hino kugira ngo zitekerezweho (attirer l’attention). Ntabwo umugambi wa FLN wari iterabwoba, ahubwo kwari ukureshya ngo imiryango mpuzamahanga imenye ko abo bose ari imbabare.”

Abasesenguzi bibaza uburyo ki ubwenegihugu bwe bushya nk’umuturage wa Texas niba byarabayeho biha Rusesabagina ubudahangarwa bwo guhunga ubutabera ku byaha yemera ndetse n’amashusho abyerekana akaba asakaye hose kuri internet.

Umwe yagize ati “Ese ibivugwa na Curran byaba bisobanuye ko umuturage wa Texas ari hejuru y’amategeko? Byaba bitangaje mu gihe Texas iri mu bihugu bifunga abaturage benshi barimo n’abaherwe kurusha ibindi bihugu.’’

“Mu by’ukuri, hari ikintu kitagenda neza mu mutwe wa Kitty.’’

Mu nkuru zose za Kitty, ahangana no kwerekana ubushobozi afite mu gutera abantu cyangwa imiryango icyuhagiro.

Ibi byanageze no mu nkuru ya Curran, aho Kitty yifashishijwe aho agira ati “Kagame yashakaga kugira intwari imwe mu Rwanda kandi iyo ntwari si Rusesabagina!”

Aba bombi bazi neza ko buri mwaka, u Rwanda rwizihiza Umunsi wahariwe Intwari kandi igihugu kikaba gifite intwari nyinshi zirimo izizwi n’izitazwi.

Mu Rwanda buri wese si intwari ndetse mu zihari Rusesabagina ntabarizwa kuri urwo rutonde.

Ku bagifite umutima wo kugenzura neza ukuri kw’ibyo babwirwa, iby’iyo ntwari [Rusesabagina] byanenzwe n’abanyamakuru bakora inkuru z’ubucukumbuzi bwihariye barimo Linda Melvern wabinyujije mu nyandiko n’ibiganiro; Amadou Deme wahoze muri UNAMIR wabikomojeho mu nkuru yanditse mu 2006 ndetse n’abashakashatsi barimo Jos Van Oijen baherutse gutangaza inyandiko zitandukanye.

Kuba Rusesabagina akurikiranwe si ukubera ubutwari yatwererewe ahubwo Ubutabera bw’u Rwanda bumukurikiranyeho ibyo yiyemereye mu rukiko n’uruhare rwe mu bikorwa by’iterabwoba.

Abakurikiranira hafi ibya Politiki basanga bigoye ko Kitty yava ku izima cyane ko ariko abakora mu by’Itumanaho ariko kazi bishyurirwa.

Basobanura ko Kitty akomeje guhatira umukobwa wa Rusesabagina kumwumvisha dosiye ya se ashingiye ku marangamutima.

Uwaha umukobwa we ijambo yavuga uburyo akumbuye se, uko ari umubyeyi w’urukundo rutagira akagera. Nyamara muri iyo nkuru hari ikitagaragaramo, amarira y’imiryango yiciwe abayo n’abagizweho ingaruka n’umutwe w’iterabwoba wa Rusesabagina.

Akababaro kabo ntikavugwa. Amarira yabo afatwa nk’adafite agaciro nyamara si abaturage ba Texas, ni Abanyarwanda basanzwe batitwa ‘intwari’, ijambo ribemerera guhabwa uburinzi budasanzwe. Nabo babuze ababo bakundaga. Ikibabaje ni uko badashobora guhumurizwa ngo wenda ababo barafunzwe, bari gufungura ibyo bakunda ndetse bahabwa ubuvuzi bwiza mu Rwanda. Intwari ya Curran na Kitty yaharaniye ko bazabura ababo by’iteka ryose.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .