Uburengerazuba: Abasaga 500 bagiye kwifashishwa mu komora ibikomere bya Jenoside yakorewe Abatutsi

Yanditswe na Mukwaya Olivier
Kuya 8 Gashyantare 2020 saa 01:03
Yasuwe :
0 0

Amatsinda agizwe n’abantu basaga 500 bahuguwe muri gahunda ya ‘Mvura Nkuvure’, agiye kwifashishwa mu komora ibikomere byasizwe na Jenoside yakorewe Abatutsi mu 1994 n’amateka yaranze u Rwanda muri rusange.

Aba bahuguwe mu bijyanye no gutega amatwi umuntu ndetse no gusana imitima y’abababaye, ni abo mu turere twa Rubavu, Nyabihu na Karongi.

Gahunda ya Mvura Nkuvure ikora mu buryo bw’amatsinda, aho bashyira mu matsinda abantu 10 kugeza kuri 15 bahura rimwe mu cyumweru nibura amasaha atatu, bakaganira bakabwirana ibibazo buri umwe afite bimuremereye ndetse bakanafashanya kubikemura.

Nyuma ya Jenoside yakorewe Abatutsi, bamwe mu barokotse babuze imiryango yabo ariko ntibamenya ukuri kw’aho biciwe n’ababishe.

Ku rundi ruhande, hari imiryango y’abakatiwe n’abakiri muri gereza yasigaye mu ipfunwe ryatumaga batabasha gushyikirana n’imiryango yiciwe abayo.

Kutiyizera no kutizera abandi, kubura umutuzo ndetse n’ihungabana, ni bimwe mu bibazo byasigaye muri rubanda nyuma y’ubutabera.

Binyuze muri iyi gahunda abagororwa bo muri Gereza ya Rubavu, ubutumwa bahawe bwabakoze ku mutima bamwe bemera kugaragaraza imibiri y’abo bishe muri Jenoside yakorewe Abatutsi mu 1994.

Ubuyobozi bwa Ibuka bwemeza ko bizabafasha kubona imibiri y’abishwe muri Jenoside kuko hari myinshi y’abantu baburiwe irengero.

Ndabateze Daniel ufungiwe muri Gereza ya Rubavu, akomoka mu cyahoze ari Komini Mutura, ni umwe mu bemeye gutanga amakuru y’ahajugunywe imibiri y’Abatutsi bishwe mu 1994 kubera gahunda Mvura Nkuvure.

Avuga ko ikintu cyamukoze ku mutima ari uko bavuze amateka mabi igihugu cyanyuzemo, yiyemeza ko azagaragaza aho yahishe imibiri y’abo yishe muri Jenoside.

Mukandekezi Siphora warokotse Jenoside yakorewe abatutsi mu Karere ka Nyabihu, avuga ko mbere ya Mvura Nkuvure yabaga mu bwigunge ariko nyuma y’ibiganiro yababariye abamuhemukiye.

Ati “Kuva nakwicirwa abana babiri nkasigarana umwe, nahoranaga ubwigunge ariko aho Mvura Nkuvure, iziye nkumva ibiganiro narabohotse ubu ngenda nemye kandi narababariye n’abantemye sinkibatekereza, ndashima na leta kuko yaduhaye umutekano’’.

Musenyeri Onesphore Rwaje, wahoze ayobora itorero ry’Abangilikani mu Rwanda, avuga ko iyi gahunda ihuza Abarokotse Jenoside n’ababiciye, ikaba ikora umurimo ujyanye n’ubumwe n’ubwiyunge ndetse n’isanamitima.

Avuga ko uwiciwe n’uwishe bahura, abishe bagasaba imbabazi bakabasha kwinjirana n’abandi mu iterambere ry’igihugu, bagakorana nta rwikekwe.

Umuhuzabikorwa wa gahunda ya Mvura Nkuvure mu rwego rw’igihugu, Nzaramba Lucie, avuga ko gahunda yabo yaje kunganira gahunda za leta zijyanye n’ubumwe n’ubwiyunge.

Ati “Habanje Gacaca iza ari ubutabera bwunga ariko isiga hari ibisigisigi bitararangira. Hari Itorero na Ndi Umunyarwanda, Mvura Nkuvure, akaba ari ho yunganira Leta mu guhangana n’uruhererekane rw’ingaruka za Jenoside yakorewe abatutsi tuvurisha ibiganiro twubakamo icyizere ku bakibuze, abantu bakibonanamo kandi iyo bibaho mbere abantu ntibari kwicana’’.

Iyi gahunda yatangiriye mu yahoze ari Intara ya Byumba muri 2005 hanyuma iza kwaguka ubu iyi gahunda yageze mu ntara zose z’igihugu, aho abarenga ibihumbi icumi babashije kunyura mu biganiro bakabohoka ubu bakaba barakoze amakoperative abafasha kwiteza imbere.

Abagororwa batanze ubuhamya bw'uko bahindutse binyuze muri gahunda ya Mvura Nkuvure
Abayobozi batandukanye bari baje gusoza ibiganiro muri Gereza ya Rubavu
Musenyeri Rwaje avuga ko iyi gahunda yafashije mu rugamba rw'ubumwe n'ubwiyunge
Muri Gereza ya Rubavu abagororwa 90 nibo barangije bakaba bagiye kwigisha bagenzi babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza