00:00:00 IGIHE NETWORK KN KINYARWANDA EN ENGLISH FR FRANCAIS

Iperereza rya New Vision ryagaragaje uruhare rw’umukobwa wa Museveni mu bucuruzi bw’abakobwa muri Uganda

Yanditswe na Albert Rudatsimburwa
Kuya 31 Nyakanga 2021 saa 02:41
Yasuwe :
0 0

Mu itangazamakuru, inkuru ni uko umuntu yarumye imbwa naho mu gihe imbwa yarumye umuntu nta makuru iba irimo kuko birasanzwe. Ku itariki ya 28 Nyakanga, ikinyamakuru The New Vision gikorera mu kwaha kwa Leta ya Uganda, cyavuze ko abagabo b’Abagande bishyura akayabo kugira ngo baryamane n’abagore b’Abanyarwandakazi, mu nkuru bahaye umutwe ugira uti ‘Wives for Sale’.

Gusa ku rundi ruhande, ikinyamakuru cya Nile Post kidasanganywe ubukaka nk’ubwa The New Vision, cyasohoye inkuru ifite ireme kurusha iya The New Vision, yari ifite umutwe ugira uti ‘How woman was recruiting, training Kampala teen girls to sleep with dogs’ (uburyo umugore yashatse, akanatoza abakobwa bakiri bato kuryamana n’imbwa).

Biratangaje uburyo The New Vision itabashije gukora inkuru igaruka ku ‘mbwa’ n’uburyo urubyiruko rwa Uganda ruri gutozwa kuba imbata y’imibonano mpuzabitsina, kandi ari ikinyamakuru cyakabaye gitanga abandi bose ayo makuru ashyushye.

Ubwo The New Vision yari ikiyobowe na William Pike, umunyamakuru ukomoka mu Bwongereza n’ubundi cyari ikinyamakuru gikora nk’urubuga rw’ubuvugizi rwa Leta, gusa rimwe na rimwe hari ubwo Pike yajyaga yanga ko inkuru runaka zihabanye n’amahame y’umwuga w’itangazamakuru, zidatambuka muri The New Vision.

Mu 2006, Pike yaje kwirukanwa kubera iyi mpamvu, kuko hari inkuru yasubizaga inyuma kandi nyamara zifuzwa n’ubutegetsi bwa Kampala, ari bwo bwari bumuyoboye, uretse ko yabushinjaga kwivanga mu kazi ke.

Pike yifuzaga ko The New Vision ikomeza kuvugira Leta ariko mu buryo bwa kinyamwuga, mu gihe ubuyobozi bwifuzaga gukoreshwa n’ikinyamakuru mu buryo burenze gusingizwa gusa, ahubwo kikaba n’urubuga rwo gutuka no kwandagaza abatavuga rumwe n’ubutegetsi.

Yaje gusimburwa na Robert Kabushenga, wari ukiri umusore muto ndetse ari mu rubyiruko ruri mu ishyaka rya NRM. Mu gihe cye ku buyobozi, Kabugesha yakoze iyo bwabaga mu guhaza ibyifuzo bya shebeja, ariko na we akagerageza kutarengera mu kwica amahame y’umwuga kugira ngo ikinyamakuru cye kidatakarizwa icyizere gifitiwe muri rubanda. Ibi asa nk’uwabigezeho, kugeza ubwo umubano w’u Rwanda na Uganda wazagamo agatotsi, ari na bwo ibintu byahindutse.

Amakuru avuga ko nubwo Kabushenga yari yiteguye gukomeza gukoresha ikinyamakuru ayoboye mu guharabika u Rwanda, hari ibintu bimwe na bimwe atari yiteguye gukora kuko yabifataga nko kurengera kudafite impamvu.

Bivugwa ko uyu mugabo yagenzuye amakuru abayobozi be (inzego nkuru muri Leta ya Uganda zirimo Ibiro bya Perezida Museveni) bifuza ko atangazwa, agasanga uretse no kuba ayo makuru atari bufashe abasomyi ba The New Vision gufata u Rwanda nk’intandaro y’ikibazo [nk’uko abayobozi ba Uganda babyifuzaga], yari bunatume ubunyamwuga bwe nk’umuyobozi w’ikinyamakuru cyatangaje amakuru y’ibihuha, bukemangwa, cyane ko amwe mu makuru yasabwaga gutambutsa mu kinyamakuru yabaga atuzuye ku buryo n’ibinyamakuru bito bitari buyatangaze.

Gusa kwanga gutangaza aya makuru yifuzwaga n’abayobozi be, byatumye iminsi ya Kabushenga muri The New Vision isigara ibarirwa ku ntoki ndetse hadaciye kabiri uyu mugabo yaje guhambirizwa muri Mutarama uyu mwaka, asimburwa na Don Wanyama, umugabo uzwiho gukora ibishoboka byose, kabone n’iyo byaba bimutesha ikuzo ariko akagera ku cyo yatumwe.

Akigera ku buyobozi, Wanyama yahise yereka abayobozi bamutoranyije ko bahisemo neza, ahindura The New Vision ikinyamakuru cyo kwibasira no gutuka u Rwanda mu buryo bwose bushoboka, aho yatangazaga amakuru y’ibinyoma ku buryo atari buzace ku mpapuro z’icyo kinyamakuru mu gihe cyari kigifite umurongo muzima.

Bitewe no gukora ibintu atabanje kubishungura, byageze aho Wanyama atangira gukora inkuru zari bugire ingaruka mbi ku bayobozi be. Urugero ni ku ‘nkuru y’ubucukumbuzi’ yakozwe igaruka ku bakobwa b’Abanyarwandakazi aho muri Uganda.

Umunyamakuru wa The New Vision wayikoze, yasobanuye uburyo yabonyemo amakuru, ati “Intego yanjye yari ukwemeza umuvugabutumwa kunyakira mu itorero nk’umukobwa wifuza umugabo, kugira ngo ndebe niba nta burenganzira bwa muntu bwangizwa ndetse nta byaha bihakorerwa. Mu minsi ishize, tumaze iminsi twumva ibikorwa byo gucuruza abantu byariyongereye mu gihugu. Abakobwa bavanwa muri Uganda basezeranyijwe akazi kazabahemba neza mu bihugu by’Abarabu, [ariko iyo bagezeyo] bagacuruzwa nk’abakozi bo mu rugo cyangwa abicuruza. Urugendo rwanjye [rwo gushaka ayo makuru] narutangiriye i Maanyi…muri Mityana.”

Iri perereza ryagize uruhare rukomeye mu kugaragaza ubuswa bwa Wanyama, kuko amakuru yavugaga ko abakobwa bajyanwa mu bihugu by’Abarabu ariko abanyamakuru be bagiye gushakira amakuru mu Karere ka Mityana, kari hanze y’Umujyi wa Kampala.

Mu gukurikirana, byaje kugaragara ikigo cyihishe inyuma y’icuruzwa ry’aba bana muri Uganda ari icy’umuryango w’umuyobozi we (umuryango wa Perezida wa Uganda, Kaguta Museveni) ndetse umukobwa we ukora ivugabutumwa, Patience Museveni, afatanyije n’umugabo we, Odrek Rwabwogo, kuri ubu usigaye ari Umujyanama wa Perezida Museveni, akaba ari bo bari inyuma y’ubu bucuruzi.

Mu yandi magambo, inkuru ya Wanyama yari ‘igamije kugenzura niba nta burenganzira bwa muntu bwirengagizwa cyangwa ibyaha bibera mu rusengero rw’umukobwa wa Museveni’, yagaragaje uruhare rw’umuryango wa shebuja, Perezida Museveni, mu bikorwa by’ubucuruzi bw’abantu.

Mu 2016, New Vision yigeze kwandika inkuru ifite umutwe ugira uti “Umukobwa wa Museveni n’umugabo we, mu bafite ibigo byohereza abakozi mu bihugu by’Abarabu”, byumvikanisha ko abanyabyaha Wanyama n’abanyamakuru be bari gushakisha, ari abantu bakora mu Biro Bikuru by’Igihugu, aho bakorera Perezida Museveni mu buryo bwa hafi.

Abayobozi ba The New Vision babanjirije Wanyama, bakoze uko bashoboye barwanya inkuru zashoboraga gutuma umuryango wa Perezida Museveni ugayika. Mu gihe cy’iperereza rya Wanyama n’abanyamakuru be, nta nubwo byari ngombwa ko birirwa bava i Kampala, kuko abantu yarimo gushaka bakoraga neza neza hafi ye, mu biro bya Perezida Museveni.

Aba bantu bacuruza urubyiruko rwa Uganda mu bihugu by’Abarabu, baherutse kwagura ubucuruzi bwabo aho bari gutoza urubyiruko ruzajyanwa ku masoko mpuzamahanga arimo iry’i Burayi.

Umukobwa wa Museveni, Patience Museveni ukora ivugabutumwa, afatanyije n’umugabo we, Odrek Rwabwogo, bafite ikigo gicuruza urubyiruko rwa Uganda mu mahanga, aho rukorerwa ibirimo ubusambanyi n'ibindi biteye ubwoba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .