Uko Cobra witandukanyije na FDLR na RUD-Urunana yakiriwe mu gihugu yahereye kera arwanya bikanga

Yanditswe na Nkurunziza Ferdinand
Kuya 29 Kanama 2020 saa 07:04
Yasuwe :
0 0

Rtd Maj Bimenyimana Bonaventure wamenyekanye nka Cobra, ni umwe mu bahoze ari abarwanyi b’umutwe wa FDLR na RUD-Urunana, wafashe icyemezo gikomeye cyo kwitandukanya n’iyo mitwe, akagaruka mu Rwanda yamaze imyaka 15 ashaka kwigarurira akoresheje imbunda ariko bikanga.

Cobra yagarutse mu Rwanda mu Ugushyingo 2009, yakirwa nk’abandi basirikare bose bahoze mu mitwe ya gisirikare irwanya u Rwanda, ashyirwa mu ngando ndetse afashwa gusubira mu buzima busanzwe.

Nyuma yo kwakirwa mu Ngabo z’u Rwanda, yoherejwe mu butumwa bwo kubungabunga amahoro muri Sudani, aza no gusezererwa muri RDF mu buryo bwemewe n’amategeko; ubu yahawe inshingano muri Reserve Force, aho agira uruhare mu bikorwa bitandukanye by’iterambere.

Urugendo rwe mu gisirikare

Rtd Maj Bimenyimana Bonaventure yinjiye mu gisirikare cya FAR mu 1990, ubwo Ingabo za RPA zari zitangiye urugamba rwo kubohora igihugu.

Ubwo Ingabo za FAR zari zimaze gutsindwa na RPA, zigahungira mu Repubulika Iharanira Demokarasi ya Congo [Yitwaga Zaïre icyo gihe], Cobra ari mu basirikare bambutse bagana Zaïre, bashaka aho bongera kwisuganyiriza ngo bagaruke mu Rwanda binyuze mu ntambara.

Bakigera Zaïre babanje kuba mu nkambi z’impunzi, batunzwe na HCR, ariko izi nkambi nazo zaje gusenywa, bahungira mu mashyamba, batangira gutegura ibitero byabafashije kwinjira mu Rwanda, aribyo benshi bibuka nk’intambara y’abacengezi.

Rtd Maj Bimenyimana avuga ko umugambi wo kugaruka mu Rwanda ugerweho hifashishijwe isasu, bawuterwagamo inkunga n’ingabo FARDC.

Bakigera mu Rwanda icyo gihe, basanze ibyo bibwiraga bitandukanye n’ukuri guhari kuko basanze ingabo z’igihugu zifite imbaraga […] bahangana nazo zirabanesha, basubira mu mashyamba ya Congo.

Usibye ibi kandi ngo kwakirwa n’abaturage byarananiranye ku buryo babuze ibibafasha kurwana intambara bari biyemeje.

Cobra yagize ati “Twatashye tuzi ko turarwana bigakunda, tugatsinda. Tugeze mu Rwanda biratunanira; tubura abaturage batwakira; tubura ibyo kurya […] dusubira Congo.”

Akomeza avuga ko bageze mu mashyamba bahasanze abandi baturage batari barahungutse, babahuza n’abandi bari baturutse mu Rwanda, ariko imibereho yabo bose ibabera ikibazo gikomeye.

Radio yatumye benshi bataha

Rtd Maj Bimenyimana avuga ko igihe cyose yamaze mu mashyamba ya Congo, yajyaga atega amatwi ibiganiro bitandukanye bya Radio Rwanda, ari kumwe na bagenzi be.

“Nta n’umwe mu babaga mu ishyamba utarumvaga Radio, n’abakiriyo ubu barayumva. N’ubwo hari ababeshya ngo abantu ntibashaka gutaha […] ngo ntibakurikira politiki, burya politiki uyimenyera mu itangazamakuru. Abantu benshi bahunze bumvaga amaradiyo; ibiganiro byose twarabikurikiraga.”

Rtd Maj Bimenyimana avuga ko benshi mu bagiye bataha, ari ababaga barumvise ibyo biganiro, abandi bakaba barahamagarwaga n’abo mu miryango yabo ituye mu Rwanda.

Yongeraho ko mu gihe cyose amaze mu Rwanda yabonye ibintu byinshi bitandukanye n’ibyo babwirwaga n’abayobozi ba FDLR bakiri mu mashyamba.

Igituma FDLR itarambika intwaro hasi

Rtd Maj Bimenyimana avuga ko kimwe mu bituma abarwanyi ba FDLR batarambika intwaro hasi ngo batahuke mu rwababyaye, ari uko bakigendera kuri politiki y’abanyenda nini bakiriyo ndetse n’abagifite ubwoba bw’uko basize bakoze Jenoside yaguyemo Abatutsi basaga miliyoni, mu 1994.

Ashimangira ko abakiriyo bakigendera ku mitekerereze y’ingoma za kera za Kayibanda na Habyarimana, ku buryo hari n’abakibwira ko buri muntu wese utahutse aza mu Rwanda, ahita yicwa.

Ati “Ibyo bavuga ni bimwe by’abantu bagenda bazi ko hari abantu bariyo kandi ntabo; cyane ko banabashuka bababwira ngo ni ‘muze hano hari uburyo tugomba gucukura amabuye ya Congo, bagerayo bakabona babahaye imbunda.”

Rtd Maj Bimenyimana avuga ko n’abari mu Burayi, bagezeyo bahunze u Rwanda, baba bari gushuka abakiri mu mashyamba ya Congo, nyamara bari gukubitikira mu ishyamba mu gihe abandi bibereye i Burayi; abana babo bari kwiga neza, mu gihe abari mu mashyamba ya Congo bo bari kuhatakariza ubuzima.

Inkomoko y’izina Cobra

Benshi bazi neza ko “Cobra” ari izina ry’inzoka y’inkazi, ifite ubushobozi bwo gutwara ubuzima bwa buri kimwe cyose gihanganye nayo.

Rtd Maj Bimenyimana Bonaventure alias Cobra avuga ko iri zina yarihawe n’Umukuru wa FDLR, Gen Ntawunguka Pacifique, mu rwego rwo kwiyoberanya ubwo bari bari mu mugambi wo gutera u Rwanda mu gihe cy’intambara y’abacengezi.

Ati “Twari twicaye mu gashyamba kari inyuma y’ikibuga, turi kumwe n’uwitwa Gakara, arambwira ngo ‘nkawe uyoboye itsinda ry’abasirikare badasanzwe, ntugomba kwitwa izina, ngo uzagere iwanyu bari kukuvuga, cyane ko n’umuryango wawe bawica.”

Rtd Maj Bimenyimana akomeza avuga ko yagaragaje kudasobanukirwa neza icyo gikorwa cyo guhinduranya amazina, Gen Ntawunguka amubwira ko agomba kugenda yiyise Cobra, rikaba ariryo zina abantu bose bamumenyeraho.

Ubuhanga bwa Cobra bwamuheshaga amahirwe yo guhora hafi y’abayobozi bakuru ba FDLR ndetse no kuyobora imitwe y’ingabo zidasanzwe, zabaga zifite ubutumwa bwihariye burimo no kugaba ibitero bikomeye mu ibanga.

Gutaha mu Rwanda

Rtd Maj Bimenyimana Bonaventure avuga ko igihe cyose yabaye mu mashyamba ya Congo, yakomezaga kuvugana kuri telefone n’abo mu muryango we bari baratahutse mu Rwanda, bakamubaza impamvu adataha nyamara umutekano waragarutse mu gihugu, nyuma ya Jenoside yakorewe Abatutsi.

Ati “Mu gihe cya ‘Operation Umoja Wetu’ nari nyoboye ibijyanye n’imirwano muri Brigade, baza kundasa njya mu bitaro, ndavurwa ndetse ndakira. Uburyo navuganaga n’abo mu Rwanda ntibwahagaze kuko navuganaga n’umukecuru wanjye n’abandi bakoraga mu nzego za Leta […] bakambaza impamvu ntataha, nanjye nkababaza uburyo natahamo.”

Rtd Maj Bimenyimana avuga ko atajyaga atekereza uburyo azabaho naramuka ageze mu Rwanda, ngo yibaze niba bazamuha akazi cyangwa ikindi kintu kizamufasha kubona imibereho […] kuko icyo yifuzaga cyane kwari ukugira umutekano usesuye igihe cyose yari kuba akandagiye ku butaka bw’u Rwanda.

“Abambwiraga bose, barambwiraga bati ‘Taha mu Rwanda ni amahoro, uzakirwa neza n’abanyarwanda, utahe iwawe […] kubera ko nta kintu na kimwe nikangaga. N’igihe twajyaga turwana na RDF, sinigeze nijandika mu bwicanyi.”

Rtd Maj Bimenyimana yagiye kuva mu mashyamba ya Congo, atakibarizwa muri FDLR, kuko yari ari ku ruhande rwa RUD-Urunana.

Ku munsi wa nyuma wo kuva muri Congo yabwiye uwari umuyobozi we Col Nzitonda Martin ko atashye, undi amubaza impamvu amusize, maze amusubiza ko gutaha ari icyemezo buri wese afata ku giti cye; bityo ko nawe niyumva yiyemeje gutaha azabikora. Ubu uyu Col Nzitonda Martin nawe yaratahutse, atuye mu Karere ka Musanze.

Kwakirwa mu Rwanda

Rtd Maj Bimenyimana avuga ko akigera mu Rwanda n’abandi barwanyi bari batahukanye yakiriwe neza, ndetse bamwe mu bamwakiriye hari harimo abo bahoranye mu mashyamba ya Congo.

Nyuma yo kwakirwa, baraganirijwe bahabwa icyo kunywa n’amafunguro, ubundi burizwa imodoka ibajya i Mutobo, ahahurizwa abitegura gusezerwa mu ngabo, bahoze mu mashyamba ya Repubulika Iharanira Demokarasi ya Congo.

Ati “Ku mutima naravugaga ngo icyanyereka u Rwanda, narwanye nshaka iki gihugu kugirango ngikorere […] ni nayo mpamvu nitanga. Turi hanze baratubwiraga ngo Musanze yateye imbere, Byangabo yarahindutse, Kigali n’iyindi mijyi yose yarahindutse. Mpageze naravuze nti ‘Ko ngeze muri iki gihugu, nkabona abantu bose bansize, ubu nzapfe nk’imbwa koko?”

Kubera inyota yo gufatanya n’abandi iterambere, Rtd Maj Bimenyimana yakoze ibishoboka byose yegeranya ubushobozi yari afite burimo n’amafaranga make yari yaravanye muri Congo, atangira gukora ibikorwa by’ubuhinzi bw’ibirayi.

Mu myaka hafi 10 amaze mu Rwanda, yagiye yagura imbago z’iterambere rye mu bikorwa bitandukanye, ku buryo yabashije kwiyubakira inzu igezweho ndetse ashinga ibindi bikorwa bimwinjiriza amafaranga, byunganira akazi afite muri Reserve Force.

Ati “Iterambere ubu ndirimo neza; kuko intambara ubu ndi kurwana […] narwanaga intambara y’amasasu ndi muri Congo, ngeze mu gihugu cyanjye kuko nicyo nashakaga, ubu ndi kurwana intambara y’iterambere.”

Ubu Rtd Maj Bimenyimana Bonaventure alias Cobra atuye mu Kagari ka Gisesero, Umurenge wa Busogo, mu Karere ka Musanze […] aho abana n’umuryango we.

Cobra asaba abakiri mu mashyamba ya Congo by’umwihariko abayobozi ba FDLR n’indi mitwe ya gisirikare gutaha bagafatanya n’abandi banyarwanda kwiyubakira igihugu; baba batabishoboye bakareka abakiri bato bakagira amahirwe yo kwibonera igihugu cyabo kuko gupfira mu mahanga bingana no kugwa ku gasi.

Rtd Maj Bimenyimana Bonaventure wamenyekanye nka COBRA, ni umwe mu bahoze ari abarwanyi b’umutwe wa FDLR na RUD-Urunana, wafashe icyemezo gikomeye cyo kwitandukanya n’iyo mitwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .