Ubutasi, iturufu ya Uganda mu guta muri yombi abafite aho bahuriye n’u Rwanda

Yanditswe na Musangwa Arthur
Kuya 7 Nyakanga 2020 saa 10:10
Yasuwe :
0 0

Abanyarwanda n’abanya-Uganda bafite inkomoko mu Rwanda, bakomeje guhohoterwa no gutabwa muri yombi n’ubutegetsi bwa Uganda, bashinjwa gukorera ubutasi u Rwanda. Ni ibirego bimaze imyaka irenga ibiri bigerekwa ku batawe muri yombi na Uganda ariko ntihagire ugezwa mu rukiko ngo hagaragazwe ibimenyetso.

Kuva mu 2018, abanyarwanda ndetse n’abanya-Uganda, bafite aho bahuriye n’u Rwanda, bakomeje gutabwa muri yombi umunsi ku wundi bashinjwa icyaha kimwe cyo kuba intasi z’u Rwanda. Bamwe bakorewe iyicarubozo ry’inkazi bibaviramo ubumuga, abandi barapfa.

Urugero rwa hafi ni Mageza Emmanuel, waguye mu bitaro bya Butabika, bivura indwara zo mu mutwe i Kampala muri Uganda, n’ubu umubiri we nturagarurwa mu Rwanda ngo ushyikirizwe umuryango we umuherekeze mu cyubahiro.

Uyu Mageza yapfuye nyuma y’igihe kijya kungana n’umwaka ari mu ibohero ry’Urwego rushinzwe iperereza mu gisirikare cya Uganda (CMI), riri i Mbuya, aho yakorerwaga iyicarubozo ryaje kumuviramo kurwara mu mutwe kugeza apfuye.

Ibikorwa nk’ibi ntabwo birashira. Kuwa 5 Nyakanga 2020, ikinyamakuru cyo muri Uganda, The New Vision, cyasohoye inkuru ifite umutwe ugira uti “umupilote mu gisirikare n’umupolisi batawe muri yombi bashinjwa ubutasi”, muri iyo nkuru, ikinyamakuru kigaragazamo urutonde rw’abantu batandatu bo mu gisirikare na polisi.

Abo mu nzego z’umutekano batawe muri yombi barashinjwa kuba ‘barahaye igihugu cy’igituranyi amakuru y’ibanga ajyanye n’ibikorwa byabo’.

Lt Phillip Ankunda, ofisiye mu ngabo za Uganda, UPDF, yatoranyijwe mu bandi kuko yashakanye n’umunyarwanda ndetse inzego z’umutekano zamukozeho iperereza ku kuba yatahaye ayo makuru uwo mugore we.

The New Vision yanditse ihamya ko u Rwanda ari cyo gihugu cy’igituranyi abo ba ofisiye bakekwaho kuba bakoreraga ubutasi.

Inkuru yakurikiye iyi yasohowe n’iki kinyamakuru yaje ihindura iya mbere. Yavugaga ko ukekwa witwa Samuel Ndwane, enjeniyeri mu by’ubutabire ubarizwa mu ngabo zirwanira mu kirere muri UPDF, yasanganywe indangamuntu y’u Rwanda bikaba bituma akekwa.

Uyu Ndwane iki kinyamakuru cyanditse, akomoka ku banyarwanda ariko ni uwo mu karere ka Kiruhura, bisobanuye ko ari Umugande ufite inkomoko mu Rwanda. Mu nkuru ya mbere byari bihagije ngo Lt Ankunda washakanye n’umugore w’umunyarwandakazi atabwe muri yombi, ako kanya akekweho ko nk’umunyarwanda agomba kuba yegeranya amakuru y’ubutasi akuye ku mugabo we.

Icya kabiri, yatawe muri yombi kubera ubucuti yari afitanye na Ndwane. Mu nkuru nta gihamya na kimwe gitangwa cy’uburyo abo bombi bakora ubutasi bavugwamo cyangwa n’uburyo bageza ayo makuru mu Rwanda.

Ku rundi ruhande, iyi nkuru irashimangira neza ibikorwa byo guhohotera, guhoza ku nkeke no guta muri yombi abanyarwanda cyangwa abanya-Uganda bafite inkomoko mu Rwanda, bakabagerekaho ibyaha byo gukorera u Rwanda ubutasi.

Kuva mu 2017, ubuyobozi bwa Uganda ntibwahwemye gutsimbarara ku birego by’ubutasi ariko ntibwigeze bubitangira ibimenyetso ngo bubihamye mu nkiko. Uku gutabwa muri yombi gufitanye isano n’ubukangurambaga bwimbitse bwo gushakira ubufasha umutwe w’iterabwoba wa RNC wa Kayumba Nyamwasa, ndetse no gutoteza umunyarwanda wese wanze kwifatanya n’umutwe w’iterabwoba uri mu izingiro ry’umushinga w’igihe kirekire wa Museveni wo guhungabanya u Rwanda.

Icyiciro giheruka ni ugutoteza no guhoza ku nkeke abanyarwanda cyatangiye muri Kanama 2017, ubwo Rene Rutagungira yafatirwaga mu kabari i Kampala, agafungirwa ahantu hatagira umugeraho imyaka irenga ibiri akarekurwa muri Mutarama uyu mwaka nyuma yo gukorerwa iyicarubozo ry’inkazi.

Mu Ukuboza 2017, Fidèle Gatsinzi yafatiwe mu iguriro i Ntinda mu Burasirazuba bwa Kampala, ubwo yajyaga muri Uganda gusura umuhungu we wiga yo muri Mukono Christian University.

Mu buhamya bwe avuga ko yafashwe ari mu Mujyi rwagati i Kampala avuye muri hoteli yararagamo, umwe mu basirikare amubwira ko hari mwene wabo w’umunyarwanda umushaka witwa Rugema Kayumba.

Uyu Rugema ni mwishywa wa Kayumba Nyamwasa, wahunze igihugu akaba ari umwe mu bayobozi b’umutwe urwanya ubutegetsi bw’u Rwanda, RNC.

Gatsinzi yakorewe iyicarubozo mbere yo kujugunywa ku mupaka wa Gatuna atabasha kwigenza ahubwo atwawe mu igare ry’abafite ubumuga. Nta cyaha na kimwe yigeze ashinjwa.

Abanya-Uganda bakomoka mu Rwanda, bashinjwa gukorera u Rwanda ubutasi, nta na rimwe baragezwa mu nkiko ngo biregure. Nunu Johnson, umunya-Uganda ufite inkomoko mu Rwanda, yafatiwe mu rugo rwe i Ntungamo bitegetswe n’uyobora intara ya RNC muri Uganda, Pasiteri Deo Nyirigira.

Yamaze amezi akorerwa iyicarubozo ndetse yangirwa gufata imiti ya kanseri y’ubugabo yari arwaye. Yapfuye muri Kanama 2019, nyuma y’amezi make arekuwe. Mu Ugushyingo 2019, abanyarwanda babarirwa muri 200 bafatiwe i Kisoro bashinjwa kuba intasi za Kigali.

Mu mwaka ushize hagati ya Mutarama na Gashyantare, abayobozi ba sosiyete y’itumanaho ya MTN barirukanywe. Barimo Umuyobozi wayo, Wim Vanhelleputte, wirukanwe mu gihugu muri Gashyantare akajya iwabo mu Bubiligi, akaza gusubizwa mu kazi ke.

Hari kandi Umufaransa Olivier Prentout wari ushinzwe Imenyekanishabikorwa; Umutaliyanikazi Elsa Muzzolini wari ushinzwe Serivisi z’Imari zitangirwa kuri telefoni n’Umunyarwandakazi Annie Tabura wari Umuyobozi Mukuru Ushinzwe Ubucuruzi n’Ikwirakwizabikorwa muri MTN Uganda, birukanwe ku butaka bwa Uganda bashinjwa guhungabanya umutekano w’igihugu no kuba ba maneko b’u Rwanda.

Inkuru ya Pte Samuel Ndwane na Lt Ankunda, irasa neza n’ibyavuzwe haruguru byo gukomeza gutoteza abafite inkomoko mu Rwanda nta kimenyetso na kimwe cy’ibyo bashinjwa.

U Rwanda ntirwahwemye gusaba Uganda kugeza mu butabera abo ishinja ubutasi bose niba ifite ibimenyetso, ibi kuba bitarigeze bikorwa ni igihamya cy’uko ibyo bimenyetso byabuze bityo ugutabwa muri yombi kw’abanyarwanda n’abafite inkomoko mu Rwanda bikaba ari umugamba wa Uganda wo kurwanya u Rwanda.

Ibi ariko ntabwo byigeze bihagarika ubuyobozi bwa Uganda gukomeza guhoza ku nkeke abanyarwanda n’abanya-Uganda bakomoka mu Rwanda, nubwo buvuga ko hari ubushake bwo kugarura umwuka mwiza hagati y’ibihugu hashingiwe ku masezerano ya Luanda yo muri Nyakanga 2019.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .